بالی ووڈ کے معروف اداکار سلمان خان کو مبینہ طور پر گمراہ کن اشتہار میں شامل ہونے پر راجستھان کے شہر کوٹا کی کنزیومر عدالت کی جانب سے قانونی نوٹس موصول ہوا ہے۔
تفصیلات کے مطابق سلمان خان نے راجشری کمپنی کے مصالحہ جات کے ایک اشتہار میں دعویٰ کیا تھا کہ “اس مصالحے کے ہر ذرے میں زعفران شامل ہے۔” اداکار کا یہی جملہ ان کے لیے قانونی مسئلہ بن گیا۔
میڈیا رپورٹس کے مطابق شکایت بی جے پی کے سینئر رہنما اور راجستھان ہائی کورٹ کے وکیل اندرموہن سنگھ ہنی نے درج کرائی۔ ان کے مطابق یہ دعویٰ حقیقت سے میل نہیں کھاتا، کیونکہ ایک کلو زعفران کی قیمت تقریباً چار لاکھ روپے ہے جبکہ متعلقہ پان مسالہ صرف پانچ روپے میں فروخت کیا جاتا ہے۔
وکیل کا کہنا ہے کہ اس اشتہار کے ذریعے عوام کو غلط معلومات فراہم کی جا رہی ہیں، جس پر عدالت نے سلمان خان اور راجشری کمپنی سے وضاحت طلب کر لی ہے۔
دوسری جانب سوشل میڈیا پر صارفین کے درمیان اس معاملے پر گرم بحث جاری ہے۔ کئی افراد کا کہنا ہے کہ اداکاروں کو اشتہارات میں دیے گئے بیانات کی سچائی کی ذمہ داری لینی چاہیے۔
