کراچی(اسٹاف رپورٹر) داؤد یونیورسٹی آف انجینئرنگ اینڈ ٹیکنالوجی میں شاعر مشرق، مفکر پاکستان ڈاکٹر علامہ محمد اقبالؒ کی خدمات اور افکار کو خراج عقیدت پیش کرنے کے لیے یوم اقبال عقیدت و احترام کے ساتھ منایا گیا۔ تقریب میں اقبالؒ کے فلسفے پر تقاریر، شاعری کا نذرانہ اور دستاویزی فلم کی نمائش بھی پیش کی گئی، جس نے سامعین کو اقبالؒ کی حیات و افکار سے روشناس کرایا۔ تقریب ڈائریکٹوریٹ آف اسٹوڈنٹس افیئرز کے زیر اہتمام سیمینار ہال میں منعقد ہوئی۔تقریب کے مہمانِ خصوصی قائم مقام وائس چانسلر پروفیسر ڈاکٹر غلام اللہ میتلو تھے۔ اپنے خطاب میں انہوں نے اقبالؒ کے تصورِ خُودی پر روشنی ڈالتے ہوئے کہا کہ نوجوان نسل کو اقبال کے فلسفے کو سمجھ کر اپنی صلاحیتوں کو اجاگر کرنا چاہیے اور ایمانداری و محنت کے ذریعے ملک کی ترقی میں کردار ادا کرنا چاہیے۔ ڈائریکٹر اسٹوڈنٹس افیئرز انجینئر ڈاکٹر صدام علی کھچی نے معزز مہمانوں، اساتذہ اور طلبہ کو خوش آمدید کہا۔ڈین فیکلٹی آف پی ایم سی پروفیسر ڈاکٹر راشد مصطفیٰ کورائی ، ڈین فیکلٹی سی ای ای ٹی پروفیسر ڈاکٹر حافظ محمد زاہد تنیو نے بھی خطاب کیا ۔ تقریب کے اختتام پر شرکاء نے اس عزم کا اظہار کیا کہ وہ اقبالؒ کے پیغامِ خودی، ایمان اور مسلسل جدوجہد کو اپنی زندگی کا حصہ بنائیں گے۔
=========================
آئی بی اے داخلہ ٹیسٹ، ملک بھر کے انٹرمیڈیٹ نظام کی قلعی کھل گئی، 13 فیصد بچے کامیاب
10 نومبر ، 2025
کراچی(سید محمد عسکری) ملک کے ٹاپ بزنس ادارے انسٹی ٹیوٹ آف بزنس ایڈمنسٹریشن (آئی بی اے) کراچی کے 2025کے داخلہ ٹیسٹ میں ملک کے انٹرمیڈیٹ نظام کی قلعی کھل گئی ہے۔ بیچلرز پروگرامز کے لیے ہونے والے داخلہ ٹیسٹ میں مختلف انٹرمیڈیٹ بورڈز کے محض 13فیصد طلبہ ہی کامیاب ہوسکے جب کہ A لیول طلبہ کی کامیابی کا تناسب 34فیصد رہا، آئی بی اے داخلہ ٹیسٹ میں سندھ بورڈ آف ٹیکنیکل ایجوکیشن کی طلبہ کی کامیابی کا تناسب محض4فیصد رہا جب کہ ضیاالدین بورڈ، لاڑکانہ بورڈ، پشاور بورڈ اور کوئٹہ بورڈ کی کامیابی کا تناسب 8فیصد رہا۔ آغا خان امتحانی بورڈ کی کامیابی کا تناسب 18فیصد، انٹرمیڈیٹ بورڈ کراچی کا 12 فیصد، فیڈرل بورڈ کا 15فیصد، حیدرآباد بورڈ کا 9 فیصد، میرپورخاص بورڈ کا 11فیصد، سکھر بورڈ اور لاھور بورڈ کا 13فیصد، آزاد کشمیر کے میرپور بورڈ کی کامیابی کا تناسب 7 فیصد رہا۔ اعداد و شمار کے مطابق کراچی گرامر اسکول کے طلبہ کی کامیابی کا تناسب 60 فیصد رہا۔ لائسیم اسکول کا 47 فیصد، نکسر کالج کا 42 فیصد، بیکن ہاؤس اسکول کا 32 فیصد، سٹی اسک کا 30 فیصد، لاھور گرامر اسکول کا 27 فیصد، فاونڈیشن اسکول کا 22 فیصد، پی ای سی ایچ ایس کالج کا کا 20 فیصد، آغا خان ہائر سکینڈری اسکول کا 18 فیصد، آدمجی سائنس کا لج اور کامکس کالج کا 17 فیصد، حبیب پبلک اسکول کا 16 فیصد، خاتون پاکستان گورنمنٹ کالج اور ایچیسن کالج کا 15 فیصد جب کہ آرمی پبلک اسکول اینڈ کالج کے طلبہ کی کامیابی کا تناسب 14 فیصد رہا۔ اعداد و شمار کے مطابق 8077 امیدواروں نے ٹیسٹ میں حصہ لیا تھا جس میں A لیول امیدواروں کی تعداد 3818 تھی جب کہ انٹرمیڈیٹ کرنے والے طلبہ کی تعداد 4259 تھی۔
