سندھ حکومت کی شفاف کارکردگی پر ورلڈ بینک کا اظہارِ اعتماد — کلک پروجیکٹ میں تیز رفتار پیش رفت، کراچی کی سڑکوں، ٹریفک مینجمنٹ اور شہری سہولیات میں نمایاں بہتری

سندھ حکومت کی شفاف کارکردگی پر ورلڈ بینک کا اظہارِ اعتماد — کلک پروجیکٹ میں تیز رفتار پیش رفت، کراچی کی سڑکوں، ٹریفک مینجمنٹ اور شہری سہولیات میں نمایاں بہتری
کراچی اسٹاف رپورٹ— وزیر بلدیات، ہاؤسنگ و ٹاؤن پلاننگ سندھ سید ناصر حسین شاہ سے ورلڈ بینک مشن کے وفد کی ملاقات میں کلک (CLICK) پروجیکٹ سمیت اہم شہری ترقیاتی منصوبوں پر تفصیلی بات چیت کی گئی۔ ملاقات میں سندھ حکومت کی جانب سے جاری شفاف اقدامات کو عالمی ادارے نے سراہا۔ ناصر حسین شاہ نے وفد کو بتایا کہ کلک پروجیکٹ کے تحت شہر بھر کی بڑی شاہراہوں کی ازسرنو تعمیر، پلوں اور انڈر پاسز کی بحالی، لنک روٹس کی بہتری، اسٹریٹ لائٹس سسٹم کی اپ گریڈیشن اور نالہ صفائی کے مستقل نظام پر کام جاری ہے۔ انہوں نے کہا کہ منصوبوں کی مانیٹرنگ کے لیے ڈیجیٹل ٹریکنگ سسٹم متعارف کرایا گیا ہے جس سے پراگریس اور معیار دونوں میں بہتری آئی ہے۔
انہوں نے کہا کہ حکومت سندھ ورلڈ بینک کے تعاون سے شہری خدمات کو جدید خطوط پر استوار کر رہی ہے، جس سے ٹریفک کنٹرول، شہری سہولیات اور عوامی رسائی میں بہتری آئے گی۔
ورلڈ بینک نے سندھ حکومت کی جانب سے شفاف اور نتیجہ خیز اقدامات کو “مثالی” قرار دیتے ہوئے کہا کہ کراچی میں جاری ترقیاتی کام مستقبل میں شہر کی معاشی سرگرمیوں اور کاروباری ماحول کو بہتر بنائیں گے۔ ادارے نے اس عزم کا اظہار کیا کہ تعاون جاری رہا تو منصوبوں کی رفتار مزید بڑھے گی۔
ملاقات میں شہر کے واٹر سسٹم، ڈرینیج نیٹ ورک، اربن ریفارمز، ٹرانسپورٹیشن سسٹم، ای گورننس، اور میونسپل سروسز کو بہتر بنانے کے لیے نئے اقدامات پر بھی ابتدائی تبادلہ خیال کیا گیا۔
سید ناصر شاہ نے کہا کہ “کراچی کی بہتری صرف منصوبے نہیں بلکہ ہماری ذمہ داری ہے، اور چیئرمین بلاول بھٹو کا وژن ہے کہ سندھ کو جدید اور صاف صوبہ بنایا جائے۔”