بھارتی شو ’ڈائننگ ود دی کپورز‘ نے ریلیز ہوتے ہی سوشل میڈیا پر تہلکہ مچا دیا، مداح اس خصوصی پروگرام کی تعریف کرتے نہیں تھک رہے۔
ارمان جین کی پروڈکشن اور سمرتی مندھرا کی ہدایت کاری میں بننے والے اس شو میں، راج کپور کی 100ویں سالگرہ کے موقع پر کپور خاندان کے کئی افراد ایک ہی ڈائننگ ٹیبل پر جمع ہوئے۔ شو میں خاندان کی روایتی محبت، خوش مزاجی اور ہنسی مذاق بھی خوب دیکھنے کو ملا۔
خاص ایپیسوڈ میں ستاروں سے بھری میز پر رنبیر کپور، کرینہ کپور خان، سیف علی خان، کرشمہ کپور، رندھیر کپور، نیتو کپور، ریما جین، ردھما کپور ساہنی، آدر جین اور ناویا نویلی نندا شامل تھے۔
اگرچہ شو ابھی آن لائن آیا ہے، لیکن مداحوں کے ردِعمل کی رفتار کافی تیز ہے، جہاں ان کی جانب سے شو اور فنکاروں کی بے حد تعریف کی جا رہی ہے۔
ایک صارف نے ایکس پر لکھا کہ “ڈائننگ ود دی کپورز دیکھ رہا ہوں، حیرانی نہیں کہ کرینہ اور کرشمہ اب بھی رنبیر سے زیادہ جواں نظر آتی ہیں۔ عالیہ شامل نہیں لیکن سیف موجود ہیں۔ شو ایسا لگ رہا ہے جیسے میرے خاندان کا کوئی ری یونین ہو۔”
ایک اور صارف نے جذباتی انداز میں کہا کہ “جس طرح یہ شو بہترین فیملی وائب دیتا ہے، میرا دل خوش ہو گیا۔”
مزاحیہ تبصرہ کرتے ہوئے ایک مداح نے لکھا کہ “میرے لیے ’ڈائننگ ود دی کپورز‘ کا تصور پاگل پن ہے، کیونکہ اگر میرا بڑا خاندان کھانے پر اکھٹا ہو کر ریکارڈ ہونے کا کہے تو شاید میں وہیں بے ہوش ہو جاؤں۔”
کئی مداحوں نے کپور خاندان کی کیمسٹری کو سراہتے ہوئے کہا کہ ان کے درمیان کا تعلق بالکل حقیقی محسوس ہوتا ہے، اگرچہ چند حصے اسکرپٹڈ لگے۔ تاہم اگر آپ بالی ووڈ خاندانوں کو پسند کرتے ہیں تو یہ شو ضرور دیکھنے کے قابل ہے۔
