پاکستان میں منہ کا کینسر تیزی سے بڑھ رہا ہے ۔

پاکستان ایسوسی ایشن آف اورل اینڈ میگزیلوفیشل سرجنز (Pakistan Association of Oral and Maxillofacial Surgeons)کے زیر اہتمام 15ویں سالانہ دو روزہ پاکستان اورل اینڈ میگزیلوفیشل سرجنز کانفرنس کا انعقاد کیا گیا۔
سینئر وائس پریذیڈنٹ، کالج آف فزیشنز اینڈ سرجنز پاکستان (سی پی ایس پی)/ وائس چانسلر ،فاطمہ جناح میڈیکل یونیورسٹی پروفیسر ڈاکٹر خالد مسعود گوندل نے بطور چیف گیسٹ شرکت کی۔
پروفیسر ڈاکٹر خالد مسعود گوندل کا کہنا تھا کہ پاکستان میں منہ کا کینسر تیزی سے بڑھ رہا ہے ۔ اس کی آگاہی اور بچنے کے لیے اقدامات کرنا ضروری ہو چکا ہے ۔ ان کا مزید کہنا تھا کہ کالج آف فزیشنز اینڈ سرجنز پاکستان اعلیٰ طبی تعلیم میں پاکستان کا سب سے بڑا ادارہ ہے۔ سی پی ایس پی دوسرے ممالک کے ساتھ باہمی تعاون ،شراکت اور مساوات پر یقین رکھتا ہے۔ سی پی ایس پی بہت جلد آرٹیفیشل انٹیلیجنس کا شعبہ قائم کرنے جا رہا ہےاور اپنا امتحانی نظام آن لائن کر رہے ہیں۔ انہوں نے مزید کہا کہ فاطمہ جناح میڈیکل یونیورسٹی میں جولائی 2025 تک اورل اینڈ میگزیلوفیشل سرجری پروگرام کی منظوری کے ساتھ ٹریننگ کا آغاز کر دیاجائے گا۔
اس موقع پر پروفیسر خالد مسعود گوندل نے اورل اینڈ میگزیلوفیشل سرجنز (Oral and Maxillofacial Surgeons)کی نئی قائم شدہ ایگزیکٹو کونسل کے ممبران سے حلف بھی لیا ۔
صدرپاکستان ایسوسی ایشن آف اورل اینڈ میگزیلوفیشل سرجنز (Pakistan Association of Oral and Maxillofacial Surgeons)پروفیسر ریاض احمد وڑائچ کا کہنا تھا شعبہ طب بالخصوص ڈینٹل اسپیشیلٹیز میں پروفیسر ڈاکٹر خالد مسعود گوندل کی خدمات ناقابل فراموش ہیں ۔
سیکریٹری کانفرنس پروفیسر ڈاکٹر اسد اعزاز چٹھہ (چیف آرگنائزر ) نے چیف گیسٹ کا استقبال کیا اور کانفرنس آمد پر شکریہ ادا کیا۔ان کا کہناتھا کہ منہ اور چہرےکی بیماریوں اور منہ کے کینسر کے متعلق آگاہی اور ٹرینیز کی تربیت کرنا وقت کی اہم ضرورت ہے۔
اس بین الاقوامی کانفرنس کا مقصد دنیا بھر اور پاکستان کے اورل اینڈ میگزیلوفیشل سرجنز، طلباء اور اسٹیک ہولڈرز کو یکجا کرنا ہے تاکہ اس سے متعلق مسائل ، جراحی میدان میں پیشرفت اور مسائل کے جدید حل پر تبادلہ خیال کیا جا سکے ۔
اس موقع پر کانفرنس کے پیٹرن ان چیف پروفیسر محمد سعید، صدرپروفیسر ریاض احمد وڑائچ، چیئرمین پروفیسر ڈاکٹر عاقب سہیل، اور 13 مختلف ممالک برطانیہ ، امریکہ ، یورپ اور مشرق وسطی سمیت دیگر ممالک کے بین الاقوامی ماہرین اور پاکستان بھر سے تمام نامور اورل اینڈ میگزیلوفیشل سرجنز اور ماہرین نے شرکت کی ۔
چیف گیسٹ پروفیسر خالد مسعود گوندل نے پاکستان ایسوسی ایشن آف اورل اینڈ میگزیلوفیشل سرجنزکے سربراہان سمیت بین الاقوامی سپیکرز میں اعزازی سووینراور ہسٹری بکس پیش کیں۔