اسپیکر صوبائی اسمبلی سندھ سید اویس قادر شاہ بطور مہمانِ خصوصی برطانوی بادشاہ چارلس (سوم) کی سالگرہ کی تقریب میں شرکت
کراچی22 نومبر ۔ اسپیکر صوبائی اسمبلی سندھ سید اویس قادر شاہ نے کراچی میں برطانوی ڈپٹی ہائی کمیشن میں منعقدہ برطانوی بادشاہ چارلس (سوم) کی سالگرہ کی تقریب میں مہمانِ خصوصی کی حیثیت سے شرکت کی۔
اسپیکر سید اویس قادر شاہ کو برطانوی ہائی کمشنر جین میریٹ اور برطانوی ڈپٹی ہائی کمشنر لینس ڈوم نے خوش آمدید کہا۔
تقریب میں اسپیکر کے ہمراہ ڈپٹی اسپیکر انتھونی نوید، وزیر قانون و داخلہ ضیاالحسن لنجار، صوبائی وزیر اقلیتی امور ڈاکٹر شام سندر اڈوانی،
ایم پی اے سعدیہ جاوید، ایم پی اے تنزیلہ اُمِ حبیبہ، ایم پی اے قاسم سومرو اور ایم پی اے ندا کھوڑو بھی شریک تھے۔
اسپیکر سندھ اسمبلی نے برطانیہ کے عوام اور برطانوی ہائی کمیشن کو بادشاہ چارلس (سوم) کی سالگرہ پر مبارکباد پیش کی اور تقریب میں مدعو کرنے پر شکریہ ادا کیا۔
برطانوی ہائی کمشنر کی دعوت پر اظہارِ خیال کرتے ہوئے اسپیکر سید اویس قادر شاہ نے کہا کہ برطانیہ اور پاکستان کے تعلقات ایک طویل و بامعنی تاریخ رکھتے ہیں جو عوامی روابط، متحرک ڈائسپورا، مشترکہ تعلیمی شراکت داری اور مضبوط ثقافتی رشتوں سے مزید مستحکم ہوئے ہیں۔ تاریخ، روایات اور تخلیقی شناخت ہر قوم کی بنیاد ہوتے ہیں اور سندھ بھی اپنی شناخت، ثقافتی ورثے، روحانی روایت اور کشادہ دلی کے باعث اسی پیغام سے تعلق رکھتا ہے۔
اپنی تقریر کے اختتام پر اسپیکر سندھ اسمبلی نے کہا کہ”بادشاہ چارلس سوم کی سالگرہ کے موقع پر ہم اس عزم کا اعادہ کرتے ہیں کہ سندھ، برطانیہ کے ساتھ مضبوط تعلقات کے فروغ میں اپنا بھرپور کردار ادا کرتا رہے گا۔ ہمارے باہمی تعاون سے ثقافتی روابط بڑھیں گے، معاشی مواقع پیدا ہوں گے اور نوجوانوں کے بہتر مستقبل کی راہ ہموار ہوگی۔
تقریب کے دوران برطانوی ہائی کمشنر جین میریٹ نے مہمانِ خصوصی اسپیکر سید اویس قادر شاہ اور گورنر سندھ کامران ٹیسوری کو برطانوی روایت کے مطابق اسٹیج پر مدعو کیا۔
تقریب میں سول سوسائٹی، کاروباری برادری، اقلیتی نمائندوں اور مختلف شعبہ جات سے تعلق رکھنے والی نمایاں شخصیات کی بڑی تعداد نے شرکت کی۔
ہینڈ آؤٹ نمبر 1308۔۔۔۔اے اے ڈی
