کچرے کی منتقلی کیلئے ہیوی گاڑیوں کی آمدورفت رات میں ہوگی، ایم ڈی سالڈ ویسٹ
کراچی(اسٹاف رپورٹر)منیجنگ ڈائریکٹر سندھ سالڈ ویسٹ مینجمنٹ بورڈطارق علی نظامانی نے کہا ہےکہ کچرالینڈ فل سائٹ یا جی ٹی ایس منتقلی کے لئے کراچی میں ہیوی گاڑیوں کی آمدورفت صرف رات میں کی جائیگی، سندھ حکومت کی جانب سے بنائے گئے ٹریفک قوانین پر سختی سے عملدرآمدکیا جائے، دن میں آمدورفت یا کسی بھی خلاف ورزی کی صورت میں کمپنی پر بھاری جرمانے عائد کئے جائیں گے، اجلاس میں تما م اضلاع کے متعلقہ افسران اورنجی کمپنیز کے عہدیداران موجود تھے، دریں اثناء ایم ڈی سالڈ ویسٹ کی ہدایت پرشبِ برات کے انتطامات کے سلسلے میں ضلع جنوبی، شرقی، غربی، وسطی، کورنگی، کیماڑی،اور ملیرمیں مرکزی قبرستانوں کی صفائی ستھرائی کا کام کیا گیا ، مرکزی قبرستانوں کے باہر کیمپ لگائے جائیں گے، مساجد، امام بارگاہوں کے اطراف بھی صفائی ستھرائی اور چونے کے چھڑکاؤکا کام یقینی بنایا جائے گا۔
ڈمپرز پر سندھ حکومت نے5روز میں ہی فیصلہ بدل دیا
کراچی(مطلوب حسین /اسٹاف رپورٹر) سندھ حکومت کابڑھتے ہوئے ٹریفک حادثات کی روک تھام اور ٹریفک کی بہتری کے لئے ڈمپر زکی دن کے اوقات میں شہر میں داخلے پر پابندی کے معاملہ پراپنا فیصلہ 5 روز میں ہی بدل دیا ہے،وزیر داخلہ سندھ کی سربراہی میں12 فروری بدھ کو انکے دفتر ہونے والے اجلاس میں میں 8 فروی کو وزیر اعلیٰ سندھ کی ہدایت پر چیف سیکرٹری سندھ کی سربراہی میں ہونے والے اجلاس کے فیصلوں کے برخلاف سولڈ ویسٹ منیجمنٹ کو دن کے اوقات میں شہر میں داخل ہونے کی اجازت دینے کا فیصلہ سامنے آیا ہے،وزیر داخلہ سندھ کے ترجمان کی جانب سے جاری اعلامیہ میں بتایا گیا ہےکہ 12 فروری 2025 بدھ کوصوبائی وزیر داخلہ سندھ ضیا الحسن لنجار کی سربراہی میں منعقدہ اجلاس ،مئیر کراچی مرتضیٰ وہاب ،آئی جی سندھ غلام نبی میمن ،ایڈیشنل آئی جی کراچی جاوید عالم اوڑھو ،کمشنر کراچی ،،ٹرانسپورٹ اور ایکسائز و ٹیکسیشن کے صوبائی سیکریٹرز سمیت دیگر متعلقہ افسران نے شرکت کی۔ اجلاس میں ہزاروں کچرا اٹھانے والی گاڑیوں اور ضروری ہیوی گاڑیوں کو دن کے اوقات میں داخلہ کی اجازت دینا کا فیصلہ سامنے آیا ہے۔
================
ٹینکر کمیونٹی اس وقت انڈر تھریٹ ہے، حکومت، آفاق احمد کو عدالتی ریمانڈ پر جیل بھیج دیا
کراچی (اسٹاف رپورٹر)انسداد دہشتگردی منتظم عدالت نے مہاجر قومی موومنٹ کے چیئرمین آفاق احمد سمیت گیارہ افراد کو عدالتی ریمانڈ پر جیل بھیج دیا۔ آفاق احمد کو بکتر بند گاڑی میں سخت سیکورٹی میں عدالت پہنچایا گیا۔ عدالت نے درخواست ضمانت پر فریقین کو نوٹس جاری کرئیے۔ لانڈھی میں میں ٹرک نذر آتش کرنے کے مقدمہ میں گرفتار مہاجر قومی موومنٹ کے چیئرمین آفاق احمد اور دیگر دس کارکنان کو عدالت پہنچایا گیا ۔ عدالت کاکہنا تھا کہ اس مقدمے میں دہشتگردی کی دفعات کیوں لگائی گئی ہیں،سرکاری وکیل کاکہناتھا کہ آفاق احمد کے کہنے پر جلاؤ گھیراؤ کیا گیا ہے، ٹینکر کمیونٹی اس وقت ان لوگوں کی وجہ سے انڈر تھریٹ ہیں، عدالت کا کہناتھا کہ انڈر تھریٹ تو میں بھی ہوں تو کیا میں بھی کارروائیوں کا حکم دے دوں،سرکاری وکیل نے بتایا کہ ٹینکر جلانے کی وجہ سے شہر خوف کی علامت بنا ہوا ہے اس لیے اے ٹی اے کے تحت مقدمہ درج کیا گیا ہے،عدالت کاکہنا تھا کہ اس مقدمے میں جو بھی دفعات لگائی گئی ہیں اس میں کس طرح اے ٹی اے لگ سکتی ہے؟ آپ کے پاس ایسے کیا شواہد ہیں جس کی بنیاد پر ریمانڈ مانگ رہے ہیں۔تفتیشی افسر کاکہنا تھا کہ ڈمپر کا ڈرائیور اور کنڈیکٹر مسنگ ہیں خدشہ ہے انکے پاس ہیں ،دو انسانی جانوں کا مسئلہ ہے ،لاکھوں روپے کی چینی کی بوریاں مسنگ ہیں ۔عدالت نے آفاق احمد کو عدالتی تحویل میں جیل بھیج دیا جبکہ ان کی درخواست ضمانت پر فریقین کو نوٹس جاری کردئیے۔ عدالت نے آئندہ سماعت پر تفتیشی افسر سے مقدمہ کا چالان طلب کرلیا۔ سماعت کے بعد میڈیا سے بات چیت کرتے ہوئے آفا ق احمد کاکہنا تھا کہ اس شہر کے لیے آواز بلند کرنے کی سزا دی جارہی ہے،مجھے جیل بھیج کر وہ لوگ واضح ہوگئے ہیں جو اس مافیا کے ساتھ ہیں،اس شہر میں جان لیوا گاڑیاں دندناتی ہوئی پھر رہی ہیں،میرا کیا مطالبہ تھا میں تو قانون کے مطابق ہیوی ٹریفک کی روانی چاہتا تھا،حکومت اس وقت ڈمپر مافیا کی سرپرستی کررہی ہے ،پیپلز پارٹی اس معاملے میں مکمل طور پر ایکسپوز ہوگئی ہے,عدالت نے مہاجر قومی موومنٹ کے چیئرمین آفاق احمد کی جیل میں بی کلاس سہولیات دینے کی درخواست منظور کرلی۔اس موقع پر کارکنان کی بڑی تعدا بھی عدالت پہنچ گئی۔آفاق احمد پر پھول نچھاور کیے گئے اور نعرے بھی لگائے گئے۔
