پی آئی اے طیارہ حادثہ: عائزہ خان نے افواہوں کی تردید کردی

کراچی: پاکستان کی نامور اداکارہ عائزہ خان نے حادثے کے شکار ہونے والے پی آئی اے کے طیارے میں موجودگی سے متعلق افواہوں کی تردید کر دی۔

تفصیلات کے مطابق پاکستانی ڈرامہ انڈسٹری کی معروف اداکارہ عائزہ خان نے سماجی رابطے کی ویب سائٹ ٹویٹر پر اپنے پیغام میں کہا کہ جعلی خبریں پھیلانا بند کریں،الحمد اللہ ہم اپنے گھروں میں خیریت سے ہیں۔عائزہ خان نے کہا کہ ان لوگوں کے لیے دعا کریں جو حادثے کا شکار ہوگئے،اللہ تعالیٰ ان کے گھر والوں کو صبر دے، آمین
نامور پاکستانی اداکارہ نے اپنے پیغام میں کہا کہ اللہ ہدایت دے ان لوگوں کو جو کسی بھی بات کی تصدیق کیے بغیر بس ایک اسٹیٹس لکھ دیتے ہیں۔انہوں نے کہا کہ اللہ تعالی ہم سب کو اپنے حفظ وامان میں رکھے
دوسری جانب پاکستان شوبز انڈسٹری کی معروف اداکارہ منشا پاشا نے ٹویٹر پر اپنے پیغام میں کہا کہ میری دانش سے بات ہوئی ہے، خدارا جھوٹی خبریں روکیں۔اداکارہ نے کہا کہ دونوں میاں بیوی گھر میں موجود ہیں، اللہ کا لاکھ لاکھ شکر ہے۔
واضح رہے کہ کراچی میں ایئرپورٹ کے قریب لاہور سے آنے والا پی آئی کا مسافر طیارہ گر کر تباہ ہوگیا جس کے نتیجے میں متعدد افراد جاں بحق ہوگئے