وزیر تعلیم رانا سکندر حیات کی قیادت میں مختلف کالجز کے طلباء کی پاک فوج سے اظہار یکجہتی کیلئے “پاکستان زندہ باد طلباء ریلی” کا انعقاد کیا گیا جس میں وزیر تعلیم نے طلباء کے ہمراہ پاک فوج سے اظہار یکجہتی کے ساتھ ساتھ بھارتی جارحیت کی شدید الفاظ میں مذمت کی۔ ریلی سے خطاب کرتے ہوئے وزیر تعلیم نے کہا کہ بھارتی وزیر اعظم مودی کی اردو کمزور ہے شاید اسی لئے اسے ہماری امن کی زبان سمجھ نہیں آئی۔ وزیر تعلیم نے کہا کہ پاک فوج نے مودی کا غرور بھی طیاروں کے ساتھ زمین بوس کر دیا۔ جو پاکستان کو ایزی لے رہا تھا، اب ہیڈ لائنز میں اپنا تماشہ دیکھے۔ وزیر تعلیم نے کہا کہ پاک فوج کی جانب سے بھارتی شعلوں کا جواب دھوئیں میں لپیٹ کر دیا جا رہا ہے۔ انہوں نے کہا کہ پاکستان کے غیور فوجی جوانوں کی وجہ سے مودی کا غرور پاکستان کی فضاؤں میں ٹک نہیں سکا اور دشمن کے طیارے زمین بوس کر کے بھارتی غرور کا جنازہ فضا میں ہی نکال دیا۔ رانا سکندر حیات نے کہا کہ مودی کی ٹیوننگ ضروری ہو چکی ہے اب وہ ہمارا ہر جواب یاد رکھے گا۔ انہوں نے کہا کہ مودی کو لگ پتہ جائے گا کہ اسے غزہ نہیں پاکستان سے واسطہ پڑا ہے۔ وزیر تعلیم نے مزید کہا کہ مودی کو امن کی زبان سمجھانے کی بہت کوشش کی، لیکن اسے سمجھ نہیں آئی۔ ہم نے پہلے بھی کہا تھا ہمیں ایزی مت لینا، اب بھی کہہ رہے ہیں کہ مودی اپنی حرکتوں سے باز آ جائے ورنہ ہمارے سرپرائز کیلئے تیار رہے۔ انہوں نے کہا کہ مودی کو ایسی ایسی جگہوں سے حملے کا جواب ملے گا کہ وہ پچھتائے گا۔ وزیر تعلیم نے کہا کہ پاکستان غزہ نہیں ہے، یہاں کا ہر وار مودی پر بھاری ہوگا۔ انہوں نے کہا کہ مودی سرکار کو جنگ کا شوق ہے تو نتائج بھی برداشت کرنے پڑیں گے۔ وزیر تعلیم نے کہا کہ پاکستان نے دشمن کو چائے پلا کر اپنے اخلاق کا ثبوت دیا تھا لیکن دشمن نے کوئی سبق نہ سیکھا، اب اس کا ہاضمہ بھی خراب کر کے بھیجیں گے۔ انہوں نے کہا کہ پاکستان ایک فولادی دیوار ہے، یہ کسی بھی طرح بھارت کیلئے نرم ہدف نہیں ہے۔ طلباء ریلی ایم اے او کالج سے سول سیکرٹریٹ تک نکالی گئی۔ ریلی میں شرکاء نے پاک فوج سے اظہار محبت و یکجہتی پر مبنی سلوگن اٹھا رکھے تھے۔ طلباء اور دیگر شرکاء کی جانب سے پاک فوج کے شانہ بشانہ سرحدوں کے دفاع کے عزم کا بھی اظہار کیا گیا۔
