ایشوریا رائے کی مودی کے سامنے سچ بولنے پر عوامی پذیرائی

معروف بالی وڈ اداکارہ ایشوریا رائے کی بھارتی وزیر اعظم نریندر مودی کے سامنے سچ بولنے کی ویڈیو وائرل ہوگئی۔

سوشل میڈیا پلیٹ فارمز پر سابقہ مس ورلڈ ایشوریا رائے کی ایک ویڈیو زیر گردش ہے جس میں انہیں ایک تقریب میں موجود دیکھا جا سکتا ہے جہاں بھارتی وزیر اعظم نریندر مودی بھی موجود ہیں۔

ایشوریا رائے تقریب سے خطاب میں کہہ رہی ہیں کہ دنیا میں صرف ایک ہی ذات ہے اور وہ انسانیت ہے، صرف ایک ہی مذہب ہے اور وہ محبت ہے، صرف ایک ہی زبان ہے اور وہ دل کی ہے اور ایک ہی خدا ہے جو ہر وقت ہر جگہ موجود ہے۔

نریندر مودی کے سامنے سچ بولنے پر معروف بالی وڈ اداکارہ کی خوب تعریف کی جا رہی ہے۔

بھارتی فلموں کے خود ساختہ ناقد کمال آر خان المعروف کے آر کے نے ایشوریا رائے کی ویڈیو سوشل میڈیا پلیٹ فارم ایکس پر پوسٹ کرتے ہوئے ان کی تقریف کی۔

کمال آر خان نے لکھا کہ ایشوریا رائے نے مودی کے سامنے یہ بات کہی، ان جیسے لوگ ہیں جو آج بھی بغیر کسی خوف کے سچ کہہ رہے ہیں۔

ایک اور ایکس صارف ترون گوتم نے لکھا کہ ایشوریا رائے نے یہ بات ’ڈیوائیڈر ان چیف‘ کے سامنے کہی۔

روشب رائے نامی ایکس صارف نے لکھا کہ جب اداکارہ نے کہا ’صرف ایک ہی مذہب ہے اور وہ محبت کا مذہب ہے‘ تو کیمرہ مین نے فوراً مودی پر فوکس کیا کیونکہ وہ بالکل جانتا تھا کہ وہ کیا کر رہا ہے۔