امن کی خواہش کو کمزوری نہ سمجھا جائے، بھارت کی کسی بھی مہم جوئی کا بھرپور طاقت سے جواب دیا جائے گا، پاکستان کا پانی روکنے کی کوشش کو جنگی اقدام سمجھا جائے گا،

وفاقی وزیر اطلاعات ۔ ۔۔غیر ملکی میڈیا بریفنگ
امن کی خواہش کو کمزوری نہ سمجھا جائے، بھارت کی کسی بھی مہم جوئی کا بھرپور طاقت سے جواب دیا جائے گا، پاکستان کا پانی روکنے کی کوشش کو جنگی اقدام سمجھا جائے گا، عطاء اللہ تارڑ

اسلام آباد۔27اپریل :وفاقی وزیر اطلاعات و نشریات عطاء اللہ تارڑ نے کہا ہے کہ پہلگام واقعہ پر پاکستان کا موقف واضح ہے، امن کی خواہش کو ہماری کمزوری نہ سمجھا جائے، پاکستان اپنی سالمیت اور خودمختاری کا دفاع کرنا جانتا ہے، کسی بھی مہم جوئی کا بھرپور طاقت سے جواب دیا جائے گا، بھارت خود ریاستی دہشت گردی میں ملوث ہے جس کے ناقابل تردید ثبوت موجود ہیں، مقبوضہ کشمیر میں بھارتی سیکورٹی فورسز کی موجودگی کے باوجود پہلگام واقعہ ہونا شرمناک ہے، واقعہ کے فوری بعد ایف آئی آر کا اندراج اس بات کا ثبوت ہے کہ یہ سازش پہلے سے تیار کی گئی تھی، پہلگام واقعہ کی آڑ میں پاکستان کا پانی روکنے کی کسی بھی کوشش کو جنگی اقدام سمجھا جائے گا۔ اتوار کے روز یہاں غیر ملکی میڈیا نمائندگان کو پہلگام واقعہ پر بریفنگ دیتے ہوئے وفاقی وزیر اطلاعات نے کہا کہ پہلگام واقعہ پر پاکستان کا موقف واضح ہے۔ انہوں نے کہا کہ پاکستان خود دہشت گردی سے سب سے زیادہ متاثرہ ملک ہے، ہم دہشت گردی کے خلاف فرنٹ لائن اسٹیٹ ہیں، کسی دوسرے ملک نے آج تک دہشت گردی کے خلاف جنگ میں 90 ہزار جانوں کی قربانی نہیں دی۔ انہوں نے کہا کہ پاکستان دہشت گردی کے خلاف جنگ کا خمیازہ بھگت رہا ہے۔ ہماری مسلح افواج، قانون نافذ کرنے والے ادارے، پولیس، رینجرز، عام شہری اور سول سوسائٹی نے دہشت گردی کی جنگ میں بہت قربانیاں دی ہیں جو پاکستان اور عالمی امن کے لئے ہیں۔ انہوں نے کہا کہ دہشت گردی کی جنگ میں ہماری معیشت کو اربوں ڈالر کا نقصان ہوا اور ہم آج تک ان دہشت گردوں ”فتنہ الخوارج“ کا مقابلہ کر رہے ہیں۔ وفاقی وزیر اطلاعات نے کہا کہ پاکستان نے ہمیشہ دہشت گرد گروپوں اور دہشت گردوں کے خلاف کارروائی کی، ہم روزانہ کی بنیاد پر یہ ذمہ داری نبھا رہے ہیں۔ خیبر پختونخوا، بلوچستان میں صورتحال اور حال ہی میں جعفر ایکسپریس سانحہ سب کے سامنے ہے۔ انہوں نے کہا کہ جعفر ایکسپریس واقعہ میں معصوم شہریوں کو یرغمال بنایا گیا، ہماری سیکورٹی فورسز نے ان دہشت گردوں کا بہادری سے مقابلہ کیا۔ انہوں نے کہا کہ جعفر ایکسپریس واقعہ کی دنیا بھر نے مذمت کی لیکن ہمارے مشرق میں ہمارے پڑوسی ملک نے جعفر ایکسپریس واقعہ کی کیوں مذمت نہیں کی؟ انہوں نے سوال کیا کہ ایسا کیوں ہوتا ہے کہ جب بھی پاکستان دہشت گردی کا سامنا یا دہشت گردوں کا مقابلہ کرتا ہے، ہمارے بے گناہ شہریوں اور مسلح افواج کے افسران اور جوانوں کا خون بہتا ہے تو مشرقی ہمسایہ ان واقعات پر خوشی مناتا ہے۔ اس کے پیچھے کیا کوئی وجہ ہے؟ انہوں نے کہا کہ بھارت خود ریاستی سطح پر دہشت گردی میں ملوث ہے۔ اگر ہم نے کلبھوشن یادیو کو گرفتار نہ کیا ہوتا تو یہ حقیقت شاید ہی منظر عام پر آتی۔ کلبھوشن یادیو بھارتی نیوی کا افسر تھا اور پاکستان میں جاسوسی اور دہشت گردی کی سرگرمیوں سمیت دہشت گردوں کو پناہ دینے اور ان کی مدد کرنے میں ملوث تھا۔ انہوں نے کہا کہ دہشت گردوں کو ہماری مشرقی سرحد سے فنڈنگ، اسلحہ اور گولہ بارود ملتا ہے، یہی وجہ ہے کہ جب دہشت گرد حملہ کرتے ہیں، جعفر ایکسپریس جیسی دہشت گردی کی وارداتیں ہوتی ہیں تو مشرقی ہمسایہ ایسی کارروائیوں کی مذمت نہیں کرتا اور ان واقعات پر تشویش کا اظہار کرنے کا حوصلہ بھی نہیں رکھتا۔ وفاقی وزیر اطلاعات نے کہا کہ بھارتی ریاستی دہشت گردی کے تحت کینیڈا اور امریکہ سمیت دنیا بھر میں سکھ رہنمائوں کو قتل کیا جا رہا ہے۔ ایک ریاست جو دنیا بھر میں اقلیتوں پر ظلم و ستم کرتی ہے اور ان کے قتل میں ملوث ہے، سکھ رہنمائوں کے قتل میں بھارتی حکومت کے ملوث ہونے کے شواہد دیگر ممالک نے فراہم کئے۔ وفاقی وزیر اطلاعات نے کہا کہ بھارت دنیا بھر میں دہشت گردی کے واقعات میں ملوث ہے۔ پاکستان میں دہشت گردی کے واقعات میں بھارت کے ملوث ہونے کے ناقابل تردید ثبوت موجود ہیں۔ پہلگام واقعہ کے بارے میں انہوں نے کہا کہ پہلگام کا واقعہ پاکستان کی مغربی علاقوں میں دہشت گردوں کے خلاف حاصل کی گئی کامیابیوں سے توجہ ہٹانے کی کوشش معلوم ہوتا ہے۔ ہر دوسرے دن آپ کامیاب آپریشنز کی خبریں سنتے ہیں، ہماری مسلح افواج نے دہشت گردوں کے خلاف بہت کامیابیاں حاصل کی ہیں، پہلگام واقعہ ان کامیابیوں سے توجہ ہٹانے کی کوشش ہو سکتی ہے۔ پہلگام کا علاقہ ہماری سرحد سے 150 کلو میٹر سے زیادہ دور ہے، پھراس کا الزام پاکستان پر کیوں؟ کیا بھارت کے پاس کوئی قابل اعتماد شواہد ہیں؟ کیا کوئی ایسا موقف ہے جو شواہد سے ثابت ہو؟ انہوں نے کہا کہ پہلگام واقعہ کے 10 منٹ بعد ایف آئی آر درج کی گئی جو اس بات کا ثبوت ہے کہ یہ سازش پہلے سے تیار کی گئی تھی۔ وفاقی وزیر نے کہا کہ پاکستان ایک ذمہ دار اور پرامن ملک ہے، ہمارے اپنے ہمسایوں کے ساتھ اچھے تعلقات ہیں۔ ہم عالمی امن کے لئے اپنا کردار ادا کرتے رہیں گے۔ لندن میں پاکستانی سفارت خانہ پر حملے کا ذکر کرتے ہوئے وفاقی وزیر نے کہا کہ پاکستانی سفارت خانہ پر حملہ بھارتی حکومت کی انتہاء پسندانہ سوچ کی عکاسی کرتا ہے۔ انہوں نے کہا کہ امن کی خواہش کو کمزوری نہ سمجھا جائے، پاکستان اپنی سالمیت اور خودمختاری کا دفاع کرنا جانتا ہے، کسی بھی مہم جوئی کا بھرپور طاقت سے جواب دیا جائے گا۔ انہوں نے کہا کہ بھارتی دہشت گردی پر پوری پاکستانی قوم متحد اور یک زبان ہے جبکہ پہلگام واقعہ کے حوالے سے بھارت کے اندر سے آوازیں اٹھ رہی ہیں۔ وفاقی وزیر نے کہا کہ مقبوضہ کشمیر میں 8 سے 9 لاکھ بھارتی قابض فوج موجود ہے، سوال پیدا ہوتا ہے کہ اتنی سیکورٹی فورسز کی موجودگی میں کس طرح پہلگام واقعہ پیش آیا، سیکورٹی فورسز کی موجودگی کے باوجود پہلگام واقعہ ہونا شرمناک ہے۔ سندھ طاس معاہدے کا ذکر کرتے ہوئے انہوں نے کہا کہ پہلگام واقعہ کی آڑ میں پاکستان کا پانی روکنے کی کوشش کی جا رہی ہے، بھارت کی جانب سے سندھ طاس معاہدہ معطل کرنا بچگانہ اور غیر سنجیدہ حرکت ہے۔ پاکستان کا پانی روکنے کی کسی بھی کوشش کو جنگی اقدام سمجھا جائے گا۔ انہوں نے کہا کہ عالمی قوانین کے مطابق سندھ طاس معاہدہ یکطرفہ طور پر ختم نہیں کیا جا سکتا۔ انہوں نے کہا کہ بھارت کے اس پورے ڈرامہ میں پاکستان نے انتہائی ذمہ داری کا مظاہرہ کیا، ہم امن پر یقین رکھتے ہیں، پاکستان دہشت گردی کے خلاف جنگ میں فرنٹ لائن اسٹیٹ ہے۔ انہوں نے کہا کہ پاکستان نے اس پوری صورتحال کے تناظر میں پہلگام واقعہ کی غیر جانبدارانہ تحقیقات میں تعاون کی پیشکش کی ہے۔ وفاقی وزیر نے کہا کہ پاکستان کسی بھی مس ایڈونچر کا بھرپور جواب دے گا۔ انہوں نے کہا کہ بھارت کا پروپیگنڈا بے نقاب ہو چکا ہے، بھارت میں اقلیتوں نے بھی کہا ہے کہ وہ پاکستان کے خلاف نہیں۔ انہوں نے کہا کہ سکھ رہنمائوں نے بھی مودی حکومت پر سوالات اٹھائے ہیں۔ وفاقی وزیر نے کہا کہ علاج کے لئے بھارت جانے والے پاکستانیوں کو ملک چھوڑنے کا کہا جا رہا ہے، کیا ان میں انسانیت نہیں ہے، بھارت نے ہمیشہ انسانی حقوق کی خلاف ورزیاں کی ہیں۔ انہوں نے کہا کہ بھارت جیلوں میں قید پاکستانیوں کو ماورائے عدالت قتل کر رہا ہے، غلطی سے سرحد پار کرنے والے لوگوں کو بارڈر پر قتل کیا جا رہا ہے۔ بھارت انسانی حقوق کی مسلسل خلاف ورزیاں کر رہا ہے۔ انہوں نے کہا کہ پاکستان کسی بھی مس ایڈونچر کا بھرپور جواب دے گا جس طرح ہم نے ماضی میں کیا۔ عطاء اللہ تارڑ نے کہا کہ ہم مہمان نواز قوم ہیں، پلوامہ حملے کے بعد بھی بھارتی پائلٹ کو چائے پلا کر واپس بھیجا تھا۔ ایک سوال کے جواب میں وفاقی وزیر اطلاعات نے کہا کہ موجودہ صورتحال کے تناظر میں سفارتی محاذ پر گفتگو ہوئی، نائب وزیراعظم نے دوست ممالک کے رہنمائوں سے رابطے کئے، ہمارے دوست ممالک کے ساتھ اچھے تعلقات ہیں۔ انہوں نے کہا کہ بھارت نے عجلت میں پاکستان پر الزام عائد کیا۔ ایک اور سوال کے جواب میں انہوں نے کہا کہ کلبھوشن یادیو پاکستان کی حراست میں ہیں جو بھارتی نیوی کے افسر تھے۔ انہوں نے کہا کہ پاکستان میں دہشت گردی کے بہت سے واقعات میں بھارت کے ملوث ہونے کے ناقابل تردید شواہد موجود ہیں ۔ انہوں نے کہا کہ انڈیا نے فالس فلیگ آپریشن کے فوری بعد پاکستان پر الزام عائد کیا اور کوئی تحقیقات نہیں کی۔ قانونی طور پر پہلگام واقعہ کی آڑ میں بھارت نے سندھ طاس معاہدہ معطل کرنے کی ناکام کوشش کی ہے۔ ایک اور سوال کے جواب میں انہوں نے کہا کہ دہشت گردی کے حوالے سے پاکستان کی کوششوں کو عالمی سطح پر تسلیم کیا گیا ہے۔ انہوں نے کہا کہ پہلگام ڈرامہ پر بھارت کو کسی کی حمایت حاصل نہیں جبکہ پاکستان نے ذمہ داری کا مظاہرہ کرتے ہوئے پہلگام واقعہ میں غیر جانبدارانہ تحقیقات کی پیشکش کی ہے۔

وزیراعظم۔۔۔خراج تحسین
وزیراعظم شہباز شریف کی حسن خیل میں فتنتہ الخوارج کے دہشت گردوں کی در اندازی ناکام بنانے پر سیکیورٹی فورسز کی تحسین

لاہور۔27اپریل :وزیراعظم محمد شہباز شریف نے صوبہ خیبر پختونخوا کے ضلع شمالی وزیرستان کے علاقے حسن خیل میں افغانستان سے فتنتہ الخوارج کے دہشت گردوں کی در اندازی ناکام بنانے پر سیکیورٹی فورسز کی تحسین کی ہے۔ اس آپریشن میں 54 خوارجی دہشت گردوں کو ہلاک کیا گیا ہے۔اتوار کو وزیر اعظم آفس کے میڈیا ونگ سے جاری بیان کے مطابق وزیر اعظم نے اس کامیاب آپریشن پر سیکیورٹی فورسز کو خراج تحسین پیش کرتے ہوئے کہا کہ سیکیورٹی فورسز نے شاندار پیشہ ورانہ مہارت کا مظاہرہ کرتے ہوئے دہشت گردوں کو بر وقت روکا۔ وزیراعظم نے کہا کہ دہشت گردی کے خلاف جنگ میں پوری قوم سیکیورٹی فورسز کے ساتھ کھڑی ہے،پاکستان کی سیکیورٹی فورسز ملک کی سرحدوں کے دفاع اور دہشت گردی کی لعنت کے خاتمے کے لیے اپنے عزم میں غیرمتزلزل ہیں۔ وزیر اعظم نے کہا کہ یہ کامیاب کارروائیاں اس بات کی نشاندہی کرتی ہیں کہ پاکستان دہشت گردی کے خلاف جنگ جیت رہا ہے اور دہشت گردوں کے خلاف اہم کامیابیاں حاصل کر رہا ہے۔
۔۔۔۔۔۔۔۔۔۔۔
————-

قومی
وزیر داخلہ۔۔پریس کانفرنس
سکیورٹی فورسز نے افغانستان سے خوارج کی دراندازی کی کوشش نا کام بنا کر 54 خوارج ہلاک کر دئیے ،محسن نقوی

لاہور۔27اپریل :وفاقی وزیر داخلہ محسن نقوی نے کہا ہے کہ پاکستان کی سکیورٹی فورسز نے افغانستان سے خوارج کی دراندازی کی کوشش نا کام بنا دی،آپریشن کے دوران 54 خوارج ہلاک کردیئے گئے ، ملک دشمنوں کی تمام سازشوں کو ناکام بنائیں گے ،بیرونی آقاﺅں نے خوارج کودہشت گردی کیلئے پاکستان بھیجا۔ ان خیالات کا اظہار انہوں نے اتوار کے روز یہاں پریس کانفرنس کرتے ہوئے کیا۔وفاقی وزیر داخلہ محسن نقوی نے کہا کہ ہمارے لیے بڑا دن ہے، سکیورٹی فورسز نے شمالی وزیر ستان کے علاقے میں افغانستان سے خوارج کی پاکستان میں دراندازی کی کوشش نام بنا دی اور کامیاب آپریشن کر کے 54 خوارج ہلاک کر دئیے ۔ انہوں نے کہا کہ سکیورٹی فورسز کو اس حملے کی بروقت اطلاع مل گئی تھی جس کے بعد سکیورٹی فورسز نے اپنی بہتر حکمت عملی کے تحت انہیں تین اطراف سے گھیر کر خوارجیوں کو ہلاک کیا، یہ اب تک جہنم رسید ہونے والے خوارجیوں کی سب سے بڑی تعداد ہے۔ وفاقی وزیر داخلہ نے کہا کہ ہمارے پاس یہ معلومات کچھ دن سے تھیں کہ ان کے بیرونی آقا ان پر زور ڈال رہے تھے کہ یہ جلدازجلد پاکستان میں گھس کر کوئی دہشت گردانہ سرگرمی انجام دیں، انہی معلومات کی بنیاد پر سرحدوں پر نگرانی اور چیکنگ سخت کردی گئی تھی اور اسی دوران ان خوارجیوں کی نشاندہی ہوگئی۔ محسن نقوی نے کہا کہ اللہ تعالی کا شکر ہے کہ بھارت جو بھی قدم اٹھارہا ہے وہ کہیں نہ کہیں پکڑا جارہا ہے، فتنہ خوارج پر بھی وہیں(بھارت )سے زور ڈالا جارہا تھا کہ پاکستان میں داخل ہوکر دہشت گردی کریں۔انہوں نے کہا کہ آئی ایس پی آر نے جو تصاویر شیئر کی ہیں ان میں ان 54 دہشت گردوں کی لاشیں پڑی ہوئی دیکھی جاسکتی ہیں اور یہ دنیا کے لیے بہت بڑا ثبوت ہے کہ کوئی تو ان دہشت گردوں کی پشت پناہی کررہا ہے، ان کا کوئی تو مقصد ہے اور آج اس واقعے کے بعد ہم اور زیادہ پریقین ہوگئے ہیں پاکستان کو کس کی وجہ سے نقصان پہنچ رہا ہے۔وفاقی وزیرداخلہ نے کہا کہ اس آپریشن کے لیے پاکستان کی تمام سکیورٹی فورسز کریڈٹ کی حقدار ہیں، قومی سلامتی کمیٹی کے اجلاس میں اس پر بات ہوئی تھی کہ ہماری کامیابیوں کو کس طرح ڈی ریل کرنے اور مغربی سرحد سے توجہ ہٹانے کی کوشش کی جارہی ہے تاکہ ان لوگوں ( دہشت گردوں)کو ری گروپنگ کی مہلت مل سکے اور یہ دوبارہ سے مضبوط ہوکر ہم پر حملہ آور ہوسکیں۔محسن نقوی نے کہا کہ پچھلے کچھ عرصے سے ان (دہشت گردوں ) کے پاﺅں مسلسل اکھڑ رہے ہیں، پچھلے دو ہفتوں میں مارے جانے اور گرفتار ہونے والے دہشت گردوں کی تعداد میں اضافہ ہوا ہے۔وزیرداخلہ نے کہا کہ آئندہ بھی دہشت گرد کہیں سے بھی آنے اور دہشت گردی کرنے کی کوشش کریں گے تو ان کو اسی طرح پکڑا اور مارا جائے گا۔انہوں نے کہا کہ پاک افواج ہر لمحہ چوکس ہیں اور نظر رکھے ہوئے ہیں اور اگر پھر کوئی کوشش ہوئی تو بھارت کو پتا چلے گا کہ کیسے جواب دیا جاتا ہے۔ ایک سوال کے جواب میں انہوں نے کہا کہ بھارت کے منفی ہتھکنڈوں سے متعلق عالمی برادری کو آگاہ کر رہے ہیں ،سب کو پتہ ہے کہ دہشت گردوں کو فنڈنگ کون کر رہا ہے، مختلف شہروں سے اب تک 8دیسی ساختہ بارودی سرنگیں پکڑی گئی ہیں۔ ایک اور سوال کے جواب میں وفاقی وزیر نے کہا کہ اگر بھارت نے پاکستان کے ساتھ کسی قسم کی چھیڑ خانی کی تو اس کو بھر پور جواب دیا جائے گا ،اس حوالے سے حکومت ،پاک افواج اور پوری پاکستانی قوم ایک پیج پر ہیں، پاکستان کے خلاف سازشوں کو ناکام بنائیں گے۔انہوں نے کہا کہ پہلگام واقعہ کی شفاف انکوائری اگر کوئی نیوٹرل ادارہ کرتا ہے تو پاکستانی حکومت اس کے ساتھ مکمل تعاون کرنے کو تیار ہے ،ہمیں بھارت پر بالکل کوئی اعتبار نہیں۔ ایک سوال کے جواب میں انہوں نے کہا کہ ہلاک شدہ خوارجیوں سے بھاری تعداد میں اسلحہ اور بارودی مواد برآمد ہوا ہے ، ایسا معلوم ہوتا ہے کہ وہ پاکستان کے ساتھ جنگ کرنے کیلئے پوری تیاری کے ساتھ آ رہے تھے۔انہوں نے کہا کہ جو بھی پاکستان کے خلاف سازشیں کر رہا ہے اس کیلئے کوئی معافی نہیں، نہ پاکستان کے آ ئین اور نہ اسلام میں اس کیلئے معافی کی کوئی گنجائش ہے۔
۔۔۔۔۔۔۔۔۔۔۔۔
خواجہ محمد آصف۔۔۔بھارت وارننگ
پوری قوم مسلح افواج کے ساتھ متحد ہے، منہ توڑ جواب دیں گے، خواجہ محمد آصف

اسلام آباد۔27اپریل :وفاقی وزیر دفاع خواجہ محمد آصف نے کہا ہے کہ پورا پاکستان اپنی مسلح افواج کے ساتھ متحد ہے اور مودی سرکار کو ایسا ہی سخت جواب دیا جائے گا جیسا کہ ہم نے پلوامہ واقعے میں دیا تھا۔اتوار کو اپنے ایک انٹرویو میں خواجہ آصف نے زور دے کر کہا کہ قوم اپنی مسلح افواج کے ساتھ متحد ہے اور کسی بھی جارحیت کے خلاف مضبوط موقف اختیار کرے گی۔انہوں نے خبردار کیا کہ دو ایٹمی طاقتوں کے درمیان تصادم علاقائی اور عالمی امن کے لیے اہم خطرہ بن جائے گا۔ خواجہ محمد آصف نے مزید کہا کہ یہ معاملہ عالمی برادری کی توجہ میں لایا گیا ہے، جو تحقیقات کا آغاز کر سکتی ہے۔ انہوں نے مزید کہا کہ اگر مودی نے کشیدگی بڑھانے کا انتخاب کیا تو ہم گھر تک ان کا پیچھا کریں گے۔انہوں نے کہا کہ مودی جھوٹا پروپیگنڈہ پھیلانے کے لیے جانا جاتا ہے، وہ وہی حربے دہراتے ہیں جو پلوامہ کے دوران استعمال کیے گئے تھے تاہم پاکستان موثر جواب دینے کے لیے تیار ہے۔ ایک سوال کے جواب میں انہوں نے دوٹوک الفاظ میں کہا کہ پاکستانی قوم اور مسلح افواج ملکی خودمختاری کے دفاع کے لیے تیار ہیں اور اس اصول پر کوئی سمجھوتہ نہیں کیا جائے گا۔انہوں نے بھارتی میڈیا کی غلط معلومات پر مبنی مہمات کا مو ¿ثر طریقے سے مقابلہ کرنے اور سچائی کو سامنے لانے پر پاکستانی میڈیا کی بھی تعریف کی۔ایک اور سوال کے جواب میں وفاقی وزیر نے کہا کہ پاکستان اپنے ہمسایہ ممالک کے ساتھ باقاعدہ روابط برقرار رکھتا ہے۔
۔۔۔۔۔۔۔۔۔۔۔۔۔
وفاقی وزیر انجینئر امیر مقام۔۔۔خطاب
خیبرپختونخوا کے عوام اپنی فوج کے شانہ بشانہ کھڑے ہیں، انڈیا کی ہر دھمکی اور ہر سازش کا بھرپور جواب دینے کیلئے تیار ہیں، وفاقی وزیر انجینئر امیر مقام

سوات۔ 27 اپریل :وفاقی وزیر امور کشمیر، گلگت بلتستان و سیفران انجینئر امیر مقام نے کہا ہے کہ خیبرپختونخوا کے عوام اپنی فوج کے شانہ بشانہ کھڑے ہیں، پختون اپنے وطن کے دفاع کےلئے صف اول میں کھڑے ہوں گے، انڈیا کا سندھ طاس معاہدے کو ختم کرنے کا بیان احمقانہ ہے، یہ ایک عالمی معاہدہ ہے اس کو یک طرفہ ختم نہیں کیا جاسکتا، ہم انڈیا کی ہر دھمکی اور ہر سازش کا بھرپور جواب دینے کےلئے تیار ہیں، پاکستان مسلم لیگ (ن) کی قیادت نے ہمیشہ سیاست پر ملک کے مفاد کو ترجیح دی ہے۔ سوات میں عوامی اجتماع سے خطاب کرتے ہوئے صدر پاکستان مسلم لیگ (ن) خیبر پختونخوا انجینئر امیر مقام نے کہا کہ آج کے جلسے میں ہزاروں افراد کی شرکت پر یہاں کی قیادت کو خراج تحسین پیش کرتا ہوں۔ درجنوں خاندانوں کی پاکستان مسلم لیگ (ن) میں شمولیت پر ان کو اور ان کے خاندان والوں کو مبارکباد اور ان کو پارٹی میں شامل ہونے پر خوش آمدید کہتا ہوں۔ وفاقی وزیر نے کہا کہ مٹہ سوات سے آج تبدیلی کی جو ہوا چلی ہے انشائ اللہ یہ آگے پورے صوبے میں پھیل کر انقلاب لیکر آئے گی۔ انہوں نے کہا کہ سوات میں گیس کی جو پائپ لائن آج موجود ہے یہ پاکستان مسلم لیگ (ن) کی مرہونِ منت ہے۔ سوات میں گریڈ اسٹیشنز کا قیام بھی پاکستان مسلم لیگ (ن) کا کارنامہ ہے، مٹہ میں گریڈ اسٹیشن کے قیام کےلئے یہاں پر جو سیکشن فور لگا تھا وہ سابق وزیراعلیٰ نے ختم کیا تھا۔ وفاقی وزیر انجینئر امیر مقام نے کہا کہ خیبر پختونخوا اور سابقہ فاٹا کے عوام نے پہلے بھی پاکستان کے دفاع کےلئے ہر اول دستے کا کردار ادا کیا اور اب بھی تمام پختون اپنے وطن کے دفاع کےلئے صف اول میں کھڑے ہوں گے۔ انہوں نے کہا کہ انڈیا کی جانب سے بغیر تحقیق اور تفتیش کے پاکستان پر الزام لگانے کی شدید مذمت کرتے ہیں۔ پانچ اگست 2019 کو کشمیر کا جو اسٹیٹس تبدیل کیا ہم اس کو نہ مانے اور نہ مانیں گے۔ وفاقی وزیر نے کہا کہ بھارت کا سندھ طاس معاہدے کو ختم کرنے کا بیان احمقانہ ہے، یہ ایک عالمی معاہدہ ہے اس کو یک طرفہ ختم نہیں کیا جاسکتا۔ انجینئر امیر مقام نے کہا کہ خیبر پختونخوا کے عوام اپنی فوج کے شانہ بشانہ کھڑے ہیں۔ انہوں نے کہا کہ 28 مئی کو ایٹمی دھماکے کرنے والے آج بھی موجود ہیں اور پاک فوج بھی موجود ہے، ہم آپ کو اسی طرح جواب دینگے جس طرح 28 مئی کو آپ کے ایٹمی دھماکوں کا جواب دیا تھا،اگر آپ انسانیت کی بات کرتے ہیں کلبھوشن یادیو کی گرفتاری پر تو آپ لوگوں نے تو ایک لفظ بھی نہیں بولا، بھارت نہ صرف پاکستان بلکہ پوری دنیا میں دہشتگردی میں ملوث پایا گیا ہے۔ وفاقی وزیر نے کہا کہ یہ ہم پر دباو ¿ ڈالنے کی کوشش کررہے ہیں کہ پاکستانی حکومت اور عوام کشمیر کی حمایت سے دستبردار ہو جائیں لیکن ہم کل بھی کشمیریوں کیساتھ کھڑے تھے آج بھی کھڑے ہیں اور کل بھی کھڑے رہیں گے۔ انہوں نے کہا کہ نواز شریف کی پارٹی کی آج بھی پاکستان میں حکومت ہے ، ہم انڈیا کی ہر دھمکی اور ہر سازش کا بھرپور جواب دینے کےلئے تیار ہیں۔ انجینئر امیر مقام نے کہا کہ پی ٹی آئی کا ایجنڈا ملک کی تباہی کا ہے اب عوام جان گئے ہیں اور محسوس کررہے ہیں کہ پاکستان کو ترقی دینے والے کون ہیں اور اس کو بربادی کی طرف لے جانے والے کون ہیں۔ ہمارے صوبے کے جوان بھی اس صوبے پر بارہ سال حکومت کرنے والوں کی حقیقت کو جان گئے ہیں وہ اب پاکستان مسلم لیگ (ن) کیطرف آرہے ہیں۔ وفاقی وزیر نے کہا کہ دیوالیہ پن کا شکار ملکی معیشت ایک سال میں شہباز شریف کی قیادت میں ایک بار پھر ترقی کی راہ پر گامزن ہوگئی ہے، مہنگائی کی شرح 40 فیصد سے کم ہوکر 1.5 پر آگئی ہے۔ پاکستان مسلم لیگ (ن) کی قیادت نے ہمیشہ سیاست پر ملک کے مفاد کو ترجیح دی ہے۔ وفاقی وزیر انجینئر امیر مقام نے کہا کہ مجھ پر کئی حملے ہوئے مگر اس کے باوجود میں میدان میں کھڑا رہا اور ہمیشہ مظلوم کا ساتھ دیا ہے، جہاں بھی کسی کیساتھ زیادتی ہوتی ہے میں ان کیساتھ کھڑا ہوا۔ انہوں نے کہا کہ ہم نے ہر مشکل میں خواہ وہ دہشتگردی ہو،سیلاب یا زلزلہ، اپنے عوام کا ساتھ دیا ہے اور آئندہ بھی دیں گے۔ \932

وزیرداخلہ۔۔ملاقات
وفاقی وزیرداخلہ سے غیر ملکی سرمایہ کاروں کے وفدکی ملاقات، پاکستان سرمایہ کاری کیلئے محفوظ ملک ہے،محسن نقوی

لاہور۔27اپریل :وفاقی وزیرداخلہ محسن نقوی سے اتوار کوغیر ملکی سرمایہ کار کمپنیوں کے وفد نے یہاں ملاقات کی جس میں سرمایہ کاروں کے تحفظ اور سرمایہ کاری کو محفوظ بنانے کیلئے کئے گئے اقدامات پر تبادلہ خیال کیا گیا،وزیر داخلہ وفد کوہر ممکن تعاون فراہم کرنے کی یقین دہانی کرائی۔ ملاقات کے دوران گفتگو کرتے ہوئے وفاقی وزیرداخلہ محسن نقوی نے کہا کہ پاکستان میں سرمایہ کاری کرنے والے انویسٹرز کا تحفظ حکومت کی اولین ترجیح ہے۔انہوں نے کہا کہ پاکستان میں سر مایہ کاری کیلئے ماحول محفوظ اورساز گار ہے جبکہ سرمایہ کار پاکستان میں بلا ہچکچاہٹ کسی بھی شعبہ میں سرمایہ کاری کر سکتے ہیں ،سرمایہ کاروں کے تحفظ کی ذمہ داری ہر صورت پوری کرینگے۔وزیر داخلہ نے کہا کہ حکومت نے ملک میں اندرونی و بیرونی سرمایہ کاری کے فروغ کیلئے تمام تر اقدامات کر رکھے ہیں۔انہوں نے کہا کہ حکومت نے ملک میں دہشت گردی کے واقعات کرنے والے بعض شرپسندوں کے حملوں کا سخت نوٹس لیا ہے اور ملزمان کے خلاف قانون کے مطابق کارروائی بھی کی جا رہی ہے جبکہ مستقبل میں ایسے واقعات کی روک تھام کیلئے حکمت عملی وضع کر لی گئی ہے۔محسن نقوی نے مزید کہا کہ ہمارا دین اسلام امن و آشتی کا درس دیتا ہے۔وفد نے مسائل کے حل کیلئے یقین دہانی پر وزیر داخلہ محسن نقوی کا شکریہ ادا کیا۔