ماڈل اور اداکارہ عفت عمر کی اچانک طبیعت خراب

لاہور کی سیشن عدالت میں گلوکار علی ظفر کے میشا شفیع کے خلاف ہرجانے کے کیس کی سماعت کے دوران عدالت میں بیان ریکارڈ کراتے ہوئے ماڈل اور اداکارہ عفت عمر کی اچانک طبیعت خراب ہو گئی۔

کیس میں گواہ اداکارہ و ماڈل عفت عمر نے بیان ریکارڈ کرانے کے دوران طبیعت خراب ہونے پر عدالت کے روبرو کہا کہ مجھے چکر آ رہے ہیں۔

عدالت نے گواہ خاتون کو فوری کرسی اور پانی فراہم کرنے کا حکم دے دیا۔

اس واقعے کے بعد سیشن کورٹ نے اداکارہ میشا شفیع کے خلاف علی ظفر کے ہرجانے کے کیس کی سماعت 19 دسمبر تک ملتوی کر دی۔

لاہور کی عدالت نے آئندہ سماعت پر مزید گواہوں کو پیش ہونے کا حکم بھی دے دیا۔

واضح رہے کہ یکم دسمبر کو ہونے والی گزشتہ سماعت کے موقع پر بھی اداکارہ عفت عمر نے عدالت سے درخواست کی تھی کہ میں کراچی سے آئی ہوں اور تھکاوٹ کا شکار ہوں لہٰذا مجھ سے جرح نہ کی جائے۔

عدالت میں ادکارہ عفت عمر میشا شفیع کی گواہ کے طور پر پیش ہورہی ہیں۔