لندن سے تشریف لائے ہوئے براڈ کاسٹر اور نعت خواں سید محمد اقبال کے اعزاز میں عشائیہ
لندن سے آئے ہوئے معروف براڈکاسٹر اور نعت خواں سید محمد اقبال نے کہا ہے کہ کراچی کی خستہ حال سڑکیں اور بگڑتی ہوئی صورتحال دیکھ کر افسوس ہوتا ہے۔ “کراچی کبھی عروس البلاد اور روشنیوں کا شہر تھا مگر آج حالت ایسی ہے جیسے کوئی پسماندہ گاؤں ہو۔ حکومت اور تمام اداروں کو چاہیے کہ سڑکوں کی بحالی کے کام کو فوری طور پر مشترکہ حکمت عملی کے ساتھ شروع کریں تاکہ شہر میں آنے والے سیاح کراچی کے اصل حُسن اور کشِش سے لطف اندوز ہو سکیں۔” یہ بات انہوں نے بدھ، 26 نومبر 2025ء کو یونین کلب میں اپنے اعزاز میں ہونے والے پُروقار عشائیے میں کہی، اِن کی میزبانی سماجی و ادبی شخصیت امینُ الرحمٰن نے کی۔ اِس موقع پر الیکشن کمیٹی کراچی پریس کلب کے حسن امام صدیقی نے ان کو اِس عشائیے میں آمد پر خوش آمدید کہتے ہوئے کہا کہ اِن کے چاہنے والے اِن کو چلتا پھرتا پاکستان کہتے ہیں، جہاں جاتے ہیں یہ محبتیں بانٹتے ہیں، یہ ملک سے باہر پاکستان کے سفیر ہوتے ہیں، ملک سے باہر رہتے ہوئے بھی ان کا دِل ❤️ پاکستان میں دَھڑکتا ہے، ڈائریکٹر، اکادمی ادبیات پاکستان، کراچی سینٹر، ندیم ظفر صدیقی، محترمہ شائستہ بخاری، بچوں کے معروف ادیب اطہر اقبال، کالم نگار و مصنف ریحان محمود خان، آصف احمد خان اور احمد حسن بھی موجود تھے۔ محفل میں کراچی کے شہری مسائل، خصوصاً سڑکوں کی خَستہ حالی، اِداروں کی کارکردگی اور اِنتظامی بے نظمی پر تفصیلی گفتگو ہوئی جبکہ ادبی موضوعات بھی زیر بحث آئے۔ بچوں کے معروف ادیب اطہر اقبال نے اپنی کتابی سلسلے “ایک کہاوت، ایک کہانی” کا ذکر کرتے ہوئے بتایا کہ تین جلدیں پہلے ہی شائع ہو چکی ہیں اور چوتھی جلد بھی منظرِ عام پر آ چکی ہے جو کئی اسکولوں میں بطور نصاب شامل کی گئی ہے۔ اس موقع پر اطہر اقبال نے اپنی تازہ جلد کے نسخے سید محمد اقبال اور ندیم ظفر صدیقی دونوں کو بطور تحفہ پیش کیے جسے شرکاء نے سراہا۔ تقریب کا اختتام سید محمد اقبال کی روح پرور نعت اور کلام سے ہوا جس نے محفل کے ماحول کو نور، احساس اور سکون سے بھر دیا۔
(ریحان محمود خان)
0311-3388377
