کراچی
تاریخ: 08 مئی 2025
کراچی (): صوبائی وزیر توانائی، ترقیات و منصوبہ بندی سید ناصر حسین شاہ نے کہا ہے کہ سندھ حکومت نے قانون سازی کے ذریعے صوبے کے تمام ہسپتالوں کو پابند کیا ہے، سڑکوں پر حادثات کا شکار زخمیوں کی جانیں بچانے اور فرسٹ ایڈ فراہم کرنے کیلئے فوری اقدامات کیئے جائیں۔ اس کے ساتھ ہی زخمیوں کو لانے والوں کے ساتھ اخلاق سے پیش آیا جائے اور انھیں بلاوجہ تنگ یا پریشان نہ کیا جائے اور کسی بھی صورت میں انھیں حراساں نہ کیا جائے۔ ان خیالات کا اظہار انھوں نے آج مقامی ہوٹل میں منعقدہ پانچویں روڈ سیفٹ کانفرنس کے موقع پر مہمان خصوصی کی حیثیت سے اپنے خطاب میں کیا۔ اس موقع پر کراچی پولیس چیف ٹریفک جاوید عالم اوڈھو اور بانی و چیئرمین یوتھ پارلیمنٹ رضوان جعفر کے علاوہ شہر کی معزز شخصیات بھی موجود تھیں۔ وزیر توانائی ناصر شاہ نے اپنے خطاب میں مزید کہا کہ عوام کی جان و مال کی حفاظت اور روڈ یکسیڈنٹ میں کمی اور لاپرواہی سے اور تیز رفتاری سے گاڑیاں چلانے والوں کی حوصلہ شکنی کیلئے جرمانوں کی رقوم میں اضافہ کیا گیا ہے۔ انھوں نے کہاکہ قانون پر عمل درآمد کی ذمے داری عوام پر تو عائد ہوتی ہی ہے مگر سب سے بڑی ذمہ داری حکومت کی ہوتی ہے۔ صوبائی وزیر نے مزید کہا کہ روڈ سیفٹی کے حوالے سے سیف سٹی پروجیکٹ کو جدید خطوط پر استوار کیا جارہا ہے اور اس سلسلے میں جدید ٹیکنالوجی سے بھی استفادہ کیا جارہا ہے۔ اسکے علاوہ 1122 کی ایمبولنسز کی سروسز کو بھی مزید بہتر بنانے کے ساتھ ان کا دائرہ کار بھی وسیع کیا جارہا ہے۔ ناصر شاہ نے کہا کہ روڈ سیفٹی کانفرنس کے دور رس نتائج سامنے آئیں گے اور اس سے ناصرف یوتھ کو بلکہ عوام کو بھی آگاہی حاصل ہوگی۔ کانفرنس کے ذمے داران اختتام پر اپنی سفارشات پیش کریں ، عوام کے وسیع تر مفاد کیلئے قابل عمل سفارشات پر عمل کرنے کیلئے ہر ممکناً اقدامات کو یقینی بنایا جائے گا۔ وزیر توانائی نے کہا کہ یونیورسٹی روڈ پر ریڈ لائین پروجیکٹ کی جلد از جلد تکمیل کیلئے چیئرمین بلاول بھٹو نے خصوصی ہدایات جاری کی ہیں جس کے باعث وزیراعلیٰ سندھ اور سینئر وزیر شرجیل انعام میمن نہایت متحرک ہیں۔ کراچی سمیت پورے صوبہ کے انفرااسٹرکچر کو بہتر بنایا جارہا ہے۔ شہریوں کیلئے عیدالاضحیٰ کے موقع پر صفائی ستھرائی کیلئے سالڈ ویسٹ مینجمنٹ نے بہترین منصوبہ بندی کی ہے کیوں کہ سالڈ ویسٹ اب پورے کراچی میں کام کررہی ہے۔ اس دفعہ عید کے موقع پر قربانی کی آلائشوں اور صفائی ستھرائی کے حوالے سے عوام کو بڑی اور خوشگوار تبدیلی نظر آئی گی۔ بدعنوانی میں کمی اور خاتمے کیلئے اینٹ کرپشن اسٹیبلشمنٹ کو آن لائن کیا ہے اور ٹرانسپیرینٹ بنانے کیلئے خصوصی اقدامات کئے ہیں۔ عوامی شکایات پر فوری اقدامات کئے جائیں گے۔ وزیر توانائی نے مزید کہا کہ چیئرمین بلاول کی خصوصی ہدایت پر کراچی شہر میں اربن فاریسٹری قائم کی گئی ہے جن میں بڑی مثال لیاری اور ملیر ایکسپریس وے کے ساتھ قائم شہری جنگلات ہیں۔ وزیر توانائی کے پیشکش کی یوتھ پارلیمنٹ کے پاس شہر بھر میں شجرکاری کے حوالے سے کوئی منصوبہ ہے تو فوری طور پر پیش کریں حکومت اس سلسلے میں فوری طر پر فنڈز جاری کرے گی۔ ناصر حسین شاہ نے مزید کہا کہ جھوٹے الزام پر مودی سرکاری نے جنگ کا آغاز کیا ہے ، پانی روک کر ملک کو نقصان پہنچانے کی کوشش کی ہے۔ فرانسیسی جہاز پر غرور کرتے تھے مگر ہماری افواج نے ان کا غرور کاک میں ملادیا۔ انڈیا ہماری شہری آبادی کو نقصان پہنچا رہا ہے جبکہ ہم صرف جنگی تنصیبات کو نشانہ بنا رہے ہیں۔ ناصر شاہ نے کہا کہ 24 کروڑ عوام اپنی مسلح افواد کے شانہ بشانہ کھڑی ہے اور مودی سرکار کے سامنے سیسہ پلائی دیوار ہے۔ پاکستان میں رہنے والا ہر ہندو، سکھ، عیسائی سب پاک فوج کے ساتھ کھڑے ہیں۔
محمد شبیہہ صدیقی
ڈائریکٹر میڈیا مینجمنٹ
وزیر توانائی اور پی اینڈ ڈی سندھ
