بھارت : نوجوان اچانک مٹی میں دھنس گیا

نئی دہلی : بھارت میں ایک نوجوان ٹیوب ویل کے کنوئیں کی مٹی دھنسنے سے ہلاک ہوگیا، واقعے میں دو افراد زخمی ہوئے، امدادی ٹیم نے سخت جدو جہد کے بعد دبی ہوئی لاش کو نکالا۔

تفصیلات کے مطابق بھارتی ریاست اتر پردیش کے پرتاپ گڑھ میں ٹیوب ویل کے کنوئیں کی مٹی میں دھنسنے سے ایک نوجوان ہلاک ہوگیا جبکہ اس کے دو ساتھی زخمی ہوگئے۔

واقعہ ضلع پرتاپ گڑھ کے تھانہ کندھئ علاقے کے گنگا پٹّی گاؤں میں اس وقت پیش آیا جب ٹیوب ویل کے کنوئیں سے مٹی نکالتے وقت مٹی مزید زمین میں دھنس گئی جس میں دب کر20سالہ نوجوان اشیش ہلاک ہوگیا۔

اس کی مدد کرنے والے گاؤں کے دو نوجوان بھی حادثے میں شدید زخمی ہوگئے جنہیں طبی امداد کیلئے قریبی اسپتال منتقل کیا گیا تاہم ان کی حالت خطرے سے باہر ہے۔

اس حوالے سے ڈی ایس پی پٹّی رمیش چند نے میڈیا کو بتایا کہ گنگا پٹّی گاؤں میں ٹیوب ویل کے کنوئیں سے اینٹ نکالتے وقت اچانک مٹّی دھنسنے سے ملبے کے نیچے 20سالہ آشیش پٹیل، 19سالہ اروند اور 22 سالہ ناگیندر دھنس گئے۔

ڈی ایس پی کے مطابق ان کے شور مچانے پر لوگوں نے اروند اور ناگیندر کو تو زخمی حالت میں کھینچ کر نکال لیا مگر آشیش کا پتہ نہیں چل سکا وہ مکمل زمین میں دھنس چکا تھا۔

بعد ازاں فائر بریگیڈ کے عملہ جائے وقوعہ پر پہنچا اور مشین کی مدد سے مٹّی ہٹائی اور سخت جدوجہد کے بعد رات گئے لاش کو زمین سے نکالا۔ پولیس نے لاش پوسٹمارٹم کے لیے ضلع اسپتال بھیج دی ہے۔