35 ویں نیشنل گیمز 2025 کی افتتاحی و اختتامی تقریبات کی سیکیورٹی پر سندھ حکومت کی ہائی لیول کمیٹی کا اہم اجلاس ہوا.جس کی صدارت وزیر کھیل سندھ سردار محمد بخش مہر،وزیرتعلیم سید سردار علی شاہ اورمیئرکراچی مرتضی وہاب نے کی. سندھ سیکریٹریٹ میں منعقد ہونے اجلاس میں سیکریٹری کھیل منور علی مہیسر، سیکریٹری اطلاعات و کالجز ندیم رحمان میمن، سیکریٹری تعلیم زاہد حسین عباسی، ڈی جی اطلاعات معیز احمد پیرزادہ اور ڈی جی ثقافت حبیب اللہ میمن، ڈائریکٹر کھیل اسد اسحاق،ایڈیشنل سیکریٹری ٹرانسپورٹ، چیف انجنیئر محمد اسلم مہر، اور سندھ اولمپک کے احمد علی راجپوت،خالدرحمانی، گوہر رضا بھی شریک ہوئے. اجلاس میں 35 ویں نیشنل گیمز کی سیکیورٹی، ٹریفک، اسٹیڈیم انتظامات اور مہمانوں کی آمد و رفت پر تفصیلی بریفنگ دی گئی۔ تمام محکموں کے درمیان کوآرڈینیشن کے لیے خصوصی سیل اور کمیٹیاں قائم کی گئی ہیں، جبکہ صوبائی وزرا کو بھی بریفنگ دی گئی. سیکریٹری کھیل منور علی مہیسر نے بتایا کہ تقریبات کےدوران سیکیورٹی، ٹرانسپورٹ اور اسٹیج انتظامات میں کسی بھی خلل سے بچنے کے لیے اقدامات کیے گئے ہیں اور تمام وی آئی پیز کو کیو آر کوڈ والا دعوت نامہ بھیجا جائے گا. سیکریٹری اطلاعات ندیم الرحمان میمن نے کہا کہ نیشنل گیمز کی الیکٹرانک اور پرنٹ میڈیا میں مکمل کوریج فراہم کی جائے گی۔ ڈی جی ثقافت حبیب اللہ میمن نےدیگر صوبوں سے آنے والے کھلاڑیوں اور مہمانوں کا ریلوے اسٹیشنز اور دیگر مقامات پر استقبال کرنے کی اطلاع دی. محکمہ ٹرانسپورٹ سندھ کے مطابق وومین کھلاڑیوں کو پنک بسز کے ذریعے نیشنل اسٹیڈیم تک پہنچایا جائے گا، جبکہ سندھ اولمپک کے احمد علی راجپوت نے کہا کہ متعلقہ افراد کو شیڈول کے مطابق ٹرانسپورٹ فراہم کی جائے گی. وزیر کھیل سردار محمد بخش مہر نے کہا کہ نیشنل گیمز کی افتتاحی و اختتامی تقریب میں پاس کے بغیر کسی کو داخلے کی اجازت نہیں ہوگی اور تمام مہمان و کھلاڑی دوپہر 2 بجے تک نیشنل اسٹیڈیم کراچی پہنچ جائیں۔ افتتاحی تقریب دوپہر 2:30 بجے شروع ہوگی، جس میں مہمان خصوصی صدر مملکت آصف علی زرداری ہوں گے.سردار محمد بخش مہر نے مزید کہا کہ سندھ حکومت میزبان ہے اور ہم سب کو اپنی ذمہ داریاں بخوبی نبھانی ہوں گی تاکہ نیشنل گیمز کو بھرپور طریقے سے کامیاب بنایا جا سکے۔وزیر تعلیم سید سردار علی شاہ نے کہا کہ نوجوان کو کھیلوں کی طرف راغب کرنے کے لیے اسکولوں کی شمولیت کو یقینی بنایا جائے گا اور یہ گیمز ایتھلیٹکس کی حوصلہ افزائی اور نوجوان کو کھیلوں میں سرگرم کرنے کے لیے ایک مثالی راہ ثابت ہوں گے۔ انہوں نے مزید کہا کہ تمام متعلقہ محکموں کے فوکل پرسنز محکمہ کھیل کے افسران سے رابطہ میں رہیں.میئرکراچی مرتضی وہاب نے بتایا کہ نیشنل گیمز کے لیے کے ایم سی فائر بریگیڈ فراہم کرے گی تاکہ سیکیورٹی اور ایمرجنسی رسپانس کو یقینی بنایا جا سکے۔ انہوں نے کہا کہ نیشنل گیمز کے ایونٹ سے متعلق ویڈیوز اور مواد کے ایم سی کی تمام ایس ایم ڈیز پر چلائے جا رہے ہیں، اور کے ایم سی کے ملازمین و عملے کے لیے ایک مخصوص جگہ بھی مختص کی گئی ہے۔
ہینڈآؤٹ نمبر 1320۔۔۔آئی ایس
