جدید لاہور کے بانی رائے بہادر سرگنگا رام کی پڑپوتی پارول دتہ کا وفد کے ہمراہ فاطمہ جناح میڈیکل یونیورسٹی/ سر گنگا رام ہسپتال کا تفصیلی دورہ کیا۔ وفد میں ابھیرام سیٹھ ، رادھیکا سیٹھ اور سیما رام شامل تھے۔
وائس چانسلر فاطمہ جناح میڈیکل یونیورسٹی پروفیسر ڈاکٹر خالد مسعود گوندل نے ڈینز کے ہمراہ معزز مہمانوں کا پرتپاک استقبال کیا ۔
وائس چانسلر پروفیسر ڈاکٹر خالد مسعود گوندل نے مہمانوں کو فاطمہ جناح میڈیکل یونیورسٹی آمد پر شکریہ ادا کیا۔ اس موقع پر وائس چانسلر پروفیسر ڈاکٹر خالد مسعود گوندل کی سربراہی میں اجلاس منعقد ہوا جس میں انہوں نے سرگنگا رام ہسپتال اور فاطمہ جناح میڈیکل کالج کے قیام ، فاطمہ جناح میڈیکل یونیورسٹی کی کامیانیوں اور سر گنگا رام کی مثالی خدمات پر روشنی ڈالی۔ان کا کہنا تھا کہ آج کا دن فاطمہ جناح میڈکل یونیورسٹی اور سر گنگا رام ہسپتال کے لیے تاریخی دن ہے۔اُنہوں نے سرگنگا رام ، جو کہ جدید لاہور کے بانی کے نام سے جانے جاتے ہیں ،کی خدمات کو سراہا۔ اُن کا مزید کہنا تھا کہ سر گنگا رام کے فلاحی اداروں بلخصوص سر گنگا رام ہسپتال سے آج بھی عوام فائدہ اٹھا رہی ہے اور یہ سلسلہ کامیابی کے ساتھ جاری ہے ۔ سر گنگا رام ہسپتال فلاحی اداروں میں ممتاز مقام رکھتا ہے۔ اُنہوں نے صحت عامہ کی معیاری اور اعلیٰ خدمات کے اعتراف میں حکومت پنجاب کا شکریہ ادا کیا۔
اجلاس کے بعد وفد نے پروفیسر ڈاکٹر خالد مسعود گوندل کی سربراہی میں سر گنگا رام ہسپتال کے جدید سہولیات سے آراستہ پرائیویٹ رومز، میڈیکل و سرجیکل وارڈز، بچہ وارڈ کا دورہ کیا ، مریضوں کی عیادت بھی کی۔ وفد کے ممبران عالمی معیار کی صحت سہولیات سے بہت متاثر ہوئےاور انہوں نے اس ادارے کو دنیا کااعلیٰ معیار کا بہترین ادارہ قرار دیا۔
اس موقع پر ون سٹاپ وومن ہیلتھ سینٹر کا افتتاح بھی کیا گیا جہاں خواتین کے لیے بریسٹ کلینک، میموگرافی، الٹراساؤنڈ سمیت صحت کی دیگر سہولیات میسر ہونگی۔
وفد کے ممبران نے اپنے دادا رائے بہادر سر گنگا رام کی خواتین اور تعلیم کے لیے فلاحی کاموں کے عظیم ورثے کو قائم رکھنے پر یونیورسٹی اور ہسپتال انتظامیہ کا شکریہ ادا کیا۔ اُن کا کہنا تھا کہ نہ صرف وراثت کو جاری رکھا بلکہ فاطمہ جناح انسٹیٹیوٹ آف مدر اینڈ چائلڈ ہیلتھ کی صورت میں انسانیت کو ایک بہترین تحفہ بھی دیا، جس پر حکومت پنجاب کا بھی شُکریہ ادا کرتے ہیں۔اس موقع پر وفد کو شیلڈزاور ہسٹری بک پیش کی گئیں۔
اس موقع پر پر رجسٹرار پروفیسر محمد ندیم، پرنسپل پروفیسر ڈاکٹرعبدالحمید، ڈینز پروفیسر ڈاکٹر بلقیس شبیر، پروفیسر ڈاکٹر عالیہ زاہد، پروفیسر ڈاکٹر شمیلہ اعجاز منیر، پروفیسر ڈاکٹرنوید اکبر ہوتیانا ، میڈیکل سپرنٹنڈنٹ سر گنگا رام ہسپتال ڈاکٹر عارف افتخار، پروفیسر ماہ جبین مسعود،ڈاکٹر وردہ اشرف،ڈاکٹر سمن چوہدری سمیت ہیڈز آف ڈیپارٹمنٹس اور فیکلٹی ممبران کی کثیر تعداد نے شرکت کی۔
