پاکستان نے سائنس اور ٹیکنالوجی کے شعبے میں ایک اہم سنگِ میل عبور کرتے ہوئے ملکی تاریخ کی پہلی پبلک پرائیویٹ جینومکس جوائنٹ وینچر کا افتتاح کر دیا۔ یہ منصوبہ نیشنل انسٹی ٹیوٹ برائے جینومکس اینڈ ایڈوانسڈ بائیوٹیکنالوجی ، پی اے آر سی ایگرو ٹیک کمپنی اور بلیزن ڈائیگناسٹکس کے اشتراک سے پاکستان ایگریکلچر ریسرچ کونسل کے تحت قائم کیا گیا ہے۔
افتتاحی تقریب میں قومی و بین الاقوامی ماہرین، محققین اور اعلیٰ حکام نے شرکت کی۔ چیئرمین پی اے آر سی ڈاکٹر سید مرتضیٰ حسن اندرابی نے تقریب سے خطاب کرتے ہوئے کہا کہ یہ جوائنٹ وینچر پاکستان کی سائنسی برادری کے لیے ایک تاریخی پیش رفت ہے جو مقامی جینومک صلاحیتوں کے فروغ کے ذریعے ملک کو تحقیق، ڈائیگناسٹکس اور سائنسی ٹیکنالوجی میں خود انحصاری کی طرف لے جائے گا۔
تقریب میں چینی محققین کے وفد نے بھی شرکت کی اور منصوبے کے لیے مکمل تعاون کا یقین دلایا۔
