کراچی چلے گا تو پاکستان دوڑے گا:پاسبان
کراچی میں چینج آف گارڈز کا فیصلہ ہو چکا ہے:طارق چاندی والا
کراچی ایم کیو ایم اور پیپلز پارٹی دونوں کے ہاتھوں سے نکل چکا ہے
پاسبان شہر کی ترقی میں بھرپور کردار ادا کرے گی
الطاف شکور کی قائدانہ صلاحیتوں کا بھرپور فائدہ اٹھایا جائے
کراچی ( )پاسبان ڈیموکریٹک پارٹی کراچی کے چیف آرگنائزر طارق چاندی والا نے پاسبان سیکریٹریٹ میں گذشتہ روزہونے والی میٹنگ میں گفتگو کرتے ہوئے کہا ہے کہ پیپلز پارٹی کے ہاتھ سے کراچی نکل رہا ہے تو اچانک اس شہر کی محبت ان کے رہنماؤں کے دلوں میں جاگ رہی ہے۔ جو پراجیکٹس سالوں میں مکمل نہ ہوئے اب دنوں میں مکمل کرنے کی بات کی جا رہی ہے۔ اب نہ فنڈز کا ایشو ہے اور نہ فوکس کا۔ گورنر صاحب بھی پیپلز پارٹی کے ساتھ شیر و شکر ہو رہے ہیں۔ ناصر حسین شاہ نے ایسا کیاکارنامہ سرانجام دیا ہے کہ کامران ٹیسوری انہیں اعزازی پی ایچ ڈی سے نواز رہے ہیں؟ دو مہینے پہلے کے فور کے لئے وزیر اعلیٰ وفاق سے پیسوں کا مطالبہ کر رہے تھے اور اب ان کا یہ کہنا ہے کہ بجٹ کا کوئی مسئلہ نہیں ہے۔ گرین لائن، ریڈ لائن اور ڈبل ڈیکر اب سب کراچی کے لئے دستیاب ہے۔ کراچی ایم کیو ایم اور پیپلز پارٹی دونوں کے ہاتھوں سے نکل چکا ہے۔ اب ان کی لومڑیوں والی مکاری نہیں چلے گی۔ کراچی کے لوگوں کے سینوں پر ای چالان کا وار ابھی تازہ ہے۔ بارشوں میں شہر کا جو حال ہوا تھا وہ کراچی والے بھولے نہیں ہیں۔ کراچی کے غم کا کسی نے مداوا کیا اور نہ غصے کی پرواہ کی۔ اب شاہ صاحب شہر کی فکر میں کیوں دبلے ہو رہے ہیں؟ انہوں نے مزید کہا کہ ایم کیو ایم ٹسوے نہ بہائے، اب یہ رائیگاں جائیں گے۔ کراچی کے مستقبل کا فیصلہ ارباب اقتدار نے کر لیا ہے۔ مکاروں کے لئے اب صرف تاسف سے ہاتھ ملنے کا موقع ہے۔ کراچی چلے گا تو پاکستان دوڑے گا۔ کراچی کی عوام جلد خوشخبری سنے گی۔ کراچی کا انتظام ایک آزاد شہر کے طور پر اسٹیک ہولڈرز کو منتقل ہوگا۔ پچھلے تیس سالوں میں دونوں پارٹیوں نے کراچی کو برباد کیا ہے۔ پاسبان شہر کی ترقی میں بھرپور کردار ادا کرے گی۔ لوگ الطاف حسین کو بھول چکے ہیں۔ الطاف شکور کی قائدانہ صلاحیتوں کا بھرپور فائدہ اٹھایا جائے۔ اب پچھتائے کیا ہووت جب چڑیاں چگ گئیں کھیت۔ کراچی میں چینج آف گارڈز کا فیصلہ ہو چکا ہے۔ عوام ھوشیار رھیں مفاد پرست ٹولہ پھربیوقوف بنارہا ہے#
