پاکستانی ڈرامہ انڈسٹری کی پسندیدہ ترین جوڑی، ماہرہ خان اور فواد خان ایک بار پھر مداحوں کی توجہ کا مرکز بن گئی ہے، فواد خان کے جذباتی اعتراف پر ماہرہ کی آنکھیں نم ہو گئیں۔
یہ دونوں فنکار، جو ڈرامہ ہمسفر کے ذریعے بے پناہ شہرت کے مقام تک پہنچے، نہ صرف انڈسٹری کے لیے نئی ہوا ثابت ہوئے بلکہ انہیں سپر اسٹارز کے درجے پر بھی فائز کیا۔
اب ایک بار پھر وہ فلم نیلوفر میں ایک ساتھ جلوہ گر ہونے جا رہے ہیں، جو 28 نومبر 2025ء کو ریلیز ہوگی۔ فلم کی تشہیر کے سلسلے میں دونوں اداکار مداحوں سے ملاقاتیں کر رہے ہیں اور حال ہی میں دبئی میں میڈیا اور فینز سے ملے۔
اسی دوران ایک جذباتی لمحہ اس وقت سامنے آیا جب فواد خان نے دل کھول کر بتایا کہ انہوں نے گزشتہ کچھ عرصے میں مشکل دور کا سامنا کیا، لیکن ان کے چاہنے والے ہر مرحلے پر ان کے ساتھ کھڑے رہے۔
انہوں نے کہا کہ چونکہ وہ سوشل میڈیا پر زیادہ فعال نہیں، اس لیے ہر بار شکریہ ادا نہیں کر پاتے، مگر اپنے مداحوں کی محبت اور ساتھ پر دل سے شکر گزار ہیں۔
فواد کی باتیں سن کر ماہرہ خان اپنے جذبات پر قابو نہ رکھ سکیں اور ان کی آنکھوں سے آنسو بہہ آئے۔ ان کے چہرے سے واضح تھا کہ وہ اپنے دوست کے لیے مداحوں کی محبت سے گہرا اثر لے رہی ہیں۔
جیسے ہی اس جذباتی لمحے کی ویڈیو سامنے آئی، سوشل میڈیا محبت بھرے پیغامات سے بھر گیا۔
ایک صارف نے لکھا کہ دونوں کو جذباتی ہوتا دیکھ کر دل بھر آیا، ایک اور نے کہا کہ فواد کے لیے بے حد احترام اور پیار، یہ منظر دل چھو لینے والا تھا۔ ایک مداح نے ماہرہ کی تعریف کرتے ہوئے کہا کہ وہ واقعی فواد خان کی سچی دوست ہیں۔
دونوں اسٹارز کی دوستی، ایک دوسرے کے لیے پرخلوص جذبات اور احترام نے ایک بار پھر مداحوں کے دل جیت لیے۔
