آج کورونا کے 404 نئے کیسز سامنے آئے ہیں جوکہ تشویشناک بات ہے، انھوں نے کہا کہ آج سب سے زیادہ 8 مریضوں کا انتقال ہوا : وزیراعلیٰ سندھ

کراچی : وزیراعلیٰ سندھ سید مراد علی شاہ نے کورونا وائرس کی صورتحال سے متعلق اپنے وڈیو پیغام میں کہا ہے کہ آج کوروناکے 404 نئے کیسز سامنے آئے ہیں جوکہ تشویشناک بات ہے۔ انھوں نے کہا کہ آج سب سے زیادہ 8 مریض انتقال کرگئے جبکہ سندھ میں آج کورونا کے 208 مریض صحتیاب ہوئے ہیں ۔ انھوں نے کہا کہ 24 گھنٹوں میں مزید 3729 کورونا کے ٹیسٹ کیے ان میں سے 404 نئے کیسز رپورٹ ہوئے جوکہ گزشتہ 24 گھنٹوں کے دوران کئے گئے ٹیسٹوں کا 10.8 فیصد بنتا ہے۔ سندھ میں اب تک 51790 کورونا کے ٹیسٹ کیے گئے ہیں۔ انھوں نے کہا کہ کل تک 5291 مثبت کیسز تھے جبکہ سندھ میں کورونا کے 5659 کیسز ہوچکے ہیں، یہ کُل ٹیسٹ کا 11 فیصد ہے اور اب تک 1169 مریض صحتیاب ہوئے،یہ کُل تعداد کا 20.5 فیصد ہے۔انھوں نے کہا کہ کورونا کے باعث کُل اموات 100 ہوگئی ہیں، ہمارے پاس 4426 مریض زیرعلاج ہیں جن میں سے 3187 یعنی 72 فیصد مریض گھروں میں آئیسولیٹ ہیں، جبکہ 762 یعنی 17 فیصد مریض آئیسولیشن مراکز اور 477 یعنی 11 فیصد مختلف اسپتالوں میں زیرعلاج ہیں اور 54 مریضوں کی حالت تشویشناک ہے اور 18 مریض وینٹی لیٹرز پر ہیں۔ انھوں نے کہا کہ شہر کراچی میں کورونا کے 332 نئے کیسز رپورٹ ہوئے ہیں۔

ان میں ضلع جنوبی کراچی میں 113، ضلع شرقی میں 100 اورضلع وسطی میں 39 ، کورنگی میں 37، ضلع غربی میں 26 اور ملیر میں 17 ۔ انھوں نے کراچی کے لوگوں سے درخواست کی کہ وہ تمام تر احتیاطی تدابیر اختیار کریں بشمول ماسک پہننا، بچوں اور عمر رسیدہ افراد سے فاصلہ رکھنا اور غیر ضروری گھر سے باہر نکلنے سے گریز شامل ہیں نہیں تو نتائج بہت خطرناک نکلیں گے۔ سندھ کے دیگر اضلاع میں نئے کیسز کی تعداد 72 ہے ان میں سے سکھر میں 14، لاڑکانہ اور خیرپور میں 13-13، شہید بینظیرآباداور شکارپور میں 7-7 نئے کیسز رپورٹ ہوئے۔ مراد علی شاہ نے کہا کہ دیہی علائقوں میں مقامی پھیلاؤ میں بھی اضافہ ہو رہا ہے جوکہ ڈبلیو ایچ او ، اور ماہرین کی ایس او پیز پر ہمارے لوگوں کی جانب سے عمل نہ کرنے کی وجہ سے ہے۔ انھوں نے کہا کہ ہم اس وقت تک کورونا وائرس کو شکست نہیں دے سکیں گے جب تک کہ ہمارے لوگ تعاون نہیں کریں گے۔ انھوں نے بتایا کہ کراچی میں 2 پروازیں کولالمپور اور ابو ظہبی سے 505 مسافر لیکر پہنچیں تمام مسافروں کے ٹیسٹ کئے گئے اور ان میں سے 69 مسافروں کا کورونا ٹیسٹ مثبت آیا ہے جبکہ 39 کا نتیجہ کا انتظار ہے۔ انھوں نے کہا کہ 69 کوویڈ-19 مثبت کیسز میں سے 22 کا تعلق خیبرپختون خواہ، 21 کا سندھ، 19 کا پنجاب، 5 کا بلوچستان اور 2 کا آزاد کشمیر سے ہے۔ انھوں نے کہا کہ ہم صوبے میں لیب آپریٹنگ کی ٹیسٹنگ کی گنجائش میں اضافہ کررہے ہیں اور ایک نئی لیب لاڑکانہ میں قائم کی جارہی ہے۔اپنے پیغام کے آخر میں انھوں نے کہا کہ کچھ صنعتی یونٹس اور آن لائن بزنس کی اجازت دی گئی ہے لیکن آپ کو احیتاطی تدابیر اور ایس او پی پر عمل کرنا ہوگا۔