ڈویزنل ڈائریکٹوریٹ آف انفارمیشن سکھر
ڈپٹی کمشنر سکھر کی زیرِ صدارت سکھر شہر میں ٹریفک مسائل کے حل سے متعلق اہم اجلاس منعقد
سکھر، 25 نومبر 2025: ڈپٹی کمشنر سکھر نادر شہزاد خان کی زیرِ صدارت سکھر شہر میں بڑھتے ہوئے ٹریفک مسائل اور شہریوں کو درپیش مشکلات کے حل سے متعلق ایک اہم اجلاس منعقد ہوا۔ اجلاس میں اسسٹنٹ کمشنر سٹی سارہ فراز، اسسٹنٹ کمشنر نیو سکھر محمد وسیم، ڈائریکٹر اینٹی انکروچمنٹ سکھر بلاول کورائی، ٹریفک پولیس، اینٹی انکروچمنٹ ٹیم اور دیگر متعلقہ محکموں کے افسران نے شرکت کی۔ اجلاس سے خطاب کرتے ہوئے ڈپٹی کمشنر سکھر نے کہا کہ شہر میں ٹریفک کی روانی کو یقینی بنانا ضلعی انتظامیہ کی اولین ترجیحات میں شامل ہے۔ انہوں نے سڑکوں پر نظم و ضبط، شہریوں کی آسان آمدورفت اور حادثات میں کمی کے لیے مؤثر اور عملی اقدامات اٹھانے کی ہدایت کی۔ ڈپٹی کمشنر نے اسسٹنٹ کمشنر سٹی اور اسسٹنٹ کمشنر نیو سکھر کو ہدایت کی کہ وہ اپنی حدود میں سڑکوں پر قائم تجاوزات، غیرقانونی پارکنگ اور فٹ پاتھوں پر بنائے گئے عارضی ڈھانچوں کے خلاف سخت کارروائی یقینی بنائیں۔ انہوں نے واضح کیا کہ ٹریفک کی روانی میں خلل ڈالنے والوں کے خلاف بلا امتیاز کارروائی کی جائے اور روزانہ کی بنیاد پر مانیٹرنگ رپورٹ پیش کی جائے۔ ڈی سی سکھر نے مزید کہا کہ شہر کے تمام شادی ہالز، شاپنگ مالز اور دکانوں کے مالکان کو پابند بنایا جائے کہ وہ اپنی حدود کے باہر گاڑیاں کھڑی نہ ہونے دیں، خلاف ورزی کی صورت میں متعلقہ دوکان کو فوری سیل کرنے کی کارروائی عمل میں لائی جائے۔ انہوں نے مزید ہدایت کی کہ رات کے وقت ہوٹلوں کی جانب سے کرسیاں اور ٹیبلز روڈ پر رکھ کر راستے میں خلل ڈالنے کا سلسلہ فوری طور پر روکا جائے اور اس خلاف ورزی پر بھی بلا تفریق کارروائی کی جائے۔ اس سلسلے میں تمام دکانداروں اور ہوٹل مالکان کو تحریری نوٹس جاری کیے جائیں تاکہ آگاہی کے بعد کارروائی سے بچ سکیں۔ ڈپٹی کمشنر سکھر نادر شہزاد خان نے ڈائریکٹر اینٹی انکروچمنٹ سکھر کو ہدایت کی کہ گھنٹہ گھر، بندر روڈ، ملٹری روڈ سمیت شہر کے تمام مرکزی علاقوں، مارکیٹوں اور اہم شاہراہوں سے مستقل اور عارضی تجاوزات کے خاتمے کے لیے فوری اور مؤثر آپریشن شروع کیا جائے۔ انہوں نے کہا کہ تجاوزات ٹریفک مسائل کی بنیادی وجہ ہیں جن کا مکمل خاتمہ ناگزیر ہے۔ ڈپٹی کمشنر نے ٹریفک پولیس کو ہدایت کی کہ شہر کے چوکوں اور اہم مقامات پر اضافی نفری تعینات کی جائے، غیرقانونی پارکنگ کے خلاف سخت کارروائی کی جائے اور ٹریفک قوانین کی خلاف ورزی پر جرمانوں کے نظام کو مؤثر بنایا جائے۔ انہوں نے شہریوں میں ٹریفک آگاہی مہم چلانے کی بھی ہدایت کی، جس کے تحت شہر کے مختلف علاقوں میں لاؤڈ اسپیکر کے ذریعے اعلانات کرائے جائیں گے۔ ڈپٹی کمشنر نے تمام متعلقہ محکموں کو باہمی رابطہ مضبوط کرنے، مشترکہ آپریشنز کے آغاز اور باقاعدہ رپورٹنگ کی ہدایت کی۔ انہوں نے کہا کہ ضلعی انتظامیہ شہریوں کو بہتر سفری سہولتیں فراہم کرنے کے لیے بھرپور کوششیں جاری رکھے ہوئے ہے۔ بعد ازاں ڈپٹی کمشنر سکھر نادر شہزاد خان متعلقہ حکام کے ہمراہ گھنٹہ گھر, مرچ بازار، شاہی بازار، شہید گنج، حسینی روڈ، منارا روڈ سمیت شہر کے مختلف علاقوں کا اچانک دورہ کیا، جہاں دکانداروں کی جانب سے سڑکوں اور فٹ پاتھوں پر تجاوزات کے باعث انہوں نے سخت برہمی کا اظہار کیا۔ ڈپٹی کمشنر نے موقع پر موجود متعلقہ افسران کو فوری کارروائی کی ہدایت دیتے ہوئے کہا کہ شہر میں ٹریفک کی روانی اور عوامی سہولت میں رکاوٹ بننے والی تمام تجاوزات کو بلا تاخیر ختم کیا جائے۔ انہوں نے دکانداروں کو سختی سے متنبہ کیا کہ آئندہ کسی بھی قسم کی انکروچمنٹ برداشت نہیں کی جائے گی۔ ڈی سی سکھر نے کہا کہ ضلعی انتظامیہ شہر کو تجاوزات سے پاک کرنے کے لیے مؤثر اور مسلسل کارروائیاں جاری رکھے گی۔
