ڈرامہ انڈسٹری کی مقبول جوڑی عائزہ خان اور دانش تیمور کے درمیان ہونے والی دلچسپ اور مزاحیہ گفتگو نے سوشل میڈیا پر مداحوں کے دل جیت لیے۔
عائزہ اور دانش اکثر اپنی روزمرہ سرگرمیاں سوشل میڈیا پر شیئر کرتے رہتے ہیں، جن پر مداح دلچسپ تبصرے کرتے ہیں۔ حال ہی میں ان کی ایک ویڈیو انسٹاگرام پر خوب وائرل ہو رہی ہے، جو شکاگو میں ہونے والی ایک تقریب کی ہے، جہاں یہ جوڑی مداحوں کے سوالات کے جوابات دے رہی تھی۔
تقریب کے دوران عائزہ خان نے شوخی سے دانش تیمور کو مخاطب کرتے ہوئے کہا کہ آپ ڈراموں میں اپنی ہیروئنز کے ساتھ خوب رومانس کرتے ہیں۔ عائزہ نے مذاقاً دانش سے کہا کہ “میں آپ کی بیوی ہوں، سب کے سامنے ویسے ہی محبت کا اظہار کریں جیسے اسکرین پر کرتے ہیں۔”
عائزہ نے حاضرین سے بھی پوچھا کہ کیا آپ سب نے دانش کو ڈراموں میں رومانس کرتے دیکھا ہے؟ جس پر سب نے ہنستے ہوئے اثبات میں جواب دیا۔ اس پر عائزہ نے دانش سے کہا کہ اب سب کے سامنے “آئی لو یو” بولیں۔
دانش تیمور پہلے تو شرما گئے اور بولے کہ “میں تو گھر پر ہمیشہ اپنی بیوی سے پیار کا اظہار کرتا ہوں۔” عائزہ نے فوراً برجستہ کہا، “میں نے آپ کے ساتھ اداکاری بھی کی ہے، تو اب بطور ساتھی اداکار ہی محبت کا اظہار کریں۔”
جب دانش بات ٹالنے لگے تو عائزہ نے حاضرین سے کہا، “دیکھا؟ دانش ہم سب کو گھما رہے ہیں!” یہ سن کر دانش تیمور نے ہنستے ہوئے کہا، “کیا آپ سب چاہتے ہیں کہ میں یہاں اپنی بیوی سے ’آئی لو یو‘ کہوں؟”
مداحوں نے زور دار انداز میں “ہاں” کہا، جس پر دانش نے مزاحیہ لہجے میں کہا، “آپ لوگوں کو دیکھ کر لگ رہا ہے جیسے میری دوبارہ شادی کروا رہے ہیں!”
اس موقع پر عائزہ خان نے کہا، “میرا ماننا ہے کہ محبت کا اظہار کرتے رہنا چاہیے، اس سے رشتہ مضبوط ہوتا ہے۔”
جس پر دانش نے مسکراتے ہوئے جواب دیا، “میرے خیال میں محبت الفاظ سے نہیں، دل سے بڑھتی ہے۔”
