صوبہ بلوچستان کے دارالحکومت کوئٹہ میں قمبرانی روڈ پر یکے بعد دیگرے دو دھماکے ہوئے، تاہم خوش قسمتی سے کوئی جانی نقصان رپورٹ نہیں ہوا۔
میڈیا رپورٹس کے مطابق پہلا دھماکہ انگوری باغ پولیس ناکے کے قریب آئی ای ڈی کے ذریعے کیا گیا۔ اطلاع ملتے ہی پولیس اور بم ڈسپوزل اسکواڈ کی ٹیم جائے وقوعہ پہنچی تو اسی دوران دوسرا دھماکہ ہوا، جو وہاں کھڑی بی ڈی ایس کی گاڑی کے قریب کھڑی موٹر سائیکل میں نصب دھماکا خیز مواد سے کیا گیا۔
پولیس حکام کا کہنا ہے کہ دونوں دھماکوں میں کوئی جانی نقصان نہیں ہوا، تاہم علاقے کو فوری طور پر گھیرے میں لے کر سرچ آپریشن شروع کردیا گیا ہے۔
بم ڈسپوزل اسکواڈ اور سی ٹی ڈی ٹیموں نے جائے وقوعہ سے شواہد اکٹھے کرنا شروع کر دیے ہیں، جبکہ واقعے کی تحقیقات کا آغاز کردیا گیا ہے۔
