پیراسائٹ’ پر تنقید : ‘باہوبلی’ کے پروڈیوسر کا اڑا مذاق

ممبئی : بھارتی فلم باہو بلی کے پروڈیوسر کو آسکر ایوارڈ یافتہ فلم پر تنقید کرنا مہنگا پڑگیا، سوشل میڈیا صارفین نے ایس ایس راجا مولی کو شدید طنز کا نشانہ بنایا۔

تفصیلات کے مطابق گزشتہ ماہ آسکر میں بہترین فیچر فلم کا ایوارڈ حاصل کرنے والی بین الاقوامی فلم ‘پیراسائٹ’ کو ‘باہوبلی’ کے پروڈیوسر ایس ایس راجامولی نے بورنگ قرار دیا تھا جس کے جواب میں سوشل میڈیا پر ان کو شدید تنقید کا سامنا کرنا پڑرہا ہے، بہت سے صارفین نے انہیں ٹرول کرنا شروع کردیا،

ایک میڈیا انٹرویو کے دوران جب ان سے آسکر ایوارڈ یافتہ فلم کے بارے میں پوچھا گیا تو راجامولی نے کہا تھا کہ ‘یہ بہت بورنگ فلم تھی اتنا کہ میں اسے دیکھتے وقت بیچ میں سو گیا تھا
ان کے اس بیان کے بعد انہیں سوشل میڈیا صارفین نے شدید تنقید کا نشانہ بنایا، ایک صارف نے لکھا کہ فلم پیراسائٹ طبیعیات کے اصولوں کو طاق پر نہیں رکھتی، اس لئے شاید آپ کو یہ پسند نہیں ہے۔

ایک اور صارف نے ہدایت کار کو طنز کستے ہوئے لکھا کہ اب اس میں کوئی شک نہیں ہے کہ کیوں اس شخص نے سلمان خان کو شاہ رخ خان اور عامر خان سے بہتر اداکار کہا۔

واضح رہے کہ جنوبی کوریا کی فلم ’پیراسائٹ‘ نے 2020 کے آسکرز ایوارڈز میں بہترین فلم کا ایوارڈ جیت کر نئی تاریخ رقم کر دی۔
یہ آسکرز کی تاریخ میں پہلا موقع ہے کہ انگریزی کے علاوہ کسی اور زبان میں بنائی جانے والی فلم نے ’بہترین فلم‘ کا ایوارڈ جیتا ہے۔

پیراسائٹ نے امریکی شہر لاس اینجلس کے ڈولبی تھيٹر میں منعقد ہونے والی تقریب میں بہترین فلم کے علاوہ بہترین ہدایتکار سمیت چار آسکر ایوارڈ حاصل کیے۔

خیال رہے کہ ‘پیراسائٹ’ پہلی غیر ملکی زبان کی فلم ہے جس کو آسکر ایوارڈ کے دوران بہترین فلم کا اعزاز ملا