5 مارچ 2025
راولپنڈی
صدر مرکزی انجمن تاجران لیاقت روڈ و سماجی رہنما شیخ عبد الوحید نے کہا کہ روزے میں یہ حکمت پوشیدہ ہے کہ ہم خداوند کریم کی قدر و منزلت پہچانیں ،اور اس کی عطا کردہ نعمتوں کا شکر بجا لائیں، بیشک روزہ اللہ تعالیٰ سے قربت کا ایک ذریعہ ہے۔
انھوں نے رمضان المبارک سے متعلق اپنے اہم بیان میں کہا کہ ارشاد باری تعالیٰ ہے کہ “اے ایمان والو! تم پر روزے فرض کیے گئے ہیں، جس طرح تم سے پہلے لوگوں پر فرض کیے گئے تھے، تاکہ تم پرہیزگار بن جاؤ”۔ انھوں نے کہا کہ خداوند کریم نے اپنے بندوں کے لئے عبادات کے جتنے بھی طریقے بتائے ہیں ان میں کوئی نہ کوئی حکمت ضرور پوشیدہ ہے۔ نماز خدا کے وصال کا ذریعہ ہے۔ اس میں بندہ اپنے معبودِ حقیقی سے گفتگو کرتا ہے۔ روزہ بھی خدا تعالیٰ سے لَو لگانے کا ایک ذریعہ ہے۔ صدر مرکزی انجمن تاجران لیاقت روڈ و سماجی رہنما شیخ عبد الوحید نے کہا کہ روزہ انسان کی باطنی طہارت اور روحانی صحت کا ذریعہ ہے ،وہیں پر جسمانی صحت اور نظامِ انہضام کی خرابیوں کا علاج بھی اس میں موجود ہے۔انھوں نے مزید کہا کہ روزہ انسان کو برائیوں سے پاک کرتا ہے اور اس کی روحانی اور اخلاقی قوتوں کو بیدار کرتا ہے۔ لہذا روزہ اور عبادات کا خصوصی اہتمام کرتے رہیں۔اس پاک مہینے میں رب تعالیٰ سے دعا ہوں کہ پاکستان سمیت تمام امت مسلمہ پر خاص کرم برقرار رہے،مسلمانوں میں باہمی اتفاق فروغ پائے اور پاکستان قائم دائم رہے۔آمین
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
