خواب میں کتے کو دیکھنے کے بعد وزیراعلیٰ پر نوجوان نے حملہ کردیا، عجیب و غریب وجہ سامنے آنے پر لوگ حیران رہ گئے۔
بھارت میں دہلی کی وزیراعلیٰ ریکھا گپتا کے ساتھ عجیب واقعہ پیش آیا، کتوں کی وجہ سے ان پر حملہ کرنے والے شخص راجیش کھمجی کو پولیس نے گرفتار کرلیا ہے، دہلی پولیس کی طرف سے داخل کی گئی چارج شیٹ میں بتایا گیا کہ راجیش کھمجی نے خواب دیکھنے کے بعد ایسا کیا۔
پولیس نے بتایا کہ راجیش نے خواب میں دیکھا کہ ایک کتا شیولنگ کے پاس بیٹھا ہوا ہے اور اس نے اسے بتایا کہ دہلی میں کتے تکلیف میں ہیں۔
دہلی پولیس کی چارج شیٹ میں مزید کہا گیا کہ راجیش کھمجی نے فیس بک پر ویڈیو دیکھی جس میں لوگ احتجاج کر رہے تھے، کتے کی وجہ سے ہونے والی پریشانیوں کے لیے وزیر اعلیٰ ریکھا گپتا کو مورد الزام ٹھہرایا گیا تھا۔
ملزم راجیش کھمجی آوارہ کتوں سے متعلق سپریم کورٹ کے فیصلے پر دہلی کی وزیر اعلیٰ ریکھا گپتا کے موقف سے ناراض تھا، 11 اگست کے فیصلے میں سپریم کورٹ نے آوارہ کتوں کو پناہ گاہوں میں منتقل کرنے کا حکم دیا تھا، اسکی وزیراعلیٰ ریکھا گپتا نے بھرپور حمایت کی تھی۔
دہلی پولیس نے ملزمان راجیش اور تحسین سید کے خلاف تعزیرات ہند کی مختلف دفعات کے تحت مقدمہ درج کیا ہے، ان دفعات میں قتل کی کوشش، سرکاری ملازم کے فرائض کی انجام دہی میں رکاوٹ ڈالنا اور مجرمانہ سازش شامل ہے۔
اب عدالت اس سلسلے میں 22 نومبر کو الزامات طے کرنے سے متعلق کیس کی سماعت کرے گی، ایڈیشنل سیشن جج ایکتا گوبا مان صدارت کریں گی۔
خیال رہے کہ راجیش کھم جی نے بندروں کے معاملے پر مئی میں ایودھیا میں بھوک ہڑتال بھی کی تھی، دہلی پولیس کی جانب سے 18 اکتوبر کو اس معاملے میں 400 صفحات کی چارج شیٹ داخل کی گئی تھی۔
