تحریر: سہیل دانش
کیا کوئی سوچ سکتا تھا کہ یوگنڈا میں پیدا ہونے والا بچہ صرف 34 سال کی عمر میں دنیا کے فنانشنل کیپیٹل نیویارک کا میئربن جائے گا کیا کوئی سوچ سکتا تھا کہ وہ جان ایف کینڈی جیسا پُرجوش اور بارک اوباما جیسا زبردست مقرر دکھائی دے گا 1969 کے بعد نیویارک کے میئر کے لئے سب سے زیادہ ٹرن آؤٹ کے نتیجے میں اُس نے 20 لاکھ سے زائد ووٹ لے کر سب کو حیران کردیا۔ کیا کبھی کسی نے سوچا تھا کہ اپنے انتہائی کم وسائل کے باوجود وہ امریکی صدر ڈونلڈ ٹرمپ اور دنیا کے امیر ترین شخص ایلون مسک کے تمام تر مخالفت اور حربوں کے باوجود فاتح بن کر اُبھرے گا۔ 1889 کے بعد وہ نیو یارک کی تاریخ کا سب سے کم عمر میئر بننے کا اعزاز حاصل کرلے گا۔ نیو یارک کے عوام نے انتخابی مہم میں رنگ نسل زبان اور مذہب کی تفریق سے بالاتر ہوکر ایک ایسے شخص کو میئر بنایا جو اُنکے مسائل حل کرنے کا عزم رکھتا ہے۔ اُس نے لوگوں سے کہا کہ میں میئر بن کر نیویارک کی مہنگی زندگی کو سستا کرنا چاہتا ہوں اُس کی کامیابی نے ثابت کردیا کہ امریکی سسٹم میں مسلمانوں کے لئے مخالفت نہیں ہے اُس نے کامیابی کے بعد اپنی 24 منٹ کی پُرجوش تقریر میں تالیوں کی گونج میں کہا کہ میں تارکینِ وطن اِس شہر کے لوگوں کو یقین دلاتا ہوں کہ میں اُن کی اُمیدوں پر پورا اُتروں گا اُس نے اپنی انتخابی مہم میں اسلام کے نام کو استعمال نہیں کیا لیکن کامیابی کے بعد کہا کہ مجھے سوشلسٹ مسلم ہونے پر فخر ہے۔ اُس کی انتخابی مہم میں ہندو، مسلمان، سکھ، عیسائی حتیٰ کہ یہودی نوجوان بھی پیش پیش رہے۔ جبکہ وہ اعلان کرچکا ہے کہ میرے میئر ہوتے ہوئے اگر اسرائیلی وزیراعظم نیتن یاہو نے نیویارک میں قدم رکھا تو اُنہیں جنگی مجرم کے طور پر گرفتار کرلیا جائے گا اب دیکھنا یہ ہوگا کہ وہ اس کا عملی ثبوت کیسے پیش کرتے ہیں، دوسری طرف بھارتی وزیراعظم نریندر مودی کی جانب سے اُن کی مبارکباد کے پیغام کے جواب میں نیویارک کے منتخب میئر ظہران ممدانی نے کہا کہ میں کبھی بھی مودی کے ساتھ خوشگوار تعلقات کا خواہاں نہیں ہوں۔ کیونکہ میں اُنہیں گجرات کے قتل عام کا ذمہ دار سمجھتا ہوں۔ یہ بھی حقیقت ہے کہ نیویارک کے اِس فیصلے نے غزہ کے عوام کو ایک نیا حوصلہ دیا ہے کیونکہ نومنتخب میئر غزہ پر اسرائیلی بمباری اور تباہی کی کھلم کھلا مخالفت کررہے تھے اُن کی والدہ میرانائر ہندو ہیں اور والد محمود مسلمان، میرا نائر بولی ووڈ اور ہالی ووڈ میں فلم میکر ہیں انہوں نے اپنے بیٹے کی کامیابی پر کہا کہ میری زندگی کی سب سے بڑی پیشکش ظہران ممدانی ہے۔ ظہران ممدانی نے انتخابی مہم کے دوران ایک انٹرویو میں کہا تھا کہ میں محمد علی کی طرح میئرشپ کی معرکہ آرائی کے لئے رنگ میں داخل ہوں گا اور اُس عظیم باکسر کی طرح میں اپنے مداحوں کو نااُمید نہیں کروں گا کیونکہ اُمید زندگی ہے۔
