جیکب آباد :رپورٹ ایم ڈی عمرانی
ضلع کونسل جیکب آباد کا اجلاس، دریائے سندھ سے کینال نکالنے، فلسطین میں اسرائیلی جارحیت اور بھارت کی جانب سے سندھ طاس معاہدہ معطل کرنے خلاف قرارداد اکثریت رائے سے منظور۔ تفصیلات کے مطابق جیکب آباد ضلع کونسل کا اجلاس چیئرمین میر طاہر حسین کھوسو کی صدارت میں ہوا جس میں ضلع بھر کے ممبران نے شرکت کی، اجلاس میں ضلع کونسل کے رکن و پیپلز پارٹی کے ضلع صدر میر لیاقت خان لاشاری نے فلسطین میں اسرائیلی جارحیت کے خلاف قرارداد پیش کرتے ہوئے کہا کہ فلسطینی عوام کی نسل کشی کی جارہی ہے لیکن عالمی دنیا خاموش تماشائی بنی ہے خصوصاً امت مسلمہ کی قیادت کی خاموشی شرمناک ہے، انہوں نے کہا کہ فلسطین ہمارا ایمان کا حصہ ہے فلسطین میں ہونے والے مظالم سے پوری انسانیت شرمندہ ہے، فلسطین میں اسرائیلی جارحیت کے خلاف پیش کی گئی قرارداد اکثریت رائے سے منظور کی گئی اور حکومت پاکستان سے مطالبہ کیا گیا کہ فلسطین کے مسئلے پر عملی اقدامات اٹھائے جائیں، ضلع کونسل کے ممبر ذوالفقار علی کھوسو نے دریائے سندھ سے کینال نکالنے کے خلاف قرارداد پیش کی جس کو تمام ممبران نے اتفاق رائے سے منظور کرلیا، ڈاکٹر بی ایچ کھرانہ کی جانب سے بھارت کی جانب سے سندھ طاس معاہدے کو معطل کرنے کے خلاف قرارداد پیش کی گئی جو بھی اکثریت رائے سے منظور کی گئی، اکرم بروہی نے ضلع میں امن و امان کی بگڑتی صورتحال پر قرارداد پیش کرتے ہوئے کہا کہ ضلع میں امن وامان کی صورتحال انتہائی خراب ہے ایس ایس پی کو فری ہینڈ دیا گیا ہے لیکن اس کے باوجود امن و امان کی صورتحال خراب ہونا لمحہ فکریہ ہے انہوں نے مطالبہ کیا کہ تھانوں پر اچھے افسران مقرر کرکے امن و امان کو بحال کیا جائے، فاروق کھوسو نے گندم کے نرخ کم ہونے پر کہا کہ گندم کی قیمتیں کم ہونے کی وجہ سے آبادگار اور ہاری سخت پریشان ہیں حکومت آبادگاروں کو سبسڈی دیکر آبادگاروں کو معاشی طور پر تباہ ہونے سے بچایا جائے، ہدایت اللہ کھوسو نے بھی امن و امان کی خراب صورتحال پر تشویش کا اظہار کرتے ہوئے امن و امان کی بحالی کا مطالبہ کیا۔
جیکب آباد میں پولیس موبائل پر مسلح افراد کا حملہ، 3 اہلکار زخمی۔ تفصیلات کے مطابق جیکب آباد کی تحصیل ٹھل کے گڑہی حسن تھانہ کی پولیس موبائل گاڑی گشت کرتے ہوئے گاؤں غلام رسول کھوسو پہنچی تو نامعلوم مسلح افراد نے فائرنگ کردی، پولیس اور مسلح افراد کے درمیان مقابلہ ہوا جس کے نتیجے میں 3 پولیس اہلکار شیر علی لاشاری، خیر بخش اور ڈرائیور حسیب زخمی ہوگئے حملہ آور فائرنگ کرنے کے بعد فرار ہوگئے، زخمی اہلکاروں کو نازک حالت میں سول اسپتال جیکب آباد لایا گیا جہاں ان کی حالت تشویشناک ہونے پر سکھر منتقل کردیا گیا ہے، ایس ایچ او گڑہی حسن بشیر نصیرانی کے مطابق تھانے کی موبائل گاڑی گشت کررہی تھی کہ مسلح افراد نے حملہ کرکے 3 اہلکاروں کو زخمی کردیا ہے، ملزمان کی گرفتاری کے لیے علاقہ میں آپریشن جاری ہے جلد حملہ آوروں کو گرفتار کرلیا جائے گا۔
