کراچی، ٢٠ نومبر ٢٠٢٥ — عالمی یومِ اطفال کے موقع پر یونیسف اور ملک کے معروف فنکار بلال مقصود نے بچپن بمثال کا آغاز کیا — ایک مؤثر نئی سیریز جو کہانی سنانے اور موسیقی کے ذریعے ابتدائی بچپن کی نشوونما (ECD) جیسے بنیادی موضوع کو اُجاگر کرتی ہے، جو ہر بچے کی صحت، تعلیم اور نشوونما کی بنیاد ہے۔
بلال مقصود اور یونیسف کے اشتراک سے تیار کی گئی بچپن بمثال، پکے دوست کے بینر تلے پیش کی جانے والی چار اقساط پر مشتمل سیریز ہے، جو سادہ اور قابلِ ربط کرداروں، دل کو چھو لینے والے گیتوں اور مقامی مزاح کے ذریعے سائنس کو حقیقت کے قریب لاتی ہے۔ ان اقساط میں یہ دکھایا گیا ہے کہ کس طرح توجہ دینے والی پرورش، محبت، مناسب غذائیت، صفائی، کھیل اور ابتدائی محرکات بچوں کے دماغ کو مضبوط بناتے ہیں۔
یہ سیریز والدین، اساتذہ، کمیونٹی ایجوکیٹرز اور نوجوان ناظرین تک پہنچنے کیلئے تیار کی گئی ہے، جو دلچسپ انداز میں مستند اور عملی رہنمائی فراہم کرتی ہے۔ یہ ثابت کرتی ہے کہ پرورش اور نگہداشت کے لیے دولت نہیں، بلکہ آگاہی اور نیت درکار ہے۔
بلال مقصود نے کہا:
“بچپن بمثال اس بات کو سمجھنے کے بارے میں ہے کہ ہم بچپن کو کس نظر سے دیکھتے ہیں۔ ہر بچہ محبت، کھیل اور توجہ کا حق دار ہے، اور اگر ہم یہ سب ابتدا میں دے دیں تو اس کے اثرات نسلوں تک رہتے ہیں۔”
یونیسف پاکستان کی چیف پروگرام سیکشن، میلیسا نے کہا:
“بچوں کے حقوق کوئی مجرد اصول نہیں۔ یہ زندہ حقیقتیں ہیں — جب بچہ محفوظ، صحت مند، سیکھنے والا اور پیار پانے والا ہو تو یہ حقوق موجود ہوتے ہیں، اور جب بچہ غربت، محرومی، تشدد یا کم مواقع کا شکار ہو تو یہ حقوق غائب ہو جاتے ہیں۔”
یونیسف پاکستان کی ای سی ڈی منیجر، ڈاکٹر صبا شجاع نے کہا:
“ابتدائی بچپن کی نشوونما کسی بھی ملک کی سب سے بہترین سرمایہ کاری ہے۔ جب بچوں کو زندگی کے ابتدائی سالوں میں نگہداشت، غذائیت اور محرک ملتا ہے تو وہ صحت مند بڑھتے ہیں، بہتر سیکھتے ہیں اور معاشرے میں زیادہ مؤثر کردار ادا کرتے ہیں۔”
اس افتتاحی تقریب میں نوجوان پارلیمنٹرینز، اساتذہ، صحت کے ماہرین، میڈیا، بچوں اور نوعمروں نے شرکت کی — جو پاکستان کی آئندہ نسل کے ان نوجوان نمائندوں کا بھرپور اجتماع تھا جو بچوں کے حقوق اور فلاح کے لیے آواز اٹھا رہے ہیں۔
تخلیقی اظہار اور عوامی صحت کے پیغام کو یکجا کرتے ہوئے، پکے دوست کی بچپن بمثال سیریز ابتدائی بچپن کے اہم پیغامات پہنچانے کے طریقے کو نئی جہت دیتی ہے — اور محبت، تعلق اور دیکھ بھال کو ایک مضبوط قوم کی بنیاد بناتی ہے۔
