برینڈ ایمبیسڈر پروگرام کا مقصد نوجوان طلباء کو صوبائی محتسب سندھ دفتر سے متعلق آگاہی اور شراکت داری دینا ہے، محمد سہیل راجپوت
کراچی27نومبر۔صوبائی محتسب سندھ اور انسٹیٹیوٹ آف بزنس ایڈمنسٹریشن (آئی بی اے) کراچی یونیورسٹی کیمپس کے اشتراک سے ساتویں برینڈ ایمبیسڈر پروگرام کا انعقاد کیا گیا۔ جس میں صوبائی محتسب سندھ محمد سہیل راجپوت نے خصوصی شرکت کی جبکہ رجسٹرار صوبائی محتسب مسعود عشرت، ریحانہ جی علی میمن و دیگر مشیران بھی انکے ہمراہ تھے۔ اس موقع پر ڈین اسٹوڈنٹس افیئرز ماہین غوری نے صوبائی محتسب سندھ و دیگر مہمانان کو خوش آمدید کہا۔ ایمبیسڈر پروگرام سے خطاب کرتے ہوئے صوبائی محتسب سندھ محمد سہیل راجپوت نے کہا کہ برینڈ ایمبیسڈر پروگرام کا مقصد نوجوان طلباء کو صوبائی محتسب سندھ دفتر سے متعلق آگاہی اور شراکت داری دینا ہے۔ انھوں نے کہا کہ آئی بی اے کے تعاون سے ہم یہاں سے دس طلباء کو بطور ایمبیسڈر منتخب کریں گے اور انھیں صوبائی محتسب سندھ دفتر سے متعلق وہ تمام بنیادی معلومات فراہم کریں گے جس کی بنیاد پر وہ اپنے ارد گرد سرکاری محکموں سے متعلق ہونے والی خرابیوں یا زیادتیوں کے مفت اور فوری ازالے کے لیے نہ صرف خود اقدامات کرنے کے قابل ہوں گے بلکہ دیگر کو صوبائی محتسب سندھ دفتر سے متعلق آگاہی دینے میں معاون و مددگار ثابت ہوں گے۔ انھوں نے کہا کہ پچھلے چھ ایمبیسڈر پروگرامز کے نتائج انتہائی مثبت رہے ہیں اور ہمیں امید ہے کہ ساتواں ایمبیسڈر پروگرام بھی کامیابی سے آگے بڑھے گا۔ صوبائی محتسب سندھ محمد سہیل راجپوت نے پروگرام میں وقفۂ سوالات کے موقع پر طلباء کے سوالات کے تفصیلی جوابات بھی دیے۔ قبل ازیں ایڈوائزر صوبائی محتسب سندھ ریحانہ جی علی میمن اور رجسٹرار مسعود عشرت نے بھی خطاب کیا۔
ہینڈآؤٹ نمبر 1334۔۔۔ ایس۔اے۔بی
