خبرنامہ نمبر3376/2025
کوئٹہ۔ 07 مئی۔ وزیر اعلیٰ بلوچستان میر سرفراز بگٹی نے کہا ہے کہ پاک فوج کسی بھی جارحیت کا منہ توڑ جواب دینے کی صلاحیت رکھتی ہے جو بھی پاکستان کو میلی انکھ سے دیکھے گا اسے بھرپور جواب دیا جائے گا گذشتہ شب بھارت نے پاکستان پر بلا اشتعال اور بلا جواز حملہ کیا جس کی میں پرزور مذمت کرتا ہوں پاک فوج اور پاک فضائیہ نے بھارتی لڑاکا طیاروں کو کامیابی سے مار گرایا اور ان کے ناپاک عزائم کو خاک میں ملایا بلوچستان بورڈ آف انویسٹمنٹ اینڈ ٹریڈ کے زیر اہتمام رائزنگ بلوچستان اینڈ یوتھ انویشنز کے عنوان سے منعقدہ تقریب سے خطاب کرتے ہوئے وزیراعلیٰ نے کہا کہ بھارت دہشت گردانہ عزائم رکھنے والا ملک ہے جو بلوچستان میں بھی دہشت گرد تنظیموں کو سپورٹ کرتا ہے بلوچستان کے عوام پاک فوج کے شانہ بشانہ کھڑے ہیں* تقریب سے خطاب کرتے ہوئے وزیراعلیٰ نے کہا کہ بلوچستان سرمایہ کاری اور مواقعوں کی سرزمین ہے اور یہاں کے قدرتی وسائل ملکی اور غیر ملکی سرمایہ کاروں اپنی جانب راغب کرتے ہیں انہوں نے کہا کہ ذرائع ابلاغ میں وقت کے ساتھ جدت آئی ہے اور آج کل کے جدید دور میں ڈیجیٹل پریس کا کردار مزید بڑھ گیا ہے انہوں نے نوجوانوں سے خطاب کرتے ہوئے کہا کہ نوجوان سوشل میڈیا کے ذریعے صوبے کے مثبت عکس کو اجاگر کریں اور اپنی توانائیوں کو مثبت اور تعمیری انداز میں صوبے کی تعمیر و ترقی اور خوشحالی کے لیے استعمال کریں انہوں نے کہا کہ صوبائی حکومت بہت جلد ڈیجیٹل میڈیا پالیسی لا رہی ہے تاکہ سوشل میڈیا پلیٹ فارمز کا صوبے کی تعمیر و ترقی اور پیشہ ورانہ استعمال ہو سکے وزیراعلیٰ نے کہا کہ صوبے کے ڈیویلپمنٹ کا بجٹ 200 ارب روپے ہیں جو کہ صوبے کے رقبے کے حساب سے یقیناً قلیل ہیں لیکن موجودہ صوبائی حکومت ڈیولپمنٹ کے لیے مختص تمام صوبائی بجٹ کا بطریق احسن استعمال کر رہی ہے اور رواں سال جون تک تمام تر ترقیاتی بجٹ استعمال میں لایا جائے گا وزیر اعلیٰ نے کہا کہ صوبائی حکومت آئندہ مالی سال کے بجٹ میں زیادہ سے زیادہ روزگار پیدا کرنے کے لیے خصوصی اقدامات کر رہی ہے انہوں نے کہا کہ ہونہار طلباء و طالبات ، شہداء اور مزدور کے بچوں کے لیے بے نظیر اسکالرشپ کا آغاز کیا گیا ہے اور صوبائی حکومت نے نوجوانوں کو بیرون ملک روزگار کے مواقع فراہم کرنے کے لئے منصوبے بھی شروع کیے ہیں جن پر بھرپور انداز سے عمل درآمد جاری ہے انہوں نے کہا کہ اخوت کے اشتراک نوجوانوں اپنا کاروبار شروع کرنے کے لیے اسان اقساط پر قرضے فراہم کیے جا رہے ہیں انہوں نے کہا کہ صوبائی حکومت صوبے کے نوجوانوں کو فنی اور تکنیکی تعلیم کے فراہمی پر یقین رکھتی ہے جو انکے لئے ملک اور دنیا کے کسی بھی حصے میں روزگار کی فراہمی میں معاون ثابت ہوسکے اس موقع پر تقریب میں موجود طلباء اور طالبات نے وزیر اعلیٰ سے سوالات بھی کئے جن کے وزیر اعلیٰ نے تفصیلی جوابات دیئے قبل ازیں ، تقریب سے وائس چیئرمین بلوچستان بورڈ آف انویسٹمنٹ اینڈ ٹریڈ بلال خان کاکڑ، چیف ایگزیکٹو آفیسر پبلک پرائیویٹ پارٹنرشپ اتھارٹی ڈاکٹر فیصل ، وائس چانسلر بیوٹٹمز ڈاکٹر خالد حفیظ سمیت دیگر مقررین نے بھی خطاب کیا تقریب میں صوبائی مشیر برائے کھیل و امور نوجوانان مینا مجید ، پارلیمانی سیکریٹریز عبدالمجید بادینی اور میر لیاقت لہڑی سمیت دیگر اعلیٰ حکام بھی موجود تھے۔
کیرتھر کینال کی بھل صفائی اور ریگولیٹر کی ریماڈلنگ کے حوالے سے زمینداروں میں پیدا ہونے والے تحفظات کے پیش نظر ایک اہم اجلاس ڈپٹی کمشنر استامحمد ارشد حسین جمالی کے دفتر میں منعقد ہوا۔ اجلاس میں علاقے کے معززین، ایریگیشن افسران اور زمینداروں کے نمائندگان کے علاوہ صوبائی وزیر لائیو اسٹاک سردارزادہ فیصل خان جمالی نے خصوصی طور پر شرکت کی۔
اجلاس میں تمام فریقین نے اپنے مؤقف اور تحفظات تفصیل سے بیان کیے۔ صوبائی وزیر سردارزادہ فیصل خان جمالی نے اجلاس کی صدارت کرتے ہوئے اس بات پر زور دیا کہ تمام فیصلے زمینداروں کی مشاورت اور رضامندی سے کیے جائیں گے تاکہ کسی کے ساتھ ناانصافی نہ ہو۔
اجلاس کے دوران ایک کمیٹی تشکیل دینے کا فیصلہ کیا گیا جس میں محکمہ آبپاشی کے افسران اور زمینداروں کے نمائندے شامل ہوں گے۔ یہ کمیٹی تمام تکنیکی، زمینی اور سماجی پہلوؤں کا باریک بینی سے جائزہ لے گی اور تمام اسٹیک ہولڈرز کی مشاورت سے ایک متفقہ اور مؤثر حکمت عملی تیار کرے گی۔سردارزادہ فیصل خان جمالی نے اس عزم کا اظہار کیا کہ حکومت زمینداروں کے مسائل کو سنجیدگی سے لے رہی ہے اور ان کی مکمل مشاورت سے تمام اقدامات اٹھائے جائیں گے تاکہ ترقیاتی کام شفاف اور منصفانہ انداز میں مکمل ہوں اور کسی کے ساتھ ناانصافی نہ ہو ہمارا مقصد لوگوں کو سہولیات فراہم کرنا جس کے لیے تمام دستیاب وسائل بروئے کار لائے جارہے ہیں
خبرنامہ نمبر3386/2025
بولان 07 2025: ڈپٹی کمشنر کچھی جہانزیب بلوچ نے ضلع بھر میں جاری انٹرمیڈیٹ امتحانات کے سلسلے میں مختلف امتحانی مراکز کا دورہ کیا، دورے کے دوران انہوں نے گرلز اور بوائز امتحانی مراکز کا تفصیلی جائزہ لیا اور وہاں جاری امتحانی عمل کے حوالے سے متعلقہ عملے سے آگاہی حاصل کی، ڈپٹی کمشنر نے امتحانی مراکز میں فراہم کردہ سہولیات، سیکیورٹی انتظامات، طلبہ کی حاضری اور نقل کی روک تھام کے اقدامات کا بغور معائنہ کیا، انہوں نے اس موقع پر امتحانی عملے کو ہدایت دی کہ امتحانات کے دوران شفافیت، دیانتداری اور نظم و ضبط کا خاص خیال رکھا جائے تاکہ طلبہ کو ایک پُرامن اور غیرجانبدار ماحول فراہم کیا جا سکے، ڈپٹی کمشنر جہانزیب بلوچ نے کہا کہ ضلعی انتظامیہ امتحانی عمل کو کامیاب بنانے کے لیے ہر ممکن تعاون فراہم کرے گی اور اس ضمن میں کسی قسم کی غفلت یا کوتاہی برداشت نہیں کی جائے گی۔
