جیکب آباد رپورٹ ایم ڈی عمرانی
جیکب آباد میں سورج سوا نیزے پر آگیا، درجہ حرارت 51 سینٹی گریڈ تک پہنچ گیا، بجلی کی بدترین لوڈشیڈنگ جاری، اسکولوں میں بجلی بند ہونے کی وجہ سے درجنوں طلبا و طالبات بے ہوش ہوگئے، ہیضے، لو اور ہیٹ اسٹروک کی وجہ سے اسپتالیں مریضوں سے بھر گئیں۔ تفصیلات کے مطابق جیکب آباد میں منگل کے روز قیامت خیز گرمی رہی اور درجہ حرارت 51 سینٹی گریڈ تک ریکارڈ کیا گیا، شدید گرمی کے باوجود سیپکو حکام کی جانب سے بجلی کی غیر اعلانیہ لوڈشیڈنگ اور ٹرپننگ کا سلسلہ بدستور جاری ہے، صبح کے اوقات میں بجلی بند ہونے کی وجہ سے کئی اسکولوں میں درجنوں طلبا و طالبات بے ہوش ہوگئے اسکول انتظامیہ نے بچوں پر ٹھنڈا پانی ڈال کر ہوش میں لایاگیا، قیامت خیز گرمی میں بجلی کی گھنٹوں گھنٹوں لوڈشیڈنگ نے عوام کا جینا محال کردیا ہے، شہر بھر میں شدید لو اور ہیٹ اسٹروک کی وجہ سے سرکاری اور پرائیوٹ اسپتالیں مریضوں سے بھر گئی ہیں جبکہ ہیضے کی وبا بھی تیزی سے پھیل رہی ہے اور درجنوں لوگ ہیضے میں مبتلا ہوکر اسپتالوں میں داخل ہوچکے ہیں، شہریوں کا کہنا ہے کہ جیکب آباد ملک کا گرم ترین شہر ہے جہاں اس وقت درجہ حرارت 50 سینٹی گریڈ سے تجاوز کرجاتا ہے جہاں عوام کو سہولیات فراہم کرنے کے بجائے ان کی مشکلات میں مزید اضافہ کیا جارہا ہے، بجلی کی بدترین لوڈشیڈنگ کرکے عوام کی زندگی اجیرن بنادی گئی ہے بجلی کی بندش کی وجہ سے شہر میں برف کی قلت پیدا ہوگئی ہے جبکہ عوام کو واٹر سپلائی اسکیم سے پانی کی فراہمی بھی ایک ماہ سے بند ہے، شہریوں نے مطالبہ کیا کہ بجلی کی لوڈشیڈنگ کا دورانیہ کم کرکے پانی فراہم کیا جائے۔
جیکب آباد میں محنت کش نوجوان کی گولیاں لگی لاش برآمد، پولیس نے شک کی بنیاد پر 2 افراد کو گرفتار کرلیا۔ تفصیلات کے مطابق جیکب آباد کی تحصیل ٹھل کے بائے پاس پر قائم رائس مل میں مزدوری کرنے والے 18 سالہ نوجوان حسید عرف علی خان جتوئی کی گولی لگی لاش برآمد ہوئی، اطلاع پر پولیس نے پہنچ کر لاش کو تعلقہ اسپتال منتقل کیا جہاں ضروری کاروائی کے بعد لاش ورثہ کے حوالے کی گئی، مقتول نوجوان کے والد عباس علی جتوئی کا کہنا ہے کہ مجھے شبہ ہے کہ میرے بیٹے کو قتل کیا گیا ہے، پولیس نے شک کی بنیاد پر مل کے 2 چوکیداروں کو گرفتار کرکے تفتیش شروع کردی ہے، پولیس کے مطابق شکارپور کے علاقہ گڑہی یاسین کے رہائشی نوجوان علی جان جتوئی کی گولی لگی لاش برآمد ہوئی ہے تحقیقات کررہے ہیں کہ نوجوان نے خودکشی کی ہے یا اسے کسی نے قتل کیا ہے جلد معلوم کرلیں گے۔
جیکب آباد پولیس نے اغوا ہونے والے ڈرائیور کو ڈرامائی انداز میں مقابلے کے بعد بازیاب کرالیا۔ تفصیلات کے مطابق جیکب آباد کی تحصیل گڑہی خیرو کے تاجو دیرو تھانہ کی حدود کھیر تھر کینال کے قریب سے گزشتہ روز اغوا ہونے والے مزدا گاڑی کے ڈرائیور نیک محمد کو پولیس نے مقابلے کے بعد ڈرامائی انداز میں بازیاب کرالیا ہے، پولیس ترجمان کے مطابق جیکب آباد پولیس نے مغوی ڈرائیور کو شکارپور ضلع کے تھانہ جہان واہ کی حدود لاکھا پل کھیر تھر کے مقام سے بحفاظت بازیاب کرالیا ہے، پولیس کا کہنا ہے کہ ڈاکو مغوی کو ایک جگہ سے دوسری جگہ منتقل کررہے تھے کہ پولیس نے کاروائی کردی اور ڈاکو مغوی کو چھوڑ کر فرار ہوگئے۔
جیکب آباد میں ٹریفک کا نظام درہم برہم، ٹریفک جام ہونا معمول بن گیا، ٹریفک پولیس غائب، عوام کو سخت مشکلات کا سامنا۔ تفصیلات کے مطابق جیکب آباد میں ٹریفک کا نظام درہم برہم ہوچکا ہے شہر کے کئی شاہراہوں قائد اعظم روڈ، ٹاور روڈ، شکارپور روڈ، سنیما روڈ سمیت شہر کی مارکیٹوں اور گلیوں میں دن کے اوقات میں ٹریفک جام رہنا معمول بن چکا ہے شہر کے اکثر علاقوں میں ٹریفک جام ہونے کے باوجود ٹریفک پولیس غائب ہے اور ٹریفک کی بحالی کے لیے کوئی اقدامات نہیں کئے جارہے جس کی وجہ سے عوام کو شدید مشکلات کا سامنا کرنا پڑ رہا ہے، شہریوں کا کہنا ہے کہ شہر کی مختلف شاہراہوں پر تجاوزات، چنگچی رکشوں اور ویگنوں کی وجہ سے ٹریفک جام ہونا معمول بن چکا ہے، شہر میں ٹریفک کی روانی کو جاری رکھنے کے لیے ٹریفک پولیس کو اقدامات اٹھانے کی ضرورت ہے، شہریوں نے مطالبہ کیا کہ شہر میں ٹریفک کا نظام درست کرکے عوام کو تکلیف سے نجات دلائی جائے۔
