کراچی یونیورسٹی میں اوپن میرٹ پر داخلے کا حکومتی اعلان بدنیتی پر مبنی ہے:پاسبان
کراچی کے ہونہار طلباء کے لئے راستے تنگ کئے جا رہے ہیں:طارق چاندی والا
اوپن میرٹ کرنا ہے تو این ٹی ایس یا آزاد بورڈ کے تحت داخلے کے لئے امتحانات لئے جائیں
بھٹو نے تعلیم کی تباہی کا آغاز کیا، باقیات تعلیم کے تابوت میں آخری کیل ٹھونک رہی ہے
پاسبان کی کراچی یونیورسٹی میں اوپن میرٹ پر داخلوں کے اعلان کی مخالفت
کراچی ( )پاسبان ڈیموکریٹک پارٹی کراچی کے چیف آرگنائزرطارق چاندی والا نے گذشتہ روز ہونے والی میٹنگ میں سندھ حکومت کی جانبدارانہ پالیسیوں پراظہار خیال کرتے ہوئے کہا ہے کہ کراچی یونیورسٹی میں اوپن میرٹ پر داخلے کا حکومتی اعلان بدنیتی پر مبنی ہے۔ پیپلز پارٹی ایک منظم طریقے سے صوبے پر حاوی ہو رہی ہے۔ کراچی بورڈز کو جان بوجھ کر تباہ کیا گیا ہے۔ کراچی کے طلباء کا میٹرک اور انٹر کے امتحانات میں فیل ہونے کا تناسب غیر معمولی حد تک زیادہ ہے۔ کراچی کی طلباء کے کل نمبر بھی صوبے کے دوسرے بورڈز کے مقابلے میں کم آتے ہیں۔ کئی سال تک تواتر سے یہ کام کرنے کے بعد سندھ حکومت نے کراچی یونیورسٹی میں اوپن میرٹ پر داخلوں کا اعلان کیا ہے۔ پاسبان اس اقدام کی سختی سے مخالفت کرتی ہے۔ پیپلز پارٹی متعصب اور جانب دار ہے۔ کراچی کے ہونہار طلباء کے لئے راستے تنگ کئے جا رہے ہیں۔ اندرون سندھ سے نوے فیصد نمبر لینے والے این ای ڈی کے داخلہ امتحان میں فیل ہو جاتے ہیں۔ پیپلز پارٹی کا اگلا ٹارگٹ میڈیکل اور انجینئرنگ کی جامعات ہوں گی۔ کراچی کے عوام سے کسی کو ہمدردی نہیں ہے۔ ایم کیو ایم سمیت دیگر جماعتیں صرف لیپا پوتی کر رہی ہیں۔ پاسبان عدالتوں میں بھی اور صوبے کے سڑکوں پر بھی کراچی کا مقدمہ لڑے گی۔ انہوں نے مزید کہا کہ پاسبان کسی کے خلاف نہیں ہے لیکن ظلم کے خلاف ہے۔ کراچی والے تنگ آمد بجنگ آمد کی صورتحال سے دو چار ہیں۔ اگر حقوق کے لئے جنگ لڑنی پڑی تو لڑتے آئے ہیں اور آگے بھی لڑیں گے۔ بھٹو نے تعلیم کو قومی تحویل میں لے کر تباہی کا آغاز کیا۔ ان کی باقیات تعلیم کے تابوت میں آخری کیل ٹھونک رہی ہے۔ اوپن میرٹ کرنا ہے تو این ٹی ایس یا آزاد بورڈ کے تحت داخلے کے لئے امتحانات لئے جائیں۔ پیپلز پارٹی مینڈیٹ بھی چوری کرتی ہے اور کوٹہ بھی۔ دشمن سے سرحدیں تو محفوظ ہو گئیں مگر کراچی کے لوگ اپنے ہی حکمرانوں کے ہاتھوں غیرمحفوظ ہو گئے ہیں #
