پاکستانی اداکار اور معروف کال بینڈ کے گلوکار جنید خان نے حالیہ ایک ویڈیو میں اپنی جذباتی کمزوری کا اعتراف کرتے ہوئے کہا کہ مردوں کو بھی اپنے اندرونی احساسات کا اظہار کرنے کی اجازت ہونی چاہیے۔
جنید خان نے انسٹاگرام ویڈیو میں کہا کہ حال ہی میں جب میں گھر پر کنسرٹ کی ویڈیو دیکھ رہا تھا، تو مجھے احساس ہوا کہ میں نے اپنے جذبات کو چھپانے کی عادت بنا لی ہے، میں نے فیصلہ کیا کہ اب وقت ہے کہ خود کو آزاد چھوڑ دوں، یہ کمزوری نہیں بلکہ ایک انسان ہونے کی علامت ہے۔
جنید خان نے کہا کہ ہم مردوں کو یہ سکھایا جاتا ہے کہ اپنے جذبات کو چھپائیں تاکہ لوگ ہمیں کمزور نہ سمجھیں، لیکن کبھی کبھی اپنے احساسات کو آزاد چھوڑ دینا ضروری ہے۔
جنید خان نے کہا کہ جذبات کا اظہار صرف کمزوری نہیں بلکہ انسانی طاقت کی علامت ہے اور یہ انسان کو اندر سے مضبوط بناتا ہے۔ انہوں نے تمام مردوں کو پیغام دیا کہ اپنے جذبات کے اظہار سے نہ گھبرائیں اور اپنی انسانی کمزوری کو قبول کریں۔
انسٹاگرام پوسٹ میں انہوں نے لکھا کہ اپنے آپ کو سامنے آنے دو چاہے تنہا ہو یا اپنے قابلِ بھروسہ لوگوں کے سامنے ہو، یہ آزادی دیتی ہے، مجھے وہی محسوس ہوا۔
جنید خان کی اس ویڈیو اور پیغام کو مداحوں کی طرف سے خاصی پذیرائی ملی ہے، اور بہت سے لوگوں نے مردوں کے لیے جذباتی اظہار کے حوالے سے مثبت ردعمل دیا ہے۔
