’کاش! میں یہ سموسہ دیکھنے سے پہلے اندھا ہوجاتا‘

سوشل میڈیا پر انواع واقسام کے کھانے اور تجرباتی پکوانوں کے چرچے رہتے ہیں لیکن ان دنوں صارفین ایسی آئس کریم پر تبصرے کررہے ہیں جسے انسانی آنکھ نے پہلی مرتبہ دیکھا ہے۔

سماجی رابطے کی ویب سائٹ ٹوئٹر پر حمزہ گلزار نامی شہری نے ’اوریو آئس کریم سموسہ‘ کی تصاویر شیئر کیں جس پر سوشل میڈیا صارفین سیخ پا ہوگئے اور مذکورہ شے تیار کرنے والے شخص کو شدید تنقید کا نشانہ بنایا۔

پہلی مرتبہ اوریو بسکٹ اور کریم کی مدد سے سموسہ آئس کریم تیار کی گئی جو صارفین کو ذرا بھی نہ بھائی اور لفظی گولہ باری شروع کردی۔ ایک صارف نے طنز کرتے ہوئے لکھا کہ ’ایسی حرکتوں سے کرونا جنم لیتا ہے‘۔ دوسرے شہری کا کہنا تھا کہ ’کاش! میں یہ سموسہ دیکھنے سے پہلے اندھا ہوجاتا‘۔