کراچی
مور خہ05 مئی 2025
مٹھی، چھاچھرو آر او پلانٹ فعال، اسلام کوٹ اور تھرپارکر کے آر او پلانٹس بھی جلد بحال کردیے جائیں گے۔ محمد سلیم بلوچ
چیئرمین بلاول بھٹو زرداری کی خصوصی ہدایت پر تھرپارکر، مٹھی، اسلام کوٹ و دیگر علاقوں کے عوام کو پینے کا صاف پانی پہنچایا جارہا ہے، محمد سلیم بلوچ
کراچی5 مئی ۔۔وزیر اعلیٰ سندھ کے معاون خصوصی برائے پبلک ہیلتھ انجینئرنگ و دیہی ترقی محمد سلیم بلوچ کی ہدایات اور کاوشوں سے طویل عرصے سے غیر فعال مٹھی شہر میں قائم سب سے بڑے آر او پلانٹ اور چھاچھرو آر او پلانٹ کو فعال کردیا گیا جبکہ اسلام کوٹ اور تھرپارکر کے آر او پلانٹس کو بھی جلد بحال کرنے کے لیے متعلقہ ایکسیئن انجینئر محمد فرخ کی نگرانی میں اقدامات کیے جارہے ہیں۔ معاون خصوصی محمد سلیم بلوچ کی خصوصی ہدایت پر مٹھی آر او پلانٹ کی بحالی کے بعد پلانٹ سے مٹھی کے ایسے علاقے جہاں پانی کی لائنیں موجود نہیں ہیں ان آبادیوں میں روزانہ کی بنیاد پر پانی کے گیلن او ٹنکیوں کے ذریعے لوگوں کو پینے کا صاف پانی فراہم کیا جا رہا ہے۔ محمد سلیم بلوچ نے متعلقہ ایکسیئن انجینئر محمد فرخ اور انکی ٹیم کو دن رات کام کرکے پلانٹ کی بحالی پر شاباش دی اور دیگر غیر فعال آر او پلانٹس کو بھی جلد بحال کرنے کی ہدایت دی۔ انھوں نے کہا کہ چیئرمین پیپلز پارٹی بلاول بھٹو زرداری کی خصوصی ہدایت ہے کہ تھرپارکر، مٹھی، اسلام کوٹ و دیگر دورافتادہ علاقوں میں جہاں پینے کے پانی کی قلت ہے وہاں عوام کو ہر صورت پانی پہنچانے کا بندوبست اور تمام آر اوز کو فعال کیا جائے جبکہ وزیر اعلی سندھ بھی آر اوز کی بحالی سے متعلق روزانہ کی بنیاد پر فالو اپ لے رہے ہیں۔ انھوں نے کہا کہ پاکستان پیپلز پارٹی کی قیادت عوام سے کیے گئے تمام وعدوں کی تکمیل کے لیے اقدامات کررہی ہے اور بہت جلد تمام وعدے شرمندۂ تعبیر ہونگے۔
ہینڈ آؤٹ 507۔۔۔۔ایس اے بی
کراچی
مور خہ05 مئی 2025
سندھ میں 15 جون سے پلاسٹک شاپنگ بیگز پر مکمل پابندی عائد، محکمہ ماحولیات کانوٹیفکیشن جاری
صرف اعلان نہیں عملدرآمدہوگا، خلاف ورزی پرسخت کارروائی ہوگی،سیکریٹری آغاشاہنواز کادوٹوک اعلان
کراچی5 مئی ۔سندھ حکومت نے ماحولیاتی آلودگی کے خاتمے کے لیے انقلابی قدم اٹھاتے ہوئے صوبے بھر میں تمام اقسام کے پلاسٹک شاپنگ بیگز پر مکمل پابندی عائدکردی ہے۔محکمہ ماحولیات، موسمیاتی تبدیلی و ساحلی ترقی کی جانب سے جاری کردہ نوٹیفکیشن کے مطابق 15 جون 2025 سے ہر قسم کے پلاسٹک شاپنگ بیگز کااستعمال ممنوع ہوگا۔ پابندی کا اطلاق نان ڈیگریڈیبل، اوکسو ڈیگریڈیبل، بلیک کلر اور ری سائیکلڈ پلاسٹک بیگز پر بھی ہوگا۔صوبائی کابینہ نے 15 اپریل 2025 کو ہونے والے اجلاس میں محکمہ ماحولیات سندھ کی سفارش پر یہ فیصلہ متفقہ طور پر منظور کیاتھا جس کے بعدسندھ حکومت نے”سندھ پرہیبیشن آف نان ڈیگریڈیبل پلاسٹک پروڈکٹس رولز 2014” میں ترمیم کرتے ہوئے تمام پلاسٹک شاپنگ بیگز پرپابندی عائد کی ہے۔ اس سے قبل 2019 میں پلاسٹک بیگز پر جزوی پابندی عائد کی تھی جس کے تحت مخصوص وزن اور سائز کے بیگز کی محدود اجازت تھی تاہم اب یہ مشروط اجازت بھی ختم کر دی گئی ہے۔ سیکریٹری ماحولیات آغا شاہنواز خان کا کہناہے کہ پلاسٹک بیگز ماحول دشمن ہیں سندھ حکومت نے عوامی مفاد میں تاریخی فیصلہ کیا ہے۔ہم آنے والی نسلوں کو صاف، سرسبز اور محفوظ ماحول دینا چاہتے ہیں۔ وقت آ گیا ہے کہ پلاسٹک سے ہمیشہ کے لیے جان چھڑائی جائے۔انہوں نے واضح کیا کہ خلاف ورزی پر سخت قانونی کارروائی ہوگی اور کسی قسم کی رعایت نہیں دی جائے گی۔اس فیصلے کو ماحولیاتی ماہرین، سول سوسائٹی اور شہریوں نے سراہتے ہوئے حکومت سندھ کے اقدام کو تاریخی قرار دیا ہے جبکہ سیکریٹری ماحولیات نے ضلعی انتظامیہ، صنعتکاروں، تاجروں اور شہریوں سے اس قومی مہم میں بھرپور کردار ادا کرنے کی اپیل کی ہے۔
ہینڈ آؤٹ 506۔۔۔۔ایم ڈبلیو
ملک کی مجموعی معاشی صورتحال کے بہتر ہونے میں سندھ کا بڑا کردار ہے۔ جام اکرام اللہ دھاریجو
کراچی ۔ 5 مئی۔ راولپنڈی چیمبر آف کامرس اینڈ انڈسٹریز کے وفد نے صوبائی وزیر برائے صنعت و تجارت جام اکرام اللہ دھاریجو سے ان کے دفتر میں ملاقات کی۔ وفد میں چیمبر آف کامرس اینڈ انڈسٹریز راولپنڈی کے صدر عثمان شوکت ، سینئر نائب صدر خالد فاروق قاضی اور دیگر عہدیدار بھی شامل تھے۔ اس موقع پر سیکرٹری صنعت و تجارت محمد یاسین شر بلوچ بھی موجود تھے۔ وفد کے اراکین نے راولپنڈی اور اس کے گردونواح میں صنعتی ترقی سے متعلق صوبائی وزیر برائے صنعت و تجارت جام اکرام اللہ دھاریجو کو اگاہی دی۔ اس موقع پر گفتگو کرتے ہوئے صوبائی وزیر برائے صنعت و تجارت جام اکرام اللہ دھاریجو نے کہا کہ ملک کی مجموعی معاشی صورتحال کے بہتر ہونے میں سندھ کا بڑا کردار ہے۔ ضرورت اس امر کی ہے کہ معاشی استحکام میں تواتر رکھا جائے۔ انہوں نے کہا کہ کراچی پاکستان کی معاشی ریڑھ ہڈی کی حیثیت رکھتا ہے۔ ہم سب نے مل کر سندھ سمیت پاکستان میں معاشی ترقی کرنی ہے۔ جام اکرام اللہ دھاریجو نے مذید کہا کہ پاکستان پیپلز پارٹی کے چیئرمین بلاول بھٹو زرداری کی ہدایت پر ہم نے بزنس کمیونٹی کو آن بورڈ لیا ہے۔ تاجر برادری کے مسائل کے حل کے لئے فیسیلٹیشن کمیٹی بنائی ہے۔ انہوں نے کہا کہ ہماری کوشش ہے کہ مسائل کے حل کے لئے تاجر برادری کے نمائندوں کو ساتھ رکھا جائے ۔ معاملات کو احسن طریقے سے آگے بڑھانے کے لئے حکومت اور تاجر برادری کے درمیان مضبوط روابط ضروری ہیں۔ صوبائی وزیر جام اکرام اللہ دھاریجو نے کہا کہ صنعت کاروں کے زیادہ تر مسائل وفاقی حکومت سے متعلق ہیں۔ دو ہزار ایکڑ پر مشتمل صنعتی زون پبلک پرائیویٹ پارٹنرشپ کے تحت بنایا جارہا ہے۔ صوبائی وزیر برائے صنعت و تجارت جام اکرام اللہ دھاریجو نے راولپنڈی کے تاجروں کو پبلک پرائیویٹ پارٹنرشپ منصوبوں کے بارے میں اگاہی دی۔ انہوں نے کہا کہ سندھ اور پنجاب کی تاجر برادری مل کر اپنے مسائل کے حل کے لئے کوشش کریں۔
