ہری پور :وفاقی وزیر اور صدر مسلم لیگ (ن) خیبر پختونخوا انجینئر امیر مقام نے کہا ہے کہ عوام نے مخالفین کو مسترد کر کے ثابت کر دیا کہ ہری پور مسلم لیگ (ن) کا قلعہ ہے۔عوام کو درپیش مسائل کا ہرممکن ازالہ کریں گے۔
ہری پور میں عوامی اجتماع سے خطاب کرتے ہوئے وفاقی وزیر انجینئر امیر مقام نے کہا کہ نومنتخب ایم این اے بابر نواز خان نے جس محنت اور لگن کے ساتھ انتخابی مہم چلائی وہ قابلِ ستائش ہے۔انہوں نے گھر گھر جا کر نواز شریف کا پیغام پہنچایا۔
انہوں نے کیپٹن (ر) صفدر کی کوششوں کو زبردست خراجِ تحسین پیش کرتے ہوئے کہا کہ انہوں نے دن رات محنت کر کے مثال قائم کی۔ وفاقی وزیر نے کہاکہ ضمنی انتخاب کے دوران عوام کا حوصلہ اور جذبہ قابلِ تعریف تھا۔ ہم ہری پور کے عوام کو مایوس نہیں کریں گے اور بابر نواز خان کے کیے گئے وعدے پورے ہوں گے ۔
انہوں نے کہا کہ وزیراعظم شہباز شریف اور فیلڈ مارشل سید عاصم منیر کی قیادت میں پاکستان ترقی کی جانب گامزن ہے۔ آج عالمی سطح پر پاکستان کی پوزیشن بہتر ہو رہی ہے ۔ انہوں نے کہاکہ فیلڈ مارشل سید عاصم منیر نے معرکہ حق میں بھارت کو شکست دے کر واضح پیغام دیا ہے کہ ملک کا دفاع ناقابل تسخیر ہے۔
انہوں نے کہاکہ صرف الزامات سے قومیں نہیں بنتیں، حقیقت پسند بنیں اور اداروں پر بلاجواز تنقید سے گریز کریں۔ اس موقع پر وفاقی وزیر انجینئر امیر مقام نے پشاور میں خودکش حملے کی شدید مذمت کرتے ہوئے شہدا کے درجات کی بلندی اور زخمیوں کی جلد صحت یابی کے لیے دعا بھی کی۔
