پاپ موسیقی کی دنیا میں قدم رکھنے اور شہرت کی بلندیوں کو چھونے والے مائیکل جیکسن ایک کامیاب ترین کیرئیر اور بڑی حد تک متنازع زندگی گزارنے کے بعد 25 جون 2009 کو لاس اینجلس میں اپنے گھر میں دل کا دورہ پڑنے سے وفات پا گئے تھے۔
جہاں مائیکل جیکسن کا راک، فنک اور سول موسیقی کا امتزاج انھیں دنیا کا سب سے بڑا پاپ گلوکار بناتا ہے، وہیں اُن کی کاروباری قابلیت اور موسیقی کی مارکیٹ کی سمجھ بوجھ کا اُن کی ترقی میں اہم کردار رہا۔
مائیکل جیکسن نے جہاں اپنے کیرئر کے عروج پر ’تھرلر‘ جیسی میوزک البم پیش کی جسے بہت عرصے تک دنیا میں سب سے زیادہ بکنے والی میوزک البم کا اعزاز حاصل رہا تو ایک وقت ایسا بھی آیا کہ ان کی آخری پاپ البم چھ ہفتے کے لیے بھی میوزک چارٹس پر نہ ٹھہر سکی۔
ان کی زندگی کے ہوش اُڑا دینے والی کہانی پر مبنی بایوپک کا ٹریلر جاری کردیا گیا، اس فلم میں مائیکل کا کردار ان کے بھتیجے جعفر جیکسن نبھا رہے ہیں اور فلم کی ہدایت اینٹوائن فوکا کر رہے ہیں۔
ٹریلر میں مائیکل کو اسٹوڈیو میں کوئنسی جونز کے ساتھ دکھایا گیا ہے جسے کینڈرک سیمپسن ادا کر رہے ہیں، اس میں تھرلر اور وانا بی اسٹارٹن سمٹن جیسے مشہور گانے بھی سنائے گئے ہیں۔
فلم کی کہانی مائیکل جیکسن کے عالمی ستارے بننے کے سفر کو دکھاتی ہے اور ان کی ذاتی زندگی اور موسیقی کی دنیا پر چھوڑے گئے گہرے اثرات کو قریب سے بیان کرتی ہے۔
فلم میں دیگر اہم کرداروں میں مائلز ٹیلر (مائیکل کے وکیل جان برانکا)، کولمین ڈومنگو (والد جو جیکسن)، نیا لانگ (ماں کیتھرین جیکسن)، جیسکا سولا (بہن لاٹویا جیکسن)، لارینز ٹیٹ (موٹاون کے بانی بیری گورڈی)، لورا ہیرئر (میوزک ایگزیکٹو سوزین ڈی پاس) اور کیٹ گراہم (ڈایانا راس) شامل ہیں۔
یہ فلم 24 اپریل 2026 کو سنیما گھروں میں ریلیز ہوگی
