کراچی
مور خہ 27نومبر 2025
کراچی27 نومبر ۔وزیر آبپاشی، منصوبہ بندی و ترقی جام خان شورو کی صدارت میں محکمہ آبپاشی کی ترقیاتی اسکیموں سے متعلق اہم اجلاس منعقد ہوا۔ اجلاس میں سیکریٹری آبپاشی ظریف کھیڑو، چیف انجنیئر کوٹری بیراج ریاض شاہ اور متعلقہ افسران نے شرکت کی۔اجلاس میں صوبائی ڈویلپمنٹ ورکنگ پارٹی کے اجلاس میں زیرِ غور آنے والی ترقیاتی اسکیموں، کے فور منصوبے، سی سی لائننگ، اور سندھ بیراج امپرومینٹ پروجیکٹ فیز II پر پیش رفت کا تفصیلی جائزہ لیا گیا۔صوبائی وزیر نے افسران کو ہدایت کی کہ بدین ریجن میں سی سی لائننگ منصوبے کی رفتار مزید تیز کی جائے اور اسے رواں مالی سال میں ہر صورت مکمل کیا جائے۔اجلاس میں سندھ یونیورسٹی جامشورو، لُمّس اور مہران یونیورسٹی میں چند ماہ قبل پانی کی قلت سے متعلق بریفنگ بھی دی گئی۔سیکریٹری آبپاشی ظریف کھیڑو نے اجلاس کو بتایا کہ کوفر ڈیم کی تعمیر مکمل ہوچکی ہے اور گیٹس کی تبدیلی کا عمل جاری ہے، جبکہ مختلف آر ڈی کے منصوبوں کی لائننگ مکمل ہوچکی ہے جبکہ کچھ آر ڈی کی لائننگ کا آغاز 20 دسمبر 2025 اور اختتام 10 جنوری 2026 کو مقرر کیا گیا ہے۔وزیر جام خان شورو نے کہا کہ سال 2024-25 کے کلوزر میں پانی کی قلت کے باعث سندھ یونیورسٹی جامشورو، لمس اور مہران یونیورسٹی میں شدید تکلیف کا سامنا کرنا پڑا، جو قابلِ تشویش ہے۔جام خان شورو نے افسران کو ہدایت کی کہ تینوں پیکیجز کے شیڈول پر نظر ثانی کرتے ہوئے ایسا جامع پلان تیار کیا جائے جس سے جامعات اور اطراف کے علاقوں میں پانی کی فراہمی متاثر نہ ہو۔صوبائی وزیر کا کہنا تھا کہ پانی کی کمی ایک بڑا عوامی مسئلہ ہے، اس مسئلے کو ہر صورت ترجیح دی جائے اور کے بی فیڈر کی لائننگ کا کام مقررہ مدت کے اندر مکمل کیا جائے. آخر میں جام خان شورو نے افسران کو ہدایت کی کہ تمام جاری آبپاشی منصوبوں کی بروقت، معیاری اور شفاف تکمیل کو یقینی بنایا جائے۔
ہینڈآؤٹ نمبر 1333۔۔۔
کراچی
مور خہ 27نومبر 2025
سندھ کی ڈاکٹر نبیلہ سومرو کو ریہیبلیٹیشن میڈیسن میں عالمی اعزاز
کراچی 27 نومبر۔حکمہ بحالیِ معذوران (DEPD)، حکومتِ سندھ نے اعلان کیا ہے کہ سندھ انسٹیٹیوٹ آف فزیکل میڈیسن اینڈ ریہیبلیٹیشن (SIPM&R) کی ایگزیکٹو ڈائریکٹر پروفیسر ڈاکٹر نبیلہ سومرو کو انٹرنیشنل سوسائٹی آف ریہیبلیٹیشن میڈیسن (ISPRM) کی جانب سے انفرادی امتیازی اعزاز (Individual Honor Roll Award) سے نوازا گیا ہے۔یہ عالمی سطح پر تسلیم شدہ اعزاز ڈاکٹر نبیلہ سومرو کی غیر معمولی پیشہ ورانہ خدمات، فزیکل میڈیسن اور ریہیبلیٹیشن کے شعبے میں نمایاں تحقیقی و عملی کردار، مریضوں کی نگہداشت کے معیار میں مسلسل بہتری اور جامع و شمولیتی صحت کی ترویج کا اعتراف ہے۔ کئی دہائیوں پر محیط ان کی انتھک علمی اور پیشہ ورانہ جدوجہد نے انہیں اس شعبے کی ایک ممتاز اور قائدانہ شخصیت کے طور پر منوایا ہے۔یہ ایوارڈ ڈاکٹر نبیلہ سومرو کی وژنری قیادت اور SIPM&R میں ان کی سرپرستی میں ہونے والی نمایاں ترقی کی غمازی کرتا ہے۔ ان کے فعال کردار کے باعث ادارے نے نہ صرف پاکستان میں بحالیِ صحت کے معیار کو بہتر بنایا بلکہ خطے میں ایک مرکزِ فضیلت کے طور پر شہرت حاصل کی۔محکمہ بحالیِ معذوران (DEPD)نے اس عالمی اعزاز کو سندھ اور پاکستان کے لیے باعثِ فخر قرار دیتے ہوئے کہا کہ ڈاکٹر نبیلہ سومرو کی یہ کامیابی اس بات کا ثبوت ہے کہ پاکستان صحت اور ریہیبلیٹیشن کے عالمی نظام میں مسلسل مثبت اور مضبوط کردار ادا کر رہا ہے۔
ہینڈآؤٹ نمبر 1335۔۔۔اے۔کے
