مبارک ولیج میں اسکول کی چھت گرنے کا افسوسناک واقعہ، فوری مرمت کا مطالبہ
کراچی (27 اپریل 2025): ہفتہ کی صبح 7 بجکر 42 منٹ پر گورنمنٹ بوائز سیکنڈری اسکول (GBSS) مبارک ولیج کی بلڈنگ کے کمرہ نمبر 3 کی چھت اچانک گر گئی، جب بچے اپنی کلاس میں داخل ہو رہے تھے۔ خوش قسمتی سے اس حادثے میں کوئی جانی نقصان نہیں ہوا، تاہم کلاس روم کی کرسیاں، میزیں اور ڈیسک مکمل طور پر تباہ ہو گئیں۔
یہ واقعہ کوئی پہلا نہیں ہے۔ گزشتہ روز بھی اسکول کی ایک اور بلڈنگ کی چھت سے بڑا ملبہ گرا تھا، جس میں بھی اللہ کے کرم سے کوئی جانی نقصان نہیں ہوا۔ اسکول کی چھتیں، چھجے اور دیگر حصے مسلسل ملبہ گرا رہے ہیں، جس کی وجہ سے طلبہ اور اساتذہ کی زندگیاں شدید خطرے میں ہیں۔
والدین اور مقامی کونسلر سرفراز ہارون کی جانب سے متعدد بار متعلقہ حکام کو صورتحال سے آگاہ کیا گیا، مگر افسوس کہ کوئی عملی قدم نہیں اٹھایا گیا۔ آئے روز ملبے کے گرنے کے واقعات سے بچے شدید خوفزدہ ہو چکے ہیں اور خدشہ ہے کہ اگر فوری مرمت کا کام نہ کیا گیا تو کوئی بڑا سانحہ رونما ہو سکتا ہے۔
والدین اور مقامی نمائندوں نے زور دیا ہے کہ اسکول کی عمارت کی فوری مکمل مرمت کی جائے تاکہ طلبہ اور اساتذہ کو کسی جانی و مالی نقصان سے محفوظ رکھا جا سکے۔ بصورت دیگر کسی بھی ناخوشگوار واقعے کی تمام تر ذمہ داری SEF، AHF اور سندھ ایجوکیشن ڈیپارٹمنٹ پر عائد ہوگی۔
