پریس ریلیز
کراچی( )پاکستان مرکزی مسلم لیگ کراچی کے زیر اہتمام سہراب گوٹھ میں عوامی سہولت بازار کا انعقاد کیا گیا،جہاں روزمرہ کی تمام اشیائے ضروریہ عوام کو مارکیٹ ریٹ سے کم قیمت پر فراہم کی گئیں۔ مرکزی مسلم لیگ سندھ کے صدر فیصل ندیم نے سہراب گوٹھ میں عوامی سہولت بازار کا دورہ کیا اور مختلف اسٹالز پر عوام سے ملاقات کی۔ اس موقع پر کراچی کے صدر احمد ندیم اعوان، نائب صدر انجینئر نعمان علی، سہراب ٹاؤن کے جنرل سیکرٹری عبد القیوم سمیت دیگر رہنما بھی ان کے ہمراہ موجود تھے۔ فیصل ندیم نے میڈیا سے گفتگو کرتے ہوئے کہا کہ مہنگائی اس وقت ملک کے لیے ایک بڑا چیلنج بن چکی ہے جس نے عام آدمی کی زندگی اجیرن کر دی ہے۔ بدقسمتی سے حکومتی اقدامات محض کاغذی کارروائیوں تک محدود ہیں اور عوام کو
کوئی حقیقی ریلیف فراہم نہیں کیا جا رہا ۔ پاکستان مرکزی مسلم لیگ نے مہنگائی کے خلاف ایک مؤثر احتجاجی مہم چلائی اور عوام کی مدد کے لیے عملی اقدامات اٹھانے کا عزم کیا ۔ گزشتہ سال بھی رمضان سے قبل درجنوں عوامی سہولت بازاروں کا انعقاد کیا ۔ جہاں سے ہزاروں خاندانوں کو سہولت میسر آئی ۔ آج سہراب گوٹھ میں بھی عوامی سہولت بازار کا انعقاد اسی سلسلے کی کڑی ہے ۔ فیصل ندیم نے اعلان کیا کہ کراچی کے دیگر علاقوں میں گزشتہ سال کی طرح عوامی سہولت بازاروں کا انعقاد کیا جائے گا تاکہ عوام کو زیادہ سے زیادہ ریلیف فراہم کیا جا سکے۔اس موقع پر فیصل ندیم نے ناجائز منافع خوری اور ذخیرہ اندوزی کے خلاف سخت کارروائی کا مطالبہ کرتے ہوئے کہا کہ حکومت مصنوعی مہنگائی پیدا کرنے والے عناصر کے خلاف فوری اقدامات کرے۔حکمرانوں کو عوامی مشکلات کے حل کے لیے سیاست سے بالاتر ہو کر اقدامات کرنا ہوں گے۔ اگر موجودہ حکومت مہنگائی کو کنٹرول نہیں کر سکتی تو اسے دیانت دار قیادت کو راستہ دینا چاہیے تاکہ ملک و قوم کی حقیقی خدمت کی جا سکے۔
