25 اپریل 2025
راولپنڈی
آل پاکستان پرائیویٹ سکولز مینجمنٹ ایسوسی ایشن شمالی پنجاب کے نجی تعلیمی ادارے غزہ کے مظلوم مسلمانوں سے اظہار یکجہتی کے لیے آج مورخہ 26 اپریل بند رہیں گے۔ ہم تاجر برادری اور دیگر سیاسی و مذہبی جماعتوں کی طرف سے ملک گیر ہڑتال کے اعلان کی حمایت کرتے ہیں۔
ان خیالات کا اظہار آل پاکستان پرائیویٹ سکولز مینجمنٹ ایسوسی ایشن شمالی پنجاب کے صدر ابرار احمد خان ، نائب صدر کرنل ر فواد حنیف ، جنرل سیکرٹری ملک محمد اعجاز ،کاشف چوھدری صدر مرکزی تنظیم تاجران پاکستان ، شرجیل میر صدر مرکزی تنظیم تاجران پنجاب اور ضیاء احمد راجہ ترجمان مرکزی تنظیم تاجران پاکستان نے غزہ و فلسطین کے مظلوم مسلمانوں سے اظہار یکجہتی کے لیے منعقدہ فورم میں اظہار خیال اور مشترکہ اعلامیہ جاری کرنے کے موقع پر کیا۔ شرکاء نے اس موقع پر اس عزم کا اظہار کیا کہ پاکستان کی سالمیت اور اس کے استحکام کے لیے ہر طرح کی قربانی دینے کو تیار ہیں،اس قوم کا بچہ بچہ افواج پاکستان کے شانہ بشانہ کھڑا ہے۔
اعلامیہ میں تمام رہنماؤں نے نہتے غزہ کے مسلمانوں پر اسرائیلی ظلم و بربریت کی مذمت کرتے ہوئے کہا کہ فلسطین ایک حل طلب مسئلہ ہے ۔ اسرائیلی بر بریت و دہشت گردی پر مسلم حکمرانوں کو خاموشی کو توڑنا ہوگا،اسر ائیلی ظلم و بربریت انسانی تاریخ کا سیاہ ترین باب ہے اسرائیل بین الاقوامی انسانی حقوق کے قوانین کی کھلم کھلا خلاف ورزی کر رہا ہے فلسطینی عوام کیلئے ہر پلیٹ فارم پر آواز بلند کرنا ہماری دینی ،اخلاقی ذمہ داری ہے ۔ اسرائیلی ظلم و بر بریت کو روکنے کیلئے او آئی سی ممالک کو مشترکہ حکمت عملی اپنانا ہوگی، وحشیانہ دہشت گردی نہ صرف بین الاقوامی قوانین کی توہین ہے بلکہ انسانیت کے ماتھے پر بد نما داغ بھی ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
