خانہ فرہنگ اسلامی جمہوریہ ایران لاہور کے ڈائریکٹر جنرل ڈاکٹر اصغر مسعودی نے جمعے کے روز یونیورسٹی آف ہیلتھ سائنسز (یو ایچ ایس) کا دورہ کیا، جہاں انہوں نے صوبائی وزیر صحت خواجہ سلمان رفیق، وائس چانسلر پروفیسر احسن وحید راٹھور اور سینئر فیکلٹی سے ملاقات کی۔ ڈاکٹر اصغر مسعودی کے دورے کا مقصد ایران کی میڈیکل یونیورسٹیوں اور یو ایچ ایس کے درمیان اشتراک عمل پر تبادلہ خیالات تھا۔ اس موقع پر خواجہ سلمان رفیق نے کہا کہ ایران ہر لحاظ سے ایک عظیم ملک ہے اور وہ خود انقلابِ ایران کا بغور مطالعہ کر چکے ہیں، جس سے وہ بے حد متاثر ہیں۔
ڈاکٹر اصغر مسعودی نے کہا کہ پاکستان اور ایران کئی معاملات میں یکساں ہیں اور دونوں ممالک کے درمیان تاریخی و ثقافتی تعلقات گہرے ہیں۔ انہوں نے نشاندہی کی کہ خانہ فرہنگ لاہور کے پہلے ڈائریکٹر معروف شاعر، صوفی غلام مصطفیٰ تبسم تھے۔ انہوں نے مزید کہا کہ پاکستان کو سب سے پہلے ایران نے تسلیم کیا تھا اور اسلامی انقلاب کی سب سے پہلی مبارکباد بھی پاکستان نے ہی دی تھی۔
انہوں نے علامہ اقبال کے کلام اور فلسفے کی ایران میں مقبولیت کا ذکر کرتے ہوئے کہا کہ آج بھی ایرانی شعراء پاکستان سے محبت کرتے ہیں۔ ڈاکٹر مسعودی نے یہ بھی بتایا کہ انقلاب کے بعد ایران نے میڈیکل سائنسز، خصوصاً روبوٹکس میں نمایاں ترقی کی ہے اور پاکستانی طلبہ ایران کو تعلیمی لحاظ سے ایک سازگار ملک سمجھتے ہیں۔ ان کے مطابق، گزشتہ سال 100 سے زائد ایرانی طلبہ لاہور آئے اور مختلف اداروں میں داخلہ لیا۔
ملاقات کے دوران ایرانی قونصل جنرل کے پیڈریاٹک ہارٹ سرجری میں تعاون کے حوالے سے وزیر اعلیٰ پنجاب کو لکھے گئے خط پر بھی تبادلہ خیال ہوا۔ خواجہ سلمان رفیق نے کہا کہ پنجاب حکومت چاہتی ہے کہ ایرانی پیڈریاٹک ہارٹ سرجن پاکستان آئیں اور ان بچوں کی سرجری کریں جن کے دل میں پیدائشی سوراخ ہے۔ اس حوالے سے ڈی جی خانہ فرہنگ نے خواجہ سلمان رفیق کی ایرانی نائب وزیر صحت سے ٹیلی فونک بات چیت بھی کروائی، جس میں ایرانی نائب وزیر نے پنجاب حکومت کو ہر ممکن تعاون کی یقین دہانی کرائی۔
پرو وائس چانسلر یو ایچ ایس، پروفیسر نادیہ نسیم نے ایرانی طلبہ کے پنجاب کے میڈیکل کالجوں میں داخلے، پوسٹ گریجویٹ پروگرامز، مختصر کورسز، انٹرن شپ، اور سمر اسکول کی سہولیات پر بریفنگ دی۔ انہوں نے مزید کہا کہ ڈیجیٹل ایجوکیشن، ٹیلی کنسلٹیشن اور میڈیکل جرنلزم میں بھی دونوں ممالک کے اداروں کے درمیان تعاون کی گنجائش موجود ہے۔
آخر میں، ڈی جی خانہ فرہنگ نے وزیر صحت پنجاب اور وائس چانسلر یو ایچ ایس کو ایرانی سووینئیر پیش کیے۔
