واشنگٹن: فیفا ورلڈ کپ 2026ء کے ٹکٹ ہولڈرز اب امریکی ویزا انٹرویوز میں ترجیحی سہولت حاصل کر سکیں گے۔ یہ سہولت امریکی محکمہ خارجہ کی جانب سے متعارف کرائے گئے فیفا پرائیرٹی اسائمنٹ شیڈول سسٹم (فیفا سسٹم) کے تحت دستیاب ہوگی، جسے اوائل 2026ء میں فعال کرنے کا منصوبہ ہے۔
یہ اعلان وائٹ ہاؤس میں ایک تقریب کے دوران کیا گیا، جس میں امریکی صدر ڈونلڈ ٹرمپ، وزیر خارجہ مارکو روبیو، وزیر داخلہ کرسٹی نوم، وائٹ ہاؤس ٹاسک فورس کے اراکین اور فیفا کے صدر جیونی انفنٹینو موجود تھے۔
فیفا کے مطابق، یہ اقدام ہر اس شائق کے لیے ترجیحی ویزا انٹرویو کا موقع فراہم کرے گا جو امریکا میں ہونے والے میچوں کے لیے ٹکٹ خریدے گا۔ فیفا صدر جیونی انفنٹینو نے کہا کہ امریکا دنیا بھر کے شائقین کا خیرمقدم کر رہا ہے اور یہ ورلڈ کپ تاریخ کا سب سے بڑا اور جامع ٹورنامنٹ ہوگا، جس کی عکاسی فیفا پاس کے ذریعے بھی دکھائی دے گی۔
امریکی وزیر خارجہ مارکو روبیو نے کہا کہ امریکا ورلڈ کپ کے شائقین کے لیے ترجیحی اپائنٹمنٹس پیش کر رہا ہے تاکہ ویزا انٹرویو میں سہولت ہو، اور اس موقع پر درخواست دینے کا بہترین وقت ابھی ہے۔
فیفا کے مطابق 2026ء کے ورلڈ کپ میں 16 میزبان شہروں (امریکہ کے 11، میکسیکو کے 3 اور کینیڈا کے 2) میں مجموعی طور پر 78 میچز کھیلے جائیں گے، جبکہ ٹورنامنٹ کے دوران 60 لاکھ سے زائد ٹکٹ دستیاب ہوں گے۔
ٹکٹ ہولڈرز جو امریکی ویزا کے لیے اپائنٹمنٹ حاصل کرنا چاہتے ہیں، انہیں فوری درخواست دینے کی ہدایت کی گئی ہے۔ مزید معلومات فیفا کی جانب سے اوائل 2026ء میں فراہم کی جائیں گی۔ ایسے ممالک کے شہری جو Visa Waiver Program (VWP) میں شامل ہیں، وہ ESTA کے ذریعے ویزا فری ٹریول کے لیے درخواست دے سکتے ہیں۔
فیفا اور ورلڈ ٹریڈ آرگنائزیشن کے مطابق، 2026ء ورلڈ کپ امریکہ میں 1,85,000 روزگار کے کل وقتی مواقع پیدا کرے گا، 30.5 ارب ڈالر کا معاشی حجم پیدا کرے گا اور 17.2 ارب ڈالر امریکہ کی جی ڈی پی میں شامل کرے گا۔ شائقین داخلے اور ویزا سے متعلق مکمل معلومات کے لیے فیفا کے انفارمیشن پیج سے رجوع کر سکتے ہیں۔
