بالی ووڈ کی مشہور اداکارہ دیپیکا پڈوکون نے حال ہی میں اپنی آواز کو اے آئی کے عالمی منصوبے میں دینے کے حوالے سے بات کرتے ہوئے کہا کہ کیریئر کے ابتدائی دنوں میں میری آواز اور لہجہ اکثر لوگوں کے مذاق کا موضوع بنتا تھا، اور آج وہی آواز ایک جدید اور بین الاقوامی منصوبے کا حصہ بن گئی ہے۔
دیپیکا پڈوکون نے کہا کہ اے آئی کے عالمی منصوبے میں ہونا واقعی ایک عجیب تجربہ ہے، لیکن میں نے اسے قبول کیا اور سمجھا کہ یہ صحیح وقت ہے کہ میں اس تبدیلی کا حصہ بنوں۔
اداکارہ نے کہا کہ اگرچہ مصنوعی ذہانت کے ذریعے آواز کی نقل ممکن ہے، مگر انسان کی جذباتی حساسیت، اس کے تاثرات اور روحانی کیفیت وہ چیزیں ہیں جو کسی بھی مصنوعی ذہانت کے نظام سے مکمل طور پر حاصل نہیں کی جا سکتیں۔
انہوں نے کہا کہ یہ ٹیکنالوجی بہت دلچسپ اور فائدہ مند ہو سکتی ہے، لیکن انسان کی اصل تخلیقی اور جذباتی صلاحیت کا نعم البدل نہیں بن سکتی۔
دیپیکا نے اپنی موجودہ اور آنے والی فلموں کے بارے میں بھی بات کرتے ہوئے بتایا کہ وہ جلد ریلیز ہونے والی فلم بادشاہ میں ایکشن کردار میں نظر آئیں گی، اس کے علاوہ وہ متعدد بھارتی زبانوں کی فلموں میں بھی کام کرتی رہیں گی، جس سے ان کے مداحوں کو مختلف انداز میں ان کا فن دیکھنے کا موقع ملے گا۔
