عقیل کریم ڈھیڈی کی جانب سے جنرل عاصم منیر کو فیلڈ مارشل کے عہدے پر فائز ہونے پر مبارکباد
کراچی: معروف صنعتکار اور اسٹاک مارکیٹ کے ممتاز ماہر عقیل کریم ڈھیڈی نے چیف آف آرمی اسٹاف جنرل عاصم منیر کو فیلڈ مارشل کے اعلیٰ ترین فوجی عہدے پر فائز ہونے پر دلی مبارکباد پیش کی ہے۔ یہ بات انہوں نے ایک نجی محفل میں گفتگو کے دوران کہی، جس کے بعد سوشل میڈیا پر ان کے بیان کو بھرپور توجہ حاصل ہوئی۔
عقیل کریم ڈھیڈی کا کہنا تھا کہ پاکستان کی تاریخ میں فیلڈ مارشل کا رینک ایک نایاب اعزاز ہے، جو اب تک صرف جنرل ایوب خان کو دیا گیا تھا۔ یہ نہ صرف عسکری قیادت کے لیے بلکہ پورے ملک کے لیے ایک اہم اور غیرمعمولی پیش رفت ہے کہ جنرل عاصم منیر کو یہ درجہ دیا گیا ہے۔ یہ ان کی قیادت، خدمات اور غیرمعمولی صلاحیتوں کا اعتراف ہے، عقیل کریم ڈھیڈھی کا مزید کہنا تھا کہ پاکستان کو اس وقت جس استحکام، یکجہتی اور مضبوط قیادت کی ضرورت ہے، جنرل عاصم منیر جیسے قائدین ہی اس کا عملی مظاہرہ کر رہے ہیں۔ انہوں نے امید ظاہر کی کہ یہ فیصلہ ملک کے لیے ایک مثبت سمت کی نشاندہی کرے گا اور قومی یکجہتی کو مزید مضبوط کرے گا۔
عقیل کریم ڈھیڈھی نے کہا کہ جنرل عاصم منیر کو فیلڈ مارشل کے عہدے پر ترقی دینا ایک خوش آئند اور دور اندیشی پر مبنی فیصلہ ہے، جو ملکی سلامتی، استحکام اور اداروں کے وقار کو مزید مضبوط کرے گا۔ انہوں نے کہا کہ مختلف حلقوں کی جانب سے بھی اس فیصلے کو مثبت انداز میں سراہا جا رہا ہے، جو اس بات کا ثبوت ہے کہ قوم اپنے قابل اور محب وطن سپہ سالار پر مکمل اعتماد رکھتی ہے۔
