صوبائی وزیر نے 2650 اقلیتی خاندانوں کو مینارٹی کارڈز تقسیم کئے
لاہور ، 26 فروری: وزیراعلیٰ پنجاب کی ہدایت پر ضلع ننکانہ صاحب میں اقلیتی برادری کو مینارٹی کارڈز کی تقسیم کے لیے ایک شاندار تقریب کا انعقاد کیا گیا۔ اس تقریب میں صوبائی وزیر اقلیتی امور رمیش سنگھ اروڑہ نے خصوصی شرکت کی جبکہ ممبر صوبائی اسمبلی آغا علی حیدر خان، ضلعی افسران، علمائے کرام،سکھ، ہندو اور مسیحی برادری کے افراد کی بڑی تعداد بھی اس موقع پر موجود تھی۔۔ صوبائی وزیر اقلیتی امور رمیش سنگھ اروڑہ نے اس موقع پر خطاب کرتے ہوئے کہا کہ وزیراعلیٰ پنجاب مریم نواز شریف کا وژن اقلیتی برادری کے حقوق کا مکمل تحفظ ہے۔ اس پروگرام کے تحت ننکانہ صاحب کے 2650 اقلیتی خاندانوں کو مینارٹی کارڈز فراہم کیے جا رہے ہیں، جس سے مستحق گھرانوں کو ہر تین ماہ بعد 10 ہزار 05 سو روپے مل رہے ہیں۔
انہوں نے مزید کہا کہ مینارٹی کارڈز اقلیتی برادری کے حقوق کے تحفظ میں ایک مضبوط قدم ثابت ہوں گے۔ وزیراعلیٰ پنجاب مریم نواز شریف ہمیشہ یہ کہتی ہیں کہ اقلیتیں میرے سر کا تاج ہیں، اور ان کے اقدامات سے اقلیتی برادری میں احساس محرومی کا خاتمہ ہو رہا ہے۔
اس موقع پر ممبر صوبائی اسمبلی آغا علی حیدر خان نے کہا کہ مسلم لیگ ن ہمیشہ اپنے وعدوں پر قائم رہی ہے اور اقلیتی برادری کو محفوظ ماحول فراہم کرنے کے لیے ہمیشہ اقدامات کیے ہیں۔ انہوں نے مزید کہا کہ مخالفین ہمیشہ سستی سیاست کا شکار رہے ہیں، جبکہ ہماری حکومت عوام کے لیے ہر ممکن سہولت فراہم کر رہی ہے۔
ایڈیشنل ڈپٹی کمشنر ریونیو نے اس موقع پر بتایا کہ ضلع کی تینوں تحصیلوں میں مینارٹی کارڈز کی تقسیم کے لیے خصوصی کاونٹرز قائم کیے گئے ہیں۔ پی ایس ای آر کے تحت مستحق خاندانوں کی رجسٹریشن کا عمل بھی جاری ہے۔ تقریب کے اختتام پر صوبائی وزیر رمیش سنگھ اروڑہ نے ضلعی انتظامیہ کی تعریف کرتے ہوئے کہا کہ اقلیتی برادری کو اپنے جھنڈے کے رنگ کی طرح ساتھ کھڑا کرنا ہماری قومی ذمہ داری ہے۔
