بالی ووڈ کنگ شاہ رخ خان نے آج ممبئی میں اپنے نام سے منسوب پہلے رئیل اسٹیٹ منصوبے ’شاہ رخز ڈینوب‘ کا افتتاح کیا۔ اس موقع پر ایک شاندار تقریب کا اہتمام کیا گیا جس میں شاہ رخ خان کے ساتھ دبئی میں قائم ڈینوب گروپ کے بانی اور چیئرمین رضوان ساجن بھی شریک ہوئے۔
تقریب ممبئی کے ایک فائیو اسٹار ہوٹل میں منعقد ہوئی۔ اس منصوبے کے آغاز کے بعد شاہ رخ خان وہ پہلے بھارتی اداکار بن گئے ہیں جن کے نام پر ایک رہائشی ٹاور تعمیر کیا جا رہا ہے۔
اس موقع پر خطاب کرتے ہوئے شاہ رخ خان نے کہا کہ رضوان ساجن چاہتے تھے کہ اس منصوبے کی لانچنگ دبئی کے بجائے بھارت میں ہو، اور یہی ان کی اپنی خواہش بھی تھی۔ انہوں نے کہا کہ وہ چاہتے ہیں کہ بھارت کے لوگ بہتر اور آرام دہ زندگی گزار سکیں۔
کنگ خان کا کہنا تھا کہ جیسے جیسے یہ پروجیکٹ آگے بڑھے گا، انہیں امید ہے کہ یہ کئی لوگوں کی زندگیوں میں مثبت تبدیلی لائے گا۔ انہوں نے جذباتی انداز میں کہا کہ اگر ان کی والدہ زندہ ہوتیں تو اس اعزاز پر بہت خوش ہوتیں۔
شاہ رخ خان نے مزید کہا کہ جب میرے بچے یہاں آئیں گے تو میں فخر سے کہوں گا کہ دیکھو، یہ عمارت میرے نام سے منسوب ہے۔ انہوں نے بتایا کہ گزشتہ دو مہینوں میں انہوں نے اس منصوبے کی تمام تفصیلات کا جائزہ لیا ہے۔ یہ جدید طرزِ تعمیر کا حامل اور عام آدمی کی پہنچ میں ہے۔ ان کے مطابق، دبئی میں اپنا سفر شروع کرنے والے لوگوں کے لیے یہ منصوبہ ایک بڑا قدم اور بہتر مستقبل کی تحریک ثابت ہوگا۔
