ممکنہ جنگی صورتحال کے حوالے سے وائس چانسلر کنگ ایڈورڈ یونیورسٹی پروفیسر محمود ایاز کا میو کینسر کیئر ہسپتال کا ہنگامی دورہ، ایمرجنسی تیاریوں پر اطمینان کا اظہار۔
ملک میں ممکنہ جنگی صورتحال کے پیش نظر کنگ ایڈورڈ میڈیکل یونیورسٹی کے وائس چانسلر پروفیسر محمود ایاز نے آج میو کینسر کیئر اسپتال کا ہنگامی دورہ کیا۔ دورے کا مقصد اسپتال میں موجود ڈیزاسٹر مینجمنٹ یونٹ کے تحت کی گئی تیاریوں، ایمرجنسی سہولیات اور مریضوں کی فوری نگہداشت کے نظام کا جائزہ لینا تھا۔اس موقع پر میو کینسر کئیر کے چیف ایگزیکٹو آفیسر پروفیسر وسیم حیات خان نے اپنی ٹیم کے 
ہمراہ وائس چانسلر کو ہسپتال کا دورہِ کروایا اور بریفنگ دی۔اس موقع پر
پروفیسر محمود ایاز نے اسپتال انتظامیہ، ڈاکٹرز اور طبی عملے سے تفصیلی ملاقات کی اور ان سے ممکنہ جنگی حالات میں درپیش چیلنجز اور ان سے نمٹنے کے اقدامات پر بریفنگ لی۔ انہوں نے مختلف وارڈز، ایمرجنسی رومز، ٹراما یونٹس اور ڈیزاسٹر ریلیف ایریاز کا معائنہ کیا۔
وائس چانسلر نے اس موقع پر کہا کہ “ملک کو درپیش چیلنجز کے باوجود ہماری طبی برادری مکمل مستعد اور چوکس ہے۔ میو اسپتال میں جنگی ہنگامی حالات سے نمٹنے کے لیے تمام ضروری اقدامات کیے جا چکے ہیں۔”انہوں نے ڈیزاسٹر مینجمنٹ یونٹ کی کارکردگی کو سراہتے ہوئے کہا کہ مریضوں کی بروقت منتقلی، ابتدائی طبی امداد، وینٹی لیٹرز اور میڈیکل اسٹاک کی دستیابی کو یقینی بنایا گیا ہے۔ انہوں نے عملے کی تربیت، مشقوں اور رابطہ نظام کی بہتری پر بھی زور دیا تاکہ کسی بھی ہنگامی صورتحال میں فوری ردعمل دیا جا سکے۔پروفیسر محمود ایاز نےہسپتال کی تیاریوں پر اطمینان کا اظہار کرتے ہوئے اسے ایک مثالی ماڈل قرار دیا اور دیگر اسپتالوں کو بھی ایسی ہی پیشگی منصوبہ بندی اپنانے کی ہدایت کی۔
